1 Veigauna 19 - Vakavakadewa Makawa

Sai valavala vakatani ko ira na luve i Amoni kivei Tevita, a sa gumatua e nai valu ko ira nai valu i Tevita.

¹ Sa oti oqo, sa qai ciba ko Neasi na nodra tui na luve i Amoni, ka sa mai tui na luvena tagane, me kenai sosomi.

² A sa kaya ko Tevita, Au na lomani Anuni na luve i Neasi, ni sa lomani au ko tamana. A sa vakatadu mata ko Tevita me vakacegui koya e na vuku i tamana. A sa lako ko iratou na tamata nei Tevita ki na nodra vanua na luve i Amoni, kivei Anuni, me vakacegui koya.

³ Ia era sa kaya vei Anuni ko ira na nodra turaga na luve i Amoni, O sa nanuma beka ni sa dokai tamamu ko Tevita, ni sa talai iratou na veivakacegui kivei iko? sa ra sega li ni lako mai kivei iko ko iratou na nona tamata me ratou vakararai, ka yamata ka vukica na vanua?

⁴ A sa tauri iratou kina na tamata nei Tevita ko Anuni, ka tasia, ka seledrutia na nodratou i sulu ka me tauvata kei na rubudratou, ka talai iratou yani.

⁵ Sa qai lako eso ka tukuna vei Tevita na ka sa caka vei iratou na tamata. A sa talaki ko koya me tavaki iratou; ni ra sa madua vakalevu ko iratou na tamata. Ka sa kaya na tui, Dou tiko mada mai Jeriko, me tei tubu na kumimudou, mo dou qai lako tale mai.

⁶ Ia ni ra sa kunea ko ira na luve i Amoni ni ra sa velavela vei Tevita, era sa vakauta ko Anuni kei ira na luve i Amoni e dua na udolu na taledi siliva, me ra volia kina na qiqi-ni-valu eso, ka so na tamata sa dauvodo ose, mai Mesopotemia, kei Siria-meeka, kei Sopa.

⁷ A ra sa volia e tolu na oba ka rua na udolu na qiqi-ni-valu, kei na tui Meeka kei ira na nona tamata; a ra sa lako mai ka tiko vakaivalu ki Metipa. A ra sa soqoni vata ko ira na luve i Amoni mai na nodra veikoro, ka lako mai ki nai valu.

⁸ Ia ni sa rogoca ko Tevita, sa talai Joapi yani, kei ira kece na mataivalu qaqa.

⁹ A ra sa curu mai ki tautuba ko ira na luve i Amoni, a sa tuvai valu ka donuya na matamata-ni-koro: ia ko iratou na tui eratou sa lako mai, eratou sa tiko vakai ratou e na were.

¹⁰ Ia ni sa raica ko Joapi ni sa tuvai nai valu e matana, e dakuna talega, sa digitaka ko koya eso na tamata bula maivei ira kecega na Isireli, a sa tuvai ira me ra donui ira na kai Siria.

¹¹ Ia na kena vo ni tamata sa solia kivei Apisai na tacina, a ra sa tuvai ira me ra donui ira na luve i Amoni.

¹² A sa kaya ko koya, Kevaka sa gumatua vei au ko ira na kai Siria, mo qai mai vukei au: ia kevaka sa gumatua vei iko ko ira na luve i Amoni, au na qai vukei iko:

¹³ mo kaukauwa, ia me da gumatua e na vukudra na noda tamata, kei na veikoro ni noda Kalou: me qai kitaka ko Jiova na ka sa vinaka vua.

¹⁴ Sa qai toro voleka yani ko Joapi, kei ira na tamata era tiko vata kaya, kivei ira na kai Siria me ra vala; ka ra sa dro e matana.

¹⁵ Ia ni ra sa raica ko ira na luve i Amoni, ni sa dro ko ira na kai Siria, era sa dro talega ko ira e na mata i Apisai na tacina, a ra sa curu ki loma ni koro. Sa qai lako ki Jerusalemi ko Joapi.

¹⁶ Ia ni ra sa raica ko ira na kai Siria ni ra sa guca vei ira na Isireli, era sa vakatadu mata, a sa kauti ira mai na kai Siria era sa tiko mai tai kadua ni Uciwai: ka sa liutaki ira ko Sofaki na kapiteni ni valu i Etareseri.

¹⁷ A sa tukuni kivei Tevita; ka sa soqoni ira vata kecega na Isireli ko koya, a sa qalo-kosova na Joritani, ka sa yaco vei ira, a sa tuva nai valu me donui ira. Ia ni sa tuvai ira oti na nonai valu ko Tevita me ra donui ira na kai Siria, era sa vala kaya.

¹⁸ Ka sa dro ko ira na kai Siria e matadra na Isireli, a sa mokuta ko Tevita vei ira na kai Siria e le vitu na udolu na tamata era sa vala e na qiqi-ni-valu, ka le va na oba na tamata sa daulako e na yavadra, sa vakamatei Sofaki talega na kapiteni ni valu.

¹⁹ Ia ni ra sa raica ko ira na tamata i Etareseri ni ra sa guca vei ira na Isireli, era sa qai soro kivei Tevita, ka ra tauri me nona tamata: ka sa bese ko ira na kai Siria ni totaki ira tale na luve i Amoni.