1 Tui 4 - Vakavakadewa Makawa

O iratou na nona tamata turaga ko Solomoni, 1-6. O ira ka vakarau kakana, 7-19. Na kena levu ni nona matanitu, 20-28. Na nona vuku, 29-34.

¹ A sa tui vei ira kecega na Isireli ko Solomoni.

² Ia ko iratou oqo na nona tamata turaga: Ko Asaraia na luve i Setoki na bete;

³ na luve i Sisa, ko Iliorefi kei Eaia, oi rau na vunivola; ko Jiosafati na luve i Eiiluti, sa dauvola na ka ni matanitu.

⁴ A sa turaga vei ira nai valu ko Pinaia, na luve i Jioiata; a rau sa bete ko Setoki kei Epaiaca:

⁵ a sa lewai ira na turaga lalai ko Asaraia na luve i Necani; a sa turaga levu cake na luve i Necani ko Saputi, na nonai tau na tui:

⁶ a sa lewai ira na lewe-ni-vale ko Eiisaari; a sa lewa nai vakacavacava ko Etonirami na luve i Apita.

⁷ A sa le tinikarua na nona tamata turaga ko Solomoni era sa lewai ira kecega na Isireli, era sa lewa na kena kau mai na kedra na tui kei ira na nona lewe-ni-vale: era sa dui vakarautaka e na veiyabaki na tamata yadua e nona vula.

⁸ Ia oqo na yacadra: Na luve i Uri, mai na ulu-ni-vanua ko Ifireimi:

⁹ na luve i Tekeri, mai Makasi, kei Seelipimi, kei Peci-semesi, kei Eloni-peci-anani:

¹⁰ na luve i Eseti, mai Erupoci; a sa nona talega ko Soko, kei na vanua taucoko ko Eferi:

¹¹ na luve i Epinatapi, e na yasana kecega mai Doa; o koya erau vakawati kei Tafaci na luve i Solomoni:

¹² ko Peana luve i Eiiluti; a sa nona ko Teenaki, kei Mekito, kei Peci-siani taucoko, mai Saricani e ruku i Jesirieli, mai Peci-siani, ka yaco ki Epeli-meola, ka sivi Jokiniami:

¹³ na luve i Kiperi, mai Remoci-kiliati; a sa nona na veikoro i Jairi, na luve i Manasa, sa tiko mai Kiliati; sa nona na vanua ko Arikopi, mai Pasani, e onosagavulu na koro lelevu sa vakabai ka vakaisamugakagaka parasa:

¹⁴ ko Eiinatapi na luve i Ito, e Meeneimi:

¹⁵ ko Eiimaasi mai Nafitalai; a sa vakawati kei Pasemaca na luve i Solomoni ka goneyalewa:

¹⁶ ko Peana na luve i Usai, mai Aseri kei Aloci:

¹⁷ ko Jiosafati na luve i Parua, mai Isakari:

¹⁸ ko Semeai na luve i Ela, mai Penijamini:

¹⁹ ko Kiperi na luve i Uri, mai na vanua ko Kiliati, e na vanua i Sioni na nodra tui na Amoraiti, kei Oki talega na tui Pasani: a sa turaga duaduaga ko koya e na vanua ko ya.

²⁰ Sa ra lewe vuqa ko ira na Juta kei ira na Isireli, me vaka na nuku mai matasawa na kedrai wiliwili, era sa kana, ka gunu, ka marau tiko.

²¹ A sa lewai ira na veimatanitu kecega ko Solomoni mai na Uciwai ka yaco ki na nodra vanua na kai Filisitia, ka yaco ki nai yalayala kei Ijipita: era sa kauta mai na ka ni loloma, ka ra qaravi Solomoni e na veisiga kecega ka bula kina ko koya.

²² Ia na kakana sa caka vei Solomoni e na dua na siga, sa rua na drau ka vasagavulu na puseli madrai droka vinaka, ka va na drau ka walusagavulu na puseli madrai droka walega;

²³ e tini na pulumokau sa yago vinaka, ka ruasagavulu na pulumokau mai na vanua veico, ka dua na drau na sipi, ka so na ati, kei na kaseli, kei na ropuki, kei na toa uro eso.

²⁴ Ni sa lewa ko koya na vanua kecega e na yasa ni Uciwai oqo, mai Tifisa ka yaco ki Kesa, vei ira talega na tui kece e na kena yasa ni Uciwai oqo; a sa tiko veisaututaki kei ira kecega era sa vakavolivoliti koya.

²⁵ A sa tiko vakavinaka e na gauna kece i Solomoni ko ira na Juta kei ira na Isireli, na tamata yadua e ruku ni nona vaini, kei na ruku ni nona lolo, mai Tani ka yacovi Pieri-sepa.

²⁶ A sa va na oba nai tutu ni ose ni nona qiqi-ni-valu ko Solomoni, ka le tinikarua na udolu na nona tamata dauvodo ose.

²⁷ Ia sa vakarautaka ko ira na turaga oqori na kena na tui ko Solomoni, kei na kedra kecega era kana e na tepeli i Solomoni na tui, na tamata yadua e nona vula: sa sega ni yali vei ira e dua na ka:

²⁸ na parile talega kei na tolo ni sila me kedra na ose kei na manumanu totolo, era sa daukauta ki na tikina sa lesia kina, na tamata yadua me vaka na nonai tavi.

²⁹ A sa solia vei Solomoni na Kalou na vuku kei na loma sa daukila rawa na ka levu sara, kei na daulomasoli, me vaka na nuku mai matasawa.

³⁰ Ia na vuku i Solomoni, sa uasivi e na nodra vuku kecega na kai na tu-i-cake, kei na vuku kecega ni kai Ijipita:

³¹ ni sa vuku cake vei ira kecega na tamata ko koya; sa sivi, Icani na Eseraaiti, kei Imani, kei Kalikoli, kei Tarita, eratou kai Maoli: a sa rogo ko koya ki na veimatanitu kecega sa vakavolivolita.

³² A sa cavuta ko koya e tolu na udolu na vosa vakaibalebale; a sa dua na udolu ka lima na nona sere.

³³ A sa vakamacalataka na kau ko koya, sa tekivu mai na sitari mai Lepanoni ka yacova na isopi sa tubu mai na dela ni bai: a sa tukuni ira talega na manumanu e yavai va, kei na manumanu vuka, kei na ka sa qasi voli, kei na ika.

³⁴ A sa lako mai na tamata mai na veimatanitu kecega me ra rogoca na vuku i Solomoni, eso maivei ira na tui kecega e vuravura ka rogo kina na nona vuku.