1 Tui 3 - Vakavakadewa Makawa

Sa vakawati ko Solomoni kei na luve i Fero, a sa vakacaboi soro e na veitikina cecere, 1-4. Sa kerea ko Solomoni me nona na vuku, a sa solia ko koya na Kalou, ka sa solia vata kei nai yau kei na vakarokoroko, 5-15. Sa rairai na nona vuku e na veilewai, 16-28.

¹ A sa ia ko Solomoni me vakaveiwekani kei Fero na tui Ijipita, ka kauta na luvena yalewa ko Fero, ka kauti koya ki na koro i Tevita, ka me tara oti mada eliu na nona vale, kei na vale i Jiova, kei na bai me vakavolivoliti Jerusalemi.

² A ra sa vakacaboi soro tiko ko ira na tamata e na veitikina cecere ga, ni sa sega ni tara oti tu e dua na vale ki na yaca i Jiova, ka yacova na veisiga oqori.

³ A sa lomani Jiova ko Solomoni, ka sa muria tiko na vunau i Tevita na tamana: ia sa vakacaboi soro tiko, ka vakama na ka boi vinaka, e na veitikina cecere.

⁴ A sa lako na tui ki Kipioni me vakacabora kina nai soro; ni sa rogo levu na tikina cecere ko ya: sa vakacabora ko Solomoni e dua na udolu nai soro kama e nai cabocabo-ni-soro ko ya.

⁵ Sa rairai vei Solomoni ko Jiova mai Kipioni e na tadra e na bogi: a sa kaya na Kalou, Mo kerea mada na ka me'u solia vei iko.

⁶ A sa kaya ko Solomoni, O ni sa cakava vakalevu na loloma vua na nomuni tamata ko Tevita na tamaqu, me vaka sa lako ko koya e matamuni e na yalodina, kei nai valavala dodonu, kei na yalododonu vei kemuni; ia ko ni a cakava vua na loloma levu oqo, ni kemuni sa solia vua e dua na luvena, me tiko e nonai tikotiko vakaturaga, me vaka edaidai oqo.

⁷ Ia oqo, Kemuni Jiova na noqu Kalou, o ni sa lesi au na nomuni tamata me'u tui, mei sosomi kei Tevita na tamaqu: ia koi au, ka'u sa gone lailai: au sa sega ni kila me'u curu yani se curu mai.

⁸ A sa tiko na nomuni tamata e na kedra maliwa na nomuni tamata, o ira ko ni a digitaka, na lewe vuqa, era sega ni wili se tukuni rawa.

⁹ Ia mo ni solia vei au na nomuni tamata na yalo sa vuku, me'u lewai ira rawa kina na nomuni tamata, me'u kila na ka vinaka kei na ka ca; ia ko cei sa rawata me lewai ira na nomuni tamata oqo era lewe vuqa?

¹⁰ A sa vinaka vua na Turaga na vosa ko ya, ni sa kerea na ka oqo ko Solomoni.

¹¹ A sa kaya vua na Kalou, Ni ko a kerea na ka oqo, ka sega ni kerea me nomu na bula dede; ka sega ni kerea me nomu nai yau, ka sega ni kerei ira na nomu meca me ra mate; ia ko sa kerea ga me nomu na vuku, mo kila kina na lewa dodonu;

¹² raica, ka'u sa cakava me vaka na nomu vosa: raica, ka'u sa solia vei iko na yalo sa vuku ka daukila rawa na ka; sa sega kina e dua eliu me tautauvata kei iko, ena sega talega ni tubu e dua emuri me vakataki iko.

¹³ Ia ka'u sa solia talega vei iko na ka ko a sega ni kerea, nai yau, ka mo dokai: me kakua ni dua vei ira na tui me tautauvata kei iko e na nomu gauna taucoko.

¹⁴ Ia kevaka ko na lako e na noqu sala, mo vakabauta na noqu vunau, kei na noqu i vakaro, me vaka ka cakava na tamamu ko Tevita, ka'u na qai vakadedetaka na nomu bula.

¹⁵ A sa yadra ko Solomoni; ka raica, sa tadra ga. A sa lako ki Jerusalemi, ka tu e na mata ni kato ni veiyalayalati i Jiova, ka vakacabora eso nai soro kama, kei nai soro ni veivinakati, ka caka magiti vei ira kecega na nona tamata dauveiqaravi.

¹⁶ Sa qai lako mai vua na tui e le rua na yalewa dautagane, a rau sa mai tu e matana.

¹⁷ A sa kaya e dua na yalewa, Kemuni na noqu turaga, keirau sa tiko kaya na yalewa oqo e na dua na vale; ia ka'u a vakasucu ni keirau a tiko kaya e na vale ko ya:

¹⁸ ia e na kenai katolu ni siga ni'u a vakasucu oti, sa qai vakasucu na yalewa talega oqo; ia keirau sa tiko tauruaga; sa sega e dua tale keitou sa tiko kaya e vale; koi keirau ruarua ga sa tiko e na vale ko ya:

¹⁹ a sa mate e na bogi na luvena na yalewa oqo, ni sa bika ko koya:

²⁰ a sa duri cake ko koya e na lomaloma-ni-bogi, ka kauta tani vei au na luvequ tagane, ni'u sa moce koto na nomuni vada, a sa vakotora e na lomaserena, ka vakotora na luvena sa mate ki na lomaserequ:

²¹ ia ni'u a duri cake e na mataka me'u vakasucuma na luvequ, raica, sa mate: ia ni'u a vakaraici koya e na mataka, raica, sa sega ni luvequ, o koya ka'u a vakasucuma.

²² A sa kaya na yalewa kadua, E segai; ni sa luvequ ko koya sa bula, ka sa luvemu ko koya sa mate. A sa kaya ko koya oqo, E segai; sa luvemu ga ko koya sa mate, ka sa luvequ ga ko koya sa bula. A rau sa vosa vakaoqo e na mata ni tui.

²³ A sa kaya na tui, Sa kaya e dua, A luvequ oqo ko koya sa bula, ka sa luvemu ko koya sa mate: a sa kaya nai karua, E segai; sa luvemu ga ko koya sa mate, ka sa luvequ ko koya sa bula.

²⁴ Sa qai kaya na tui, Dou kauta mai vei au e dua nai seleiwau. A ra sa kauta nai seleiwau ki vua na tui.

²⁵ A sa kaya na tui, Dou waseruataka na gone sa bula, ka solia e dua na kena wase vua e dua, vua talega na kenai karua na kena wase ka dua.

²⁶ A sa vosa vua na tui na tina ni gone sa bula, ni sa yavala na lomana vua na luvena, a sa kaya, Kemuni na noqu turaga, mo ni solia vei koya na gone sa bula; ni kakua sara ni vakamatea. Ia sa kaya na yalewa kadua, Me kakua ni noqu se nomu; me waseruataki ga.

²⁷ Sa qai kaya na tui, Dou solia vua na gone sa bula, ka kakua sara ni vakamatea: sa tinana ga ko koya.

²⁸ A ra sa rogoca ko ira kecega na Isireli na nona lewa ko koya na tui: a ra sa rerevaka na tui; ni ra sa kunea sa tu vua na vuku ni Kalou, me ia kina na veilewai.