1 Veigauna 13 - Vakavakadewa Makawa

Sa kauta na kato ko Tevita mai Kiriaci-jiarimi; a sa kauta ki na vale i Opeti-itomi.

¹ A sa bose vata ko Tevita kei ira sa turaga ni yayaudolu kei na yayadrau, kei ira kece era sa dauliu.

² A sa kaya ko Tevita vei ira na nodra i soqosoqo taucoko na Isireli, Kevaka sa vinaka kivei kemuni, ka sa vuna ko Jiova na noda Kalou, me da vakatadu mata vei ira na wekada e na veiyasana kecega, ko ira sa vo e na vanua kece nei Isireli, kivei ira talega na bete kei ira na Livai era sa tiko e na veikoro sa vakavanua veico ka volita, me ra soqoni ira vata mai kivei keda:

³ ia me da kauta tale mai kivei keda na kato ni veiyalayalati ni noda Kalou: ni da sa sega ni taroga kina e na gauna i Saula.

⁴ A ra sa kaya ko ira nai soqosoqo taucoko ni ra na kitaka vakakina: ni sa dodonu na ka oqo vei ira kecega na tamata.

⁵ A sa vakasoqoni ira kece vata na Isireli ko Tevita, mai Siori mai Ijipita, ka yaco ki nai curucuru ki Emaci, me ra kauta mai na kato ni Kalou mai Kiriaci-jiarimi.

⁶ A sa lako cake ko Tevita, kei ira kecega na Isireli, ki Peala, io ki Kiriaci-jiarimi, mai Juta, me kauta cake maikina na kato ni Kalou ko Jiova, o koya sa tiko e na kedrau maliwa na jerupi, o koya sa cavu kina na Yacana.

⁷ A ra sa vakavodoka na kato ni Kalou ki na dua na qiqi-ni-yaya vou, mai na vale i Epinatapi, a rau sa tubera na qiqi ni yaya ko Usa kei Eiio.

⁸ A sa qiriqiri vagumatua ko Tevita kei ira kece na Isireli, e na mata ni Kalou, e na api, kei na soliteri, kei na tibereli, kei na sibali, kei na davui kaukamea kei na sere.

⁹ Ia ni ra sa yaco ki na rara ni buturaki sila ka nei Kitioni, sa dodoka yani na ligana ko Usa me taura na kato, ni sa tarabe na pulumokau.

¹⁰ A sa tubu mai na cudru i Jiova vei Usa, a sa vakamatei koya, ni sa tara na kato e na ligana: a sa mate maikea e na mata ni Kalou.

¹¹ A sa rarawa na loma i Tevita ni sa vakamatei Usa ko Jiova; a sa vakayacana na yasana ko ya ko Peresi-usa, ka yacova na siga oqo.

¹² A sa rerevaka na Kalou ko Tevita e na siga ko ya, a sa kaya, Au na kauta mai vei au vakaevei na kato ni Kalou?

¹³ A sa sega kina ni kauta kivei koya na kato ko Tevita, ki na koro i Tevita, ia sa kauta vakatikitiki tani ga ki na vale i Opeti-itomi na kai Kaca.

¹⁴ A sa tiko kei Opeti-itomi kei na nona vuvale na kato ni Kalou, ka vula tolu e na nona vale. Ka sa vakalougatataki ira e na vale i Opeti-itomi ko Jiova, kei na nona ka kecega.