1 Veigauna 15 - Vakavakadewa Makawa

Sa kauta na kato ki Jerusalemi ko Tevita.

¹ A sa tara eso na nona vale ko Tevita e na nona koro, ka sa vakarautaka e dua na tikina me kenai tutu ni kato ni Kalou, ka birika kina na kena vale laca.

² Sa qai kaya ko Tevita, Sa sega ni dodonu me colata na kato ni Kalou ko ira na tani, ko ira ga na Livai; ni sa digitaki ira ko Jiova me ra colata na kato ni Kalou, ka me ra qaravi koya tikoga ka tawa mudu.

³ A sa vakasoqoni ira kecega na Isireli ki Jerusalemi ko Tevita, me ra kauta mai na kato i Jiova ki na kena tikina, sa vakarautaka ko koya.

⁴ Ka sa vakasoqoni ira vata na luve i Eroni kei ira na Livai ko Tevita:

⁵ Vei ira na luve i Koaca ka tagane: ko Urieli ka liu, kei ira na wekana era sa le dua na drau ka ruasagavulu;

⁶ vei ira na luve i Mirari ka tagane: ko Asaia ka liu, kei ira na wekana era sa le rua na drau ka ruasagavulu;

⁷ vei ira na luve i Kerisomi ka tagane: ko Joeli ka liu, kei ira na wekana era sa le dua na drau ka tolusagavulu;

⁸ vei ira na luve i Elisafani ka tagane: ko Semaia ka liu, kei ira na wekana era sa le rua na drau;

⁹ vei ira na luve i Epironi ka tagane: ko Ilieli ka liu, kei ira na wekana era sa le walusagavulu;

¹⁰ vei ira na luve i Usieli ka tagane: ko Aminatapi ka liu; kei ira na wekana era sa le dua na drau ka mani tinikarua.

¹¹ A sa kacivi rau na bete ko Setoki kei Epaiaca ko Tevita, kei ira na Livai, ko Urieli, ko Asaia, kei Joeli, ko Semaia, kei Ilieli, kei Aminatapi,

¹² ka kaya vei iratou, Oi kemudou sa nodra qase turaga na Livai; dou vakasavasavataki kemudou, koi kemudou kei ira talega na wekamudou, mo dou kauta mai na kato i Jiova na nodra Kalou na Isireli ki na tikina ka'u sa vakarautaka:

¹³ Ia ni dou a sega ni kitaka eliu, sa vakacacani keda kina ko Jiova na noda Kalou, ni da a sega ni vakasaqarai koya me vaka na kenai valavala sa dodonu.

¹⁴ A ra sa vakasavasavataki ira ko ira na bete kei ira na Livai me ra kauta mai na kato i Jiova na nodra Kalou na Isireli.

¹⁵ A ra sa colata na kato ni Kalou ko ira na Livai e na kenai vua, me vaka sa kaya ko Mosese, ka vaka na vosa i Jiova.

¹⁶ A sa kaya ko Tevita kivei ira sa liu vei ira na Livai, me ra lesi ira na wekadra me ra dau-ni-sere, kei na ka domo vinaka, na api, kei na soliteri kei na sibali, ka tabalaka na domodra e na marau.

¹⁷ Ia ko ira na Livai, era sa lesi Imani na luve i Joeli ka tagane; kei ira eso na wekana, ko Esafa ka tagane na luve i Perekaia: ka so vei ira na wekadra na luve i Mirari era tagane, ko Icani, ka tagane na luve i Kusaia;

¹⁸ a sa tiko vata kei ira eso na wekadra sa uasivi sobu: ko Sakaraia, ko Peni, kei Jeesieli, kei Simiramoci, kei Jieli, kei Uni, ko Iliapi, kei Pinaia, kei Meesea, kei Maticaia, kei Elifileu, kei Mikiniaia, kei Opeti-itomi, kei Jieli, era sa kenai vakatawa ni katuba.

¹⁹ Ia ko iratou na dau-ni-sere, ko Imani, ko Esafa, kei Icani, me sausau me rogo levu na sibali parasa;

²⁰ kei Sakaraia, kei Asieli, kei Simiramoci, kei Jieli, kei Uni, kei Iliapi, kei Meesea, kei Pinaia, e na soliteri vaka na domo ni yalewa;

²¹ ia ko Maticaia, kei Elifileu, kei Mikiniaia; kei Opeti-itomi, kei Jieli, kei Asasaia, e na api vakadomoilevu me liu.

²² A sa domo-ni-sere ko Kinanaia, ko koya sa liu vei ira na Livai; ka sa dauvakatavulica na sere, ni sa vuku ko koya.

²³ Ka sai vakatawa ni katuba ni kato ko Perekaia, kei Elikana.

²⁴ Ia ko Sipanaia, kei Jiosafati, kei Nicaneli, kei Amasai, kei Sakaraia, kei Pinaia, kei Eliesa, ko iratou na bete, eratou sa uvu davui e na mata ni kato ni Kalou: ka sai vakatawa ni katuba ni kato ko Opeti-itomi kei Jiaia.

²⁵ A sa lako ko Tevita, kei ira na nodra qase na Isireli, kei ira na turaga ni yayaudolu, me ra kauta cake mai e na marau na kato ni veiyalayalati i Jiova, mai na vale i Opeti-itomi.

²⁶ Ia ni sa vukei ira na Livai na Kalou e na nodra colata na kato ni veiyalayalati i Jiova era sa vakacabora kina na pulumokau e vitu, kei na sipi tagane e vitu.

²⁷ A sa vakaisulu ko Tevita e nai sulu lineni matailalai, kei ira kece talega na Livai era sa colata na kato, kei ira na dau-ni-sere, kei Kinanaia na domo-ni-sere, kei ira na dau-ni-sere: a sa vakaefoti lineni ko Tevita.

²⁸ A ra sa kauta mai na kato ni veiyalayalati i Jiova ko ira kece na Isireli e na kaikaila, kei na domo ni koneti kei na davui, kei na sibali kei na soliteri, kei na api.

²⁹ Ia ni sa yaco na kato ni veiyalayalati i Jiova ki na koro i Tevita, sa vakararai tiko mai na katuba e cake ko Maikali na luve i Saula ka yalewa, a sa kunei Tevita ni sa meke ka qiriqiri tiko; a sa beci koya e na yalona.