1 Veigauna 21 - Vakavakadewa Makawa

Sa veretaki Tevita ko Setani me wiliki ira na tamata; a sa cudru ko Jiova.

¹ Sa qai ia ko Setani me nodra meca na Isireli, ka sa vakauqeti Tevita me wiliki ira na Isireli.

² A sa kaya ko Tevita kivei Joapi, kei ira na matanivanua, Mo lako, ka wiliki ira na Isireli, mai Pieri-sepa ka yaco ki Tani; ka kauta mai vei au na kedrai wiliwili, me'u kila.

³ A sa kaya ko Joapi, Me vakalewevuqataki ira na nona tamata ko Jiova vakadrau; ia kemuni na noqu turaga na tui, era sa sega li ni nomuni tamata na noqu turaga ko ira kece? a cava mada sa nanuma kina na noqu turaga na ka oqo? ena cava mo ni vu ni cudru kina vei ira na Isireli?

⁴ Ia sa gumatua ga vei Joapi na nona vosa na tui. A sa lako yani kina ko Joapi, ka lako voli vei ira kece na Isireli, ka lako mai ki Jerusalemi.

⁵ A sa tukuna ko Joapi na kedrai wiliwili na tamata kivei Tevita. Ia na kedrai wiliwili kecega na Isireli sa le udolu vakaudolu ka drau tale na udolu na tamata, sa vakaiyaragi e nai seleiwau: ia ko ira na Juta, era sa le va na drau ka vitusagavulu tale na udolu na tamata, sa nodra i yaragi nai seleiwau.

⁶ Ia ka sega ni wili vata kei ira ko ira na Livai, kei ira na Penijamini: ni sa ka ca sara kivei Joapi na nona vosa na tui.

⁷ A sa rarawa na Kalou e na vuku ni ka oqo; ka sa cudruvi ira kina na Isireli ko koya.

⁸ A sa kaya vua na Kalou ko Tevita, Au sai valavala ca vakalevu, ni'u sa cakava na ka oqo; ia mo ni qai kauta tani mada na noqu ca na nomuni tamata, ni ka'u sai valavala vakalialia sara.

⁹ A sa vosa ko Jiova kivei Kata, ni rairai i Tevita, ka sa kaya,

¹⁰ La'ki tukuna kivei Tevita, ka kaya, Sa vosa vakaoqo ko Jiova, Au sa cavuta vei iko e tolu na ka: mo digitaka e dua me'u vakayacora vei iko.

¹¹ A sa lako mai kivei Tevita ko Kata, ka kaya vua, Sa vosa vakaoqo ko Jiova, Mo digitaka mada:

¹² me dausiga na vanua ka yabaki tolu? se me rawai iko ko ira na nomu meca ka vula tolu, ni ra yaviti iko e na nodra i seleiwau? se me kani iko na nonai seleiwau ko Jiova ka siga tolu, ko ya na mate ca e nomu vanua, ni sa vakacaca voli e na veiyasana i Isireli na agilose i Jiova? Mo lewa mada, se cava na vosa me'u kauta vua sa talai au mai.

¹³ A sa kaya vei Kata ko Tevita, Au sa qai taqaya vakalevu; me'u lutu mada ki na liga i Jiova; ni sa levu sara na nona loloma; ia me'u kakua ni lutu ki na liga ni tamata.

¹⁴ A sa vakayacora na mate ca ko Jiova kivei ira na Isireli, ka sa mate vei ira na Isireli e lewe vitusagavulu na udolu na tamata.

¹⁵ A sa tala na Kalou e dua na agilose ki Jerusalemi me vakarusa: ia ni sa vakarau me ia tiko na veivakarusai, sa raica ko Jiova, ka sa veivutuni e na vuku ni rarawa, ka sa kaya vua na agilose sa ia na veivakarusai, Sa rauta; me cegu mada na ligamu. Ia na agilose i Jiova sa tu voleka ki na rara ni buturaki sila nei Orinani na Jepusaiti.

¹⁶ A sa ta cake ko Tevita, ka sa kunea na agilose i Jiova ni sa tu e na maliwa kei vuravura kei lomalagi, ka sa ucu tu e ligana na nonai seleiwau, ka sa dodoka me donui Jerusalemi. Sa qai bale vakatoboicu ko Tevita, kei ira na qase, era sa vakaisulu e nai sulu taga.

¹⁷ A sa kaya vua na Kalou ko Tevita, Sai au li se segai ka vakarota me ra wili ko ira na tamata? ai sai au ga sa cala kai valavala ca vakaidina: ia ko ira na sipi oqo, a cava beka era sa cakava? kemuni Jiova na noqu Kalou, me cudruvi au mada kei na mataqali i tamaqu na ligamuni; ia me kakua ga vei ira na nomuni tamata, me ra vakamatei ko ira.

¹⁸ A sa vakarota na agilose i Jiova vei Kata, me kaya kivei Tevita, me lako cake ko Tevita, ka cakava e dua nai cabocabo-ni-soro kivei Jiova, e na rara ni buturaki sila nei Orinani na Jepusaiti.

¹⁹ A sa lako cake ko Tevita e na vosa i Kata, ka vosataka e na yaca i Jiova.

²⁰ A sa vuki ki muri ko Orinani, ka raica na agilose; a ratou sa vunitaki iratou, ko koya kei iratou vata kaya na luvena tagane vava. A sa buturaka tiko na witi ko Orinani.

²¹ Ia ni sa lako tiko mai ko Tevita kivei Orinani, sa rai yani ko Orinani, ka kunei Tevita, ka lako yani mai na rara ni buturaki sila, a sa cuva vakatoboicu kivei Tevita.

²² Sa qai kaya ko Tevita kivei Orinani, Mo solia mai vei au na tikina sa buturaki kina na sila, me'u cakava kina e dua nai cabocabo-ni-soro kivei Jiova, mo solia mai vei au ka me saumi e na kenai voli dodonu: me mudu na mate ca vei ira na tamata.

²³ A sa kaya vei Tevita ko Orinani, Mo ni taura me nomuni, ka mo ni kitaka na noqu turaga na tui na ka sa dodonu vei kemuni: raica, au sa solia na pulumokau mei soro kama, kei nai yaya ni buturaki sila me kena buka, kei na witi mei madrali laukana: Au sa solia kece.

²⁴ A sa kaya vei Orinani ko Tevita na tui, E segai; ka'u na volia dina e na kenai voli dodonu: ni ka'u na sega ni kauta na ka sa nomu me nona ko Jiova, se vakacabora nai soro kama sa sega ni vakaivoli.

²⁵ A sa solia kina kivei Orinani ko Tevita e ono na drau na sikeli koula, sa vakarautaki na kena bibi, mei voli ni tikina ko ya.

²⁶ A sa tara maikea ko Tevita e dua nai cabocabo-ni-soro kivei Jiova, ka vakacabora nai soro kama eso, ka so nai soro ni veivinakati, ka masuta na yaca i Jiova; a sa vosa vua ko koya e na bukawaqa mai lomalagi e na dela ni cabocabo-ni-soro kama.

²⁷ A sa vakarota na agilose ko Jiova; a sa daramaka tale ko koya na nonai seleiwau ki na kena taga.

²⁸ E na gauna ko ya, ni sa raica ko Tevita ni sa vosa vei koya ko Jiova e na rara ni buturaki sila nei Orinani na Jepusaiti, sa qai vakacaboi soro maikea ko koya.

²⁹ Ia na vale i Jiova, oqori ka cakava ko Mosese e na lekutu, kei nai cabocabo-ni-soro kama, sa tu e na gauna ko ya mai na tikina cecere mai Kipioni.

³⁰ Ia sa dredre vei Tevita me lako kina me taroga na Kalou; ni sa rere tiko e na vuku ni nonai seleiwau na agilose i Jiova.