1 Veigauna 17 - Vakavakadewa Makawa

Sa via tara na vale nei Jiova ko Tevita a sa talai Necani ko Jiova vei Tevita, me kakua ni tara, 1-15. Sa masu ka vakavinavinaka ko Tevita, 16-27.

¹ Ia ni sa tiko ko Tevita e nona vale, sa kaya ko Tevita kivei Necani na parofita, Raica, au sa tiko e na vale sitari, ia sa tiko na kato ni veiyalayalati i Jiova e ruku ni vale laca.

² Sa qai kaya vei Tevita ko Necani, Mo kitaka na ka kecega sa tu e lomamu; ni sa tiko vata kei iko na Kalou.

³ A sa lako mai na vosa ni Kalou e na bogi ko ya kivei Necani, a sa kaya,

⁴ Mo la'ki tukuna kivei Tevita na noqu tamata, Sa kaya vakaoqo ko Jiova, O na sega ni tara na vale me'u tiko kina:

⁵ ni sa sega e dua na vale ka'u sa tiko kina mai na siga ka'u a kauti ira cake kina na Isireli, ka yacova na siga oqo; ia ka'u a lako voli mai na vale laca e dua ki na vale laca e dua, kei na veivale tani:

⁶ e na veiyasana kecega ka'u sa lako voli kina kei ira kecega na Isireli, sa dua li na vosa au a kaya vua e dua sa lewai ira na Isireli, ko ira ka'u a vakarota me vakani ira na noqu tamata, me vakaoqo, A cava dou a sega kina ni tara e dua na vale sitari me noqu?

⁷ Ia oqo, mo kaya vei Tevita na noqu tamata, Sa kaya vakaoqo ko Jiova ni lewe vuqa, Au a kauti iko mai na bai ni sipi, mai na vakatawa sipi, mo nodra tui na noqu tamata na Isireli:

⁸ ia ka'u sa tiko vata kei iko e na yasana kece ko a lako kina, ka muduki ira tani na nomu meca kecega mai na matamu; ka vakarogoya na yacamu me vaka na yacadra na tamata rogo e vuravura.

⁹ Au na lesia talega e dua na yasana me nodra na noqu tamata na Isireli, ia ka'u na vakatikori ira, a ra na tiko e na nodra yasana, a ra na sega ni kau tani tale; ia ena sega talega ni vakararawataki ira tale ko ira na luve ni valavala ca, me vaka e nai vakatekivu,

¹⁰ ka mai na gauna ka'u a lesia kina na turaga ni lewa vei ira na noqu tamata na Isireli. Ia ka'u na vakamalumalumutaka talega na nomu meca kecega. Au sa tukuna talega vei iko, ni na tara e dua na vale ko Jiova me nomu.

¹¹ Ia ni sa oti na nomu gauna mo toki kina vei ira na nomu qase, au na qai vakatubura na nomu kawa me muri iko, mai vei iratou na luvemu tagane: ia ka'u na vakataudeitaka na nona matanitu.

¹² Ena tara ko koya e dua na noqu vale, ia ka'u na vakataudeitaka na nonai tikotiko vakaturaga me sega ni oti.

¹³ Au na tamana koi au, ka na luvequ ko koya: ia ka'u na sega ni kauta tani maivua na noqu loloma, me vaka ka'u a kauta tani maivei koya sa liu vei iko:

¹⁴ ia ka'u na vakatikori koya e na noqu vale kei na noqu matanitu ka tawa mudu: ia ena vakataudeitaki na nonai tikotiko vakaturaga me sega ni oti.

¹⁵ Sa vaka na vosa kecega oqo, ka vaka na raivotu kece oqo, sa vosa vaka talega kina vei Tevita ko Necani.

¹⁶ A sa lako mai ko Tevita na tui ka tiko e na mata i Jiova, ka sa kaya, O cei koi au, kemuni Jiova na Kalou, se cava mada na noqu mataqali, ko ni sa kauti au mai kina ki ke?

¹⁷ Ia sa ka lailai talega oqo e matamuni, Jiova; ni kemuni sa vosataka talega na noqu kawa na nomuni tamata ka yacova sara na gauna maimuri, ka ko ni sa golevi au me vaka ka'u sa tamata turaga, kemuni Jiova na Kalou.

¹⁸ A cava tale me kaya ko Tevita kivei kemuni e na vuku ni nomuni dokai koya na nomuni tamata? ni kemuni sa kila na nomuni tamata.

¹⁹ Kemuni Jiova, ko ni sa cakava na ka levu kecega oqo e na vuku ni nomuni tamata, ka ni sa vaka talega na lomamuni, ni kemuni sa vakaraitaka na ka levu kece oqo.

²⁰ Sa sega e dua sa tautauvata kei kemuni Jiova, ka sa sega tale na Kalou, koi kemuni duaduaga, me vaka na ka kecega keimami sa rogoca e na daliga i keimami.

²¹ Ia ko cei na matanitu e vuravura sa tautauvata kei ira na nomuni tamata na Isireli, ko ira sa lakova ko koya na Kalou me volia me ra nona tamata, me rogovaki na yacamuni ni sa levu ka rerevaki, ni kemuni a vakasevi ira tani na veimatanitu eso e matadra na nomuni tamata, ko ira ko ni sa volia mai Ijipita?

²² Ni kemuni sa qisi ira na nomuni tamata na Isireli, me ra nomuni tamata ka tawa mudu: ia koi kemuni, Jiova, ko ni a yaco mo ni nodra Kalou.

²³ Ia oqo, kemuni Jiova, me vakataudeitaki ka tawa mudu na ka ko ni sa vosataka e na vuku ni nomuni tamata, e na vuku talega ni nona kawa, ia mo ni kitaka me vaka na nomuni vosa:

²⁴ ka me vakataudeitaki, ka me vakacaucautaki kina na yacamuni ka tawa mudu, ka vaka, Sa nodra Kalou na Isireli ko Jiova ni lewe vuqa, io sa Kalou vei ira na Isireli: ia me vakataudeitaki e matamuni na mataqali i Tevita na nomuni tamata.

²⁵ Ni kemuni sa tukuna mai vei au na nomuni tamata, koi kemuni na noqu Kalou, ni kemuni na tara e dua na vale me noqu: o koya sa yaloqu kina na nomuni tamata me'u masu e matamuni.

²⁶ Ia oqo, kemuni Jiova, ko ni sa Kalou, ka sa yalataka na ka vinaka oqo vei au na nomuni tamata;

²⁷ ia oqo, me yalomuni me vakalougatataka na noqu mataqali na nomuni tamata, me tu ga e matamuni ka sega ni mudu: kemuni Jiova, ko ni sa vakalougatataka, io, ko ni na vakalougatataka ka tawa mudu.