1 Veigauna 11 - Vakavakadewa Makawa

Sa buli ko Tevita mai Epironi me tui Isireli, 1-9. O ira na tamata qaqa i Tevita, 10-47.

¹ Era sa qai vakasoqoni vata ko ira kecega na Isireli kivei Tevita ki Epironi, a ra sa kaya, Raica, koi keitou oqo na suimuni kei na lewemuni;

² ia na gauna sa oti yani, ni sa tui tiko ko Saula, sai kemuni ga sa dauliutaki ira na Isireli, e na nodra curu yani kei na nodra curu tale mai: a sa kaya vei kemuni ko Jiova na nomuni Kalou, O iko, ko na vakani ira na noqu tamata na Isireli, ia ko na lewai ira na noqu tamata na Isireli.

³ A sa lako mai ko ira kecega na qase ni Isireli kivei koya na tui ki Epironi; ka sa ia na veiyalayalati kei ira ko Tevita mai Epironi, e na mata i Jiova; a ra sa lumuti Tevita me nodra tui na Isireli, me vaka na vosa i Jiova e na gusu i Samuela.

⁴ A sa lako ko Tevita kei ira kecekece na Isireli ki Jerusalemi, (ko ya ko Jepusa): a ra sa tiko kina na Jepusaiti, ko ira nai taukei ni vanua.

⁵ A ra sa kaya vei Tevita ko ira nai taukei mai Jepusa, E tabu sara mo lako mai ki ke. Ia sa rawa ko Tevita na koro ni valu ko Saioni, o koya na koro i Tevita.

⁶ A sa kaya ko Tevita, O koya sa na mokuti ira taumada na Jepusaiti, ena liu ga ko koya ka na kapiteni ni valu. A sa cabe taumada ko Joapi na luve i Seruaia, ka sa lesi kina me turaga ni valu.

⁷ A sa tiko ga ko Tevita e na koro ni valu; a ra sa vakatoka kina me koro i Tevita.

⁸ A sa tara tale ko koya na koro e na veiyasana, sa vakatekivu mai Milo ka vakavolivolita; ia na yasana ka vo e na koro sa vakavinakataka ko Joapi.

⁹ A sa tubu tikoga me levu cake mai ko Tevita: ka ni sa tiko vata kaya ko Jiova ni lewe vuqa.

¹⁰ Ia ko ira oqo era sa liu vei ira na tamata qaqa i Tevita, era a totaki koya e na nona matanitu, kei ira kece na Isireli, me buli koya me tui, me vaka na vosa i Jiova e na vuku i Isireli.

¹¹ Ia oqo na kedrai wiliwili na tagane qaqa i Tevita: ko Jasopiami na luve i Akimoni sa liu vei ira na kapiteni ni valu: sa laveta na nona moto vei ira na tamata e le tolu na drau, a sa vakamatei ira kece e na dua ga na siga.

¹² A sa taravi koya ko Eliesa na luve i Toto, na luve i Eoa, e dua vei iratou na lewe tolu eratou qaqa sara.

¹³ Sa tiko vata kei Tevita ko koya oqo mai Pasitamimi, a ra sa soqoni vata maikea na kai Filisitia me ia nai valu, a sa dua kina na loga ni parile; a sa dro ko ira na tamata e matadra na kai Filisitia.

¹⁴ A ra sa la'ki tu e loma ni were ko ya, a ra sa vakabula, a ra sa mokuti ira na kai Filisitia; ka sa cakava vei ira ko Jiova na veivakabulai levu.

¹⁵ A sa lako sobu e lewe tolu vei ira na lewe tolusagavulu na turaga ni valu kivei Tevita ki na uluvatu, ki na qara vata mai Etulama, a sa tiko na nodra mataivalu na kai Filisitia mai na buca ko Refeimi.

¹⁶ A sa tiko ko Tevita e na koro ni drodro e na veisiga ko ya; ka sa tiko mai Pecileema e na gauna ko ya na nodra i valu na kai Filisitia.

¹⁷ A sa mate e na viagunu ko Tevita, ka kaya, Ke sa dua mada me vagunuvi au e na wai mai na mata-ni-wai mai Pecileema, ka tu mai na matamata-ni-koro!

¹⁸ A ratou sa biliraka tani na nodra mataivalu na kai Filisitia ko iratou na lewe tolu oqo, ka takiva na wai mai na mata-ni-wai mai Pecileema, ka tu mai na matamata-ni-koro, a ratou sa takiva, ka kauta vei Tevita: ia sa bese ni gunuva ko Tevita, sa sova ga vei Jiova,

¹⁹ a sa kaya, Me tabu sara vei au kemuni na noqu Kalou, me'u kitaka na ka oqo: au na gunuva li na kedratou dra na tamata eratou a douvaka na mate? ni ratou a bolea na mate ni ratou a kauta mai: ka sa bese ni gunuva ko koya. A veika oqo eratou sa cakava na lewe tolu sa tamata qaqa sara.

²⁰ A sa liu vei iratou na lewe tolu ko Apisai na taci i Joapi: a sa laveta na nona moto vei ira na tamata e le tolu na drau, ka sa vakamatei ira: ka sa tamata rogo vei iratou na lewe tolu.

²¹ Eratou sa lewe tolu, a sa uasivi cake ko koya vei rau na lewe rua: ni sa nodrau turaga ko koya; ia sa sega ni tautauvata kei iratou na lewe tolu sa liu.

²² Ko Pinaia na luve i Jioiata ka tagane, a luve ni dua na tamata qaqa mai Kapisieli ka cakava na ka levu eliu; sa mokuta ko koya e le rua na tamata erau a vaka na laioni, erau kai Moapi: sa lako sobu talega ko koya ka mokuta e dua na laioni e na dua nai keli, e na gauna ni uca-vulavula:

²³ sa mokuta talega e dua na kai Ijipita, a tamata yagolevu, sa lima na kiupiti na kena balavu; a sa taura e ligana na kai Ijipita na moto sa vaka na kau ni tamata dautalitali; a sa lako sobu vua ko koya ka sa taura ga nai titoko, ka sa kaliraka na moto mai na liga ni kai Ijipita, ka qai vakamatei koya kina.

²⁴ A veika oqo sa cakava ko Pinaia na luve i Jioiata, a sa rogo vata ko koya kei iratou na lewe tolu na tamata qaqa.

²⁵ Raica, sa dokai vakalevu vata kei ira na lewe tolusagavulu, ia sa sega ni tautauvata kei iratou na lewe tolu sa liu. A sa lesi koya ko Tevita me turaga ni mataivalu sa dauvakatawai koya tiko na tui.

²⁶ Ko ira talega na tamata qaqa e na mataivalu; ko Asaeli na taci i Joapi, ko Elanani na tagane na luve i Toto mai Pecileema,

²⁷ ko Samoci na kai Eroti, ko Elesi na kai Piloni,

²⁸ ko iratou ka tagane na luve i Ikesi na kai Tikoa, ko Epieseri na kai Anacoci,

²⁹ ko Sipikei na luve i Usa, ko Ilai na luve i Eoi,

³⁰ ko Meerei na kai Nitofa, ko Elepi na tagane, ka luve i Peana na kai Nitofa,

³¹ ko Itei na tagane, ka luve i Ripei mai Kipea sa nodra na luve i Penijamini, ko Pinaia na kai Piraconi,

³² ko Urei mai na veiuciwai mai Keasi, ko Epieli na kai Arapa,

³³ ko Asimavece na kai Peurimi, ko Elaiapa na kai Seelipimi,

³⁴ ko iratou na luve i Jaseni na kai Kiso, ko Jonacani na tagane na luve i Sake, na Araraiti,

³⁵ ko Eiami na tagane na luve i Sakari, na Araraiti, ko Ilifali na luve i Uri ka tagane,

³⁶ ko Eferi na kai Mikera, ko Eaija na kai Piloni,

³⁷ ko Esirei na kai Kameli, ko Neeri na luve i Esipei ka tagane,

³⁸ ko Joeli na taci i Necani, ko Mipari maivei ira na Akiri ka tagane;

³⁹ ko Seleki na luve i Amoni, ko Neeri na kai Pieroci, ko koya sa daucolata nai yaragi i Joapi, na luve i Seruaia ka tagane,

⁴⁰ ko Ira na luve i Jeceri, ko Karepi na luve i Jeceri,

⁴¹ ko Uraia na Itaiti, ko Sapati na luve i Alai ka tagane,

⁴² ko Etini na luve i Sisa ka tagane, maivei ira na Rupeni, a nodra turaga ni valu na Rupeni, ka le tolusagavulu vata kaya,

⁴³ ko Anani na luve i Meeka, ka tagane, kei Josafati na kai Micini,

⁴⁴ ko Usaia na kai Aseteroci, ko Sama, kei Jieli, erau tagane na luve i Ocami na kai Eroeri,

⁴⁵ ko Jitieeli na luve i Simiri ka tagane, kei Joa na tacina, na kai Tisi,

⁴⁶ ko Ilieli na kai Meevimi, kei Jiripei, kei Josavaia, eratou tagane ka luve i Elineami, kei Icama na kai Moapi,

⁴⁷ ko Ilieli, kei Opeti, kei Jeesieli na kai Misopaia.