1 Veigauna 20 - Vakavakadewa Makawa

Sa kabai ko Rapa, ka sa vakacacana na lewe ni koro ko Tevita, 1-3. Sa moku e lewe tolu na tamata yagolevu vei ira na kai Filisitia, 4-8.

¹ Ia ni sa oti na yabaki, ka sa yaco na gauna era sa daulako kina na tui ki nai valu, sa liutaka ko Joapi e dua nai valu kaukauwa, ka vakacacana na nodra vanua na luve i Amoni, a sa lako talega ka kabai Rapa. Ia sa tiko ga mai Jerusalemi ko Tevita. A sa samuti Rapa ko Joapi, ka vaqeavutaka.

² A sa kauta ko Tevita nai sala vakaturaga mai na ulu ni nodra tui, a sa macala na kena bibi sa dua na taledi koula, a sa tu kina na vatu talei; a sa vakaisala kina ko Tevita: sa ka levu talega nai toki ni valu sa kauta mai ko koya mai na koro.

³ A sa kauti ira yani na tamata sa tiko kina, ka lesi ira me ra cudruvi e nai varo, kei na kadrukadru aironi ni were, kei na matau. A sa kitaka vakaoqo ko Tevita ki na nodra veikoro kece na luve i Amoni. A sa lesu ki Jerusalemi ko Tevita kei ira kecega na tamata.

⁴ Ia ni sa oti na ka oqo, sa qai tubu nai valu kei ira na kai Filisitia mai Keseri; e na gauna oqori sa mokuti Sipei ko Sipikei na luve i Usa, sa dua na luve ni tamata balavu sara: a ra sa qai vakamalumalumutaki.

⁵ A sa baci tubu tale nai valu kei ira na kai Filisitia; a sa mokuti Lami na taci i Kolaiaci na kai Kaca, ko Elanani na luve i Jairi ka tagane, ia na dia ni nona moto sa vaka na nodra kau na dautalitali.

⁶ A sa baci tubu tale nai valu mai Kaca; a sa tiko e dua na tamata balavu ka yagolevu, sa ruasagavulu ka va nai qaqalo ni ligana kei na yavana, sa tau yaono na ligana ruarua kei na yavana ruarua; a sa luve i koya na tamata balavu ka yagolevu.

⁷ Ia ni sa bolei ira na Isireli ko koya, sa mokuti koya ko Jonacani na luve i Semea na tuaka i Tevita.

⁸ O iratou oqo eratou sa luve i koya na tamata balavu ka yagolevu mai Kaca; a ratou sa moku mate e na liga i Tevita, kei na ligadra na nona tamata.