1 Veigauna 14 - Vakavakadewa Makawa

Sa tara na vale i Tevita; a yacadra na luvena, 1-7. Sa vala vakarua ko Tevita kei ira na kai Filisitia, 8-17.

¹ Sa qai vakatadu mata ko Airami na tui Taia kivei Tevita, ka vakauta eso na kau sitari, ka so na matai ni vatu ka so na matai ni kau, me ra tara e dua na nona vale.

² A sa kunea ko Tevita ni sa vakataudeitaki koya ko Jiova me nodra tui na Isireli, ni sa vakalevutaka na nona matanitu, e na vukudra na nona tamata na Isireli.

³ A sa vakawati kei ira eso tale na yalewa ko Tevita mai Jerusalemi: ka sa vakatubura ko Tevita eso tale na luvena tagane kei na luvena yalewa.

⁴ Ia oqo na yacadra na luvena era sa sucu mai Jerusalemi: ko Samua, kei Sopapi, ko Necani, kei Solomoni;

⁵ kei Ipaiari, kei Ilisua, kei Ilifeleti;

⁶ kei Noka, kei Nefeki, kei Jafia;

⁷ kei Ilisama, kei Pelaiata, kei Ilifeleti.

⁸ Ia ni ra sa rogoca ko ira na kai Filisitia ni sa lumuti ko Tevita me nodra tui kecega na Isireli, era sa lako cake na kai Filisitia kece me ra sagai Tevita. A sa rogoca ko Tevita, a sa curu yani me vala kei ira.

⁹ A ra sa lako mai ko ira na kai Filisitia, ka sa mai yatuni ira e na buca ko Refeimi.

¹⁰ A sa taroga na Kalou ko Tevita, ka kaya, Me'u lako yani ka vala kei ira na kai Filisitia, se me'u kakua? ia ko ni na soli ira mai ki na ligaqu, se segai? A sa kaya vua ko Jiova, Mo lako yani; ia ka'u na soli ira ki na ligamu.

¹¹ A ra sa lako yani ki Peali-pirasimi, a sa mokuti ira maikea ko Tevita. Sa qai kaya ko Tevita, Sa gumatua vei ira na noqu meca e na ligaqu na Kalou, me vaka na kaukauwa ni veiwai; ka ra sa vakayacana na vanua ko ya ko Peali-pirasimi.

¹² A ra sa biuta tani na nodra kalou e na yasana ko ya, ka sa vakarota ko Tevita, a ra sa vakamai e na bukawaqa.

¹³ A ra sa mai tiko vakaivalu tale ko ira na kai Filisitia e na buca.

¹⁴ A sa taroga tale kina vua na Kalou ko Tevita; a sa kaya vua ko koya na Kalou, Mo kakua ni lako mo muri ira; mo gole tani vei ira, ka sikiti ira ni dou sa donuya na veikau oqori:

¹⁵ ia ena vaka ga oqo, ni ko sa rogoca e dua na rorogo ni lakolako e na tuvuka ni veikau oqori, mo qai lako yani mo dou vala, ni sa liutaki iko yani ko koya na Kalou me mokuti ira na nodra mataivalu na kai Filisitia.

¹⁶ A sa kitaka ko Tevita me vaka na vosa ni Kalou kivei koya: a ra sa mokuta na nodra mataivalu na kai Filisitia mai Kipioni ka yaco ki Keseri.

¹⁷ A sa kuruvaki yani nai rogorogo kei Tevita ki na veivanua kecega; a sa vakavuna ko Jiova na nodra rerevaki Tevita ko ira na veimatanitu kecega.