1 Veigauna 16 - Vakavakadewa Makawa

Ai soro sa vakacabori e na mata ni kato; a yacadratou eratou sa cakacaka e na mata ni kato; na sere ni vakavinavinaka.

¹ A ra sa kauta mai na kato ni Kalou, ka vakatikora e loma ni vale laca sa birika oti ko Tevita: a ra sa vakacabora nai soro kama eso, ka so nai soro ni veivinakati, e na mata ni Kalou.

² Ia ni sa tinia ko Tevita na nona vakacabora nai soro kama kei nai soro ni veivinakati, sa vosavakalougatataki ira na tamata e na yaca i Jiova.

³ A sa vota vei ira yadua na Isireli, vei ira na tagane kei ira na yalewa, kivei ira yadua e dua nai buli madrai, kei na tiki ni lewe ni manumanu, ka dua nai buli vua ni vaini.

⁴ A sa lesia ko koya eso vei ira na Livai me ra ia na cakacaka e na mata ni kato i Jiova, ka me ra tukutuku, ka vakamolimoli ka vakavinavinaka vei Jiova na nodra Kalou na Isireli:

⁵ ko Esafa sa liu, ka sa taravi koya ko Sakaraia, ko Jieli, kei Simiramoci, kei Jieli, kei Maticaia, kei Iliapi, kei Pinaia, kei Opeti-itomi. Ia ko Jieli, e na soliteri kei na api, ia ko Esafa, sa sausau e na sibali me rogo levu;

⁶ sa uvu davui tikoga e na mata ni kato ni veiyalayalati ni Kalou koi rau na bete ko Pinaia kei Jeesieli.

⁷ Sa qai lesia na sere ni vakavinavinaka vei Jiova ko Tevita e na siga ga ko ya vei Esafa kei ira na wekana:

⁸ Dou ia na vakavinavinaka vei Jiova, dou masuta na yacana, Dou tukuna voli na nona cakacaka vei ira na tamata.

⁹ Dou sere vua, dou seretaka vua na sere, Dou tukutukuna na nona cakacaka mana kecega.

¹⁰ Dou vosa doudou e na yacana tabu: Me marau na lomadra era sa vakasaqarai Jiova.

¹¹ Dou vakasaqarai Jiova kei na nona kaukauwa, Dou vakasaqara tikoga na matana.

¹² Dou nanuma na nona cakacaka mana sa kitaka oti ko koya, Na nona cakacaka mana kei na lewa ni gusuna;

¹³ Koi kemudou na kawa i Isireli na nona tamata, Koi kemudou na luve i Jekope, sa digitaka ko koya.

¹⁴ Ko Jiova ga sa noda Kalou; Sai koya ga sa lewai vuravura taucoko.

¹⁵ Dou nanuma tikoga na nona veiyalayalati; A vosa sa vakarota ko koya me yacova e dua na udolu nai tabatamata;

¹⁶ Na veiyalayalati ka ia ko koya kei Eparaama, Kei na nona bubului kivei Aisake,

¹⁷ A sa vakadeitaka ko koya vei Jekope mei lesilesi, Vei Isireli talega me veiyalayalati ka tawa mudu;

¹⁸ A sa kaya, Au na solia kivei iko na vanua ko Kenani, Nai votavota mo dou taukena;

¹⁹ Ni dou a lewe vica walega, Io e lewe vica walega, ka vulagi kina.

²⁰ Ia, ni ra sa lako mai na vanua e dua ki na vanua e dua, Ia mai na matanitu e dua kivei ira na mataqali e dua tani;

²¹ Sa sega ni laiva e dua me vakacacani ira; Io, sa vunauci ira na tui e na vukudra,

²² Ka vaka, Kakua ni tarai ira ka'u sa lumuta, Dou kakua ni vakacacani ira na noqu parofita.

²³ Dou sere vei Jiova, na lewe i vuravura kecega; Tukuna voli e na veisiga ni sa dauia na veivakabulai ko koya.

²⁴ Tukuna na nona lagilagi e na veimatanitu tani; Na nona cakacaka e veivakurabuitaki ki na veimatanitu kecega.

²⁵ Ni sa levu ko Jiova, a sa dodonu me vakacaucautaki vakalevu: Me rerevaki vakalevu cake talega ko koya vei ira na kalou kecega.

²⁶ Ni ra sa matakau walega na nodra kalou kecega na tamata: Ia ko Jiova ga sa bulia na lomalagi.

²⁷ Sa tiko e matana na serau kei na vakarokorokotaki; Sa tiko e nona yasana na kaukauwa kei na marau.

²⁸ Dou solia vei Jiova, koi kemudou na lewe ni veivanua, Dou solia vei Jiova na vakarokoroko kei na kaukauwa.

²⁹ Dou solia vei Jiova na vakarokoroko e kilikili kei na yacana: Dou kauta mai nai madrali, ka lako mai kivei koya: Dou lotu vei Jiova e na yasana tabu sa vakaiukuuku.

³⁰ Dou rere e matana, ko vuravura taucoko: Ena tu dei talega ko vuravura, me kakua ni yavalati.

³¹ Me reki ko lomalagi, ka marau ko vuravura: Me kainaki talega e na veimatanitu, Sa lewa ko Jiova.

³² Me vadugu na wasawasa, kei na ka ka sinai kina: Me reki na veiwere, kei na ka kecega sa tiko kina.

³³ Ena qai sere mai na kau ni veikau e na mata i Jiova, Ni sa lako mai ko koya me lewai vuravura.

³⁴ Dou ia na vakavinavinaka vei Jiova, ni sa yalovinaka: Ni sa sega ni mudu na nona loloma.

³⁵ Ia mo dou kaya, Ni vakabulai keimami, na Kalou ni neimami bula, Ka vakasoqoni keimami vata, ka vakabulai keimami maivei ira na veimatanitu tani, Me keimami vakavinavinaka ki na yacamuni tabu, Me keimami daureki e na vakavinavinaka vei kemuni.

³⁶ Me vakavinavinakataki ko Jiova na nodra Kalou na Isireli Ka tawa mudu. A ra sa vakaemeni ko ira kecega na tamata, ka ra sa vakavinavinaka kivei Jiova.

³⁷ A sa laivi Esafa kei ira na wekana ko koya maikea, e na mata ni veiyalayalati i Jiova, me ra cakacaka tikoga e na mata ni kato, me vaka na kenai valavala e yaga e na veisiga:

³⁸ kei Opeti-itomi kei ira na wekadra, sa lewe onosagavulu ka walu; ia sai vakatawa ni katuba na tagane na luve i Jitucuni ko Opeti-itomi, kei Osa:

³⁹ kei Setoki na bete, kei na wekana era sa bete, e na mata ni vale i Jiova, e na tikina cecere mai Kipioni,

⁴⁰ me vakacabora tiko nai soro kama vei Jiova e dela ni cabocabo-ni-soro kama, e na mataka kei na yakavi, ka me vaka na ka kecega sa volai e na vunau i Jiova, o koya sa vakarota ko koya vei ira na Isireli;

⁴¹ kei ira vata ko Imani kei Jitucuni, kei ira talega na kena vo era sa digitaki, a sa cavuti na yacadra yadua, me ia na vakavinavinaka vei Jiova, ni sa tawa mudu na nona loloma;

⁴² a sa tu vata kei rau, ko Imani kei Jitucuni, e na davui kei na sibali me rogo levu, ka so tale na ka sa yaga ni ra sa qiriqiri ka sere vua na Kalou. Ka sai vakatawa ni katuba ko iratou na luve i Jitucuni.

⁴³ A ra sa suka ko ira kecega na tamata yadua ki na nona vale: ka sa lesu tale ko Tevita me vosavakalougatataka na nona lewe-ni-vale.