1 Tui 22 - Vakavakadewa Makawa

Sa to vata ko Jiosafati na tui Juta kei Eapi, ka veivala kei ira na kai Siria, ka mate ko Eapi, 1-40. Sa tui Juta ko Jiosafati, 41-50, Sa tui Isireli ko Easaia, 51-53.

¹ Sa yabaki tolu ka sega ni vala ko ira na kai Siria kei ira na Isireli.

² Ia e na kenai katolu ni yabaki, sa lako sobu ko Jiosafati na tui Juta vei koya na tui Isireli.

³ A sa kaya vei ira na nona tamata ko tui Isireli, Dou sa kila beka ni sa noda ko Remoci mai Kiliati? ia eda sa tiko wele ga, ka sega ni taura maivei koya na tui Siria.

⁴ A sa kaya ko koya vei Jiosafati, O na lako vata kei au ki Remoci mai Kiliati me ia nai valu, se segai? A sa kaya vua na tui Isireli ko Jiosafati, Koi kedaru vata ga; sa dua vata ga ko ira na nodaru tamata; sa dua vata talega na nodaru ose.

⁵ A sa kaya vua na tui Isireli ko Jiosafati, Mo taroga mada na vosa i Jiova edaidai.

⁶ A sa vakasoqoni ira vata na parofita ko koya na tui Isireli, e le va beka na drau na tamata, ka sa kaya vei ira, Me'u lako ki Remoci mai Kiliati me'u ia kina nai valu, se me'u kakua? A ra sa kaya, Mo ni lako cake, ia ena solia ko koya na Turaga ki na ligamuni na tui.

⁷ A sa kaya ko Jiosafati, Sa sega talega ni tiko eke e dua na parofita i Jiova, me daru taroga vua?

⁸ A sa kaya vei Jiosafati ko koya na tui Isireli, Sa dua tale na tamata eke, ko Maikaia na luve i Imila, edaru tarogi Jiova rawa kina: ia ka'u sa cati koya; ni sa sega ni parofisaitaka na ka vinaka e na vukuqu, na ka ca ga. A sa kaya ko Jiosafati, Me kakua ni kaya vaka ko ya na tui.

⁹ Sa qai kaciva e dua na turaga ko koya na tui Isireli, ka kaya, Mo vakusarawataki Maikaia mai ko koya na luve i Imila.

¹⁰ A rau sa dui tiko e nonai tikotiko vakaturaga, na tui Isireli kei Jiosafati na tui Juta, e na rara mai na matamata-ni-koro ni Samaria, a rau sa vakaisulu e nai sulu vakatui; a ra sa parofisai tiko e matadrau ko ira kecega na parofita.

¹¹ A sa cakava ko Setekaia na luve i Kinana eso nai leu vakamanumanu e na aironi; a sa kaya, Sa vosa vakaoqo ko Jiova, O ni na cumuti ira na kai Siria e na ka oqo, ka me ra oti sara.

¹² A ra sa parofisai vakakina ko ira na parofita kecega, ka kaya, Mo ni lako cake ki Remoci mai Kiliati, ka mo ni gumatua, ia ena solia ko Jiova ki na ligamuni na tui.

¹³ Ia sa vosa vei Maikaia ko koya nai talaki ka la'ki kaciva, ka kaya, Raica, sa dua vata ga na nodra vosa na parofita, ni ra vosataka na ka vinaka vua na tui: me tautauvata mada na nomu vosa kei na nona vosa e dua vei ira, ka mo cavuta ga na ka vinaka.

¹⁴ A sa kaya ko Maikaia, Me vaka sa bula ko Jiova, na ka ga sa kaya vei au ko Jiova sai koya ga ka'u na vosataka.

¹⁵ A sa lako mai ko koya vua na tui. A sa kaya vua ko koya na tui, I Maikaia, me keimami lako ki Remoci mai Kiliati me vala, se me kakua? A sa kaya vua ko koya, Mo ni lako cake, ka mo ni gumatua; ia ena solia ko Jiova ki na ligamuni na tui.

¹⁶ A sa kaya vua ko koya na tui, Me'u vakabubuluitaki iko vakavica mada, mo tukuna vei au na vosa dina ga e na yaca i Jiova?

¹⁷ A sa kaya ko koya, Au a raici ira kecega na Isireli, ka ra veiseyaki e na veiulu-ni-vanua, me vaka na sipi sa sega na nodra i vakatawa: a sa kaya ko Jiova, Sa sega na nodra turaga ko ira oqo: me ra dui lesu e na vakacegu ki na nona vale.

¹⁸ A sa kaya vei Jiosafati na tui Isireli, Au a sega li ni kaya vei iko, ni na sega ni parofisaitaka ko koya na ka vinaka e na vukuqu, na ka ca ga?

¹⁹ A sa kaya ko koya, O koya oqo, mo rogoca kina na vosa i Jiova: Au a raici Jiova, ni sa tiko e nonai tikotiko vakaturaga, a ra sa tiko voleka vua e na nonai matau kei na nonai mawi ko ira kecega na lewe i lomalagi.

²⁰ A sa kaya ko Jiova, O cei ena temaki Eapi, me lako cake me bale mai Remoci mai Kiliati? A sa vosa vaka e dua, ka sa vosa vaka e dua tani.

²¹ A sa lako mai e dua na yalo, ka mai tu e na mata i Jiova, ka sa kaya, Oi au ga, ka'u na temaki koya. A sa kaya vua ko Jiova, E na cava?

²² A sa kaya ko koya, Au na lako yani, ia ka'u na dua na yalo lasulasu e na gusudra kecega na nona parofita. A sa kaya ko koya, ko na temaki koya, ka ko na gumatua talega: mo lako yani, ka kitaka vakakina.

²³ Ia oqo, sa vakacuruma ko Jiova na yalo lasulasu ki na gusudra kecega na nomu parofita oqo, a sa tukuna ko Jiova, ni sa yacovi kemuni na ka ca.

²⁴ Ia sa toro voleka ko Setekaia na luve i Kinana, ka sabici Maikaia e baluna, a sa kaya, A sala cava ka lako tani kina vei au na Yalo i Jiova me vosa vei iko?

²⁵ A sa kaya ko Maikaia, Raica, ko na kunea e na siga ko na curu kina ki loma ni loqi, mo vunitaki iko.

²⁶ A sa kaya na tui Isireli, mo kauti Maikaia, ka vakasuka kivei Emoni, na turaga ni koro, kei Joasi na luvena na tui,

²⁷ ka kaya, Sa kaya vakaoqo na tui, Drau vakacuruma na tamata la oqo ki na vale ni veivesu, ka vakani koya e na madrai ni veivakararawataki, kei na wai ni veivakararawataki, ka me'u tale vakacegu mada mai.

²⁸ A sa kaya ko Maikaia, Kevaka ko ni na lesu dina mai e na vakacegu, sa qai sega ni vosa e na gusuqu ko Jiova. A sa kaya, Mo ni rogoca kecega, oi kemuni na tamata.

²⁹ A rau sa lako cake ki Remoci mai Kiliati, na tui Isireli kei Jiosafati na tui Juta.

³⁰ A sa kaya vei Jiosafati na tui Isireli, Au na liatamata tani koi au, ka lako ki nai valu; ia mo vakaisulutaki iko ga e na nomu i sulu vakatui. A sa liatamata tani na tui Isireli, ka lako ki nai valu.

³¹ Ia ko tui Siria, sa vakarota vei ira na turaga ni valu, era lewe tolusagavulu ka rua, era lewa na nona qiqi-ni-valu, ka kaya, Kakua ni veivala kaya e dua sa lailai, se dua sa levu, dou vala duaduaga kei na tui Isireli.

³² Ia ni ra sa raici Jiosafati ko ira na turaga ni qiqi-ni-valu, era sa kaya, O koya dina ga na tui Isireli. A ra sa lako vakatikitiki me vala kaya: a sa qoqolou ko Jiosafati.

³³ Ia ni ra sa raica ko ira na turaga ni qiqi-ni-valu ni sa sega ni koya na tui Isireli, era sa lesu tale me ra kakua ni muri koya tiko.

³⁴ A sa dua na tamata sa kaloca loa ga na dakai, ka vanai koya na tui Isireli e na tikina sa veiuturi kina na nonai sulu ni valu: a sa kaya ko koya vua sa vakacici ose ni nona qiqi-ni-valu, Daru lesu mada, ka mo kauti au tani mai nai valu, ni'u sa vuetaki vakaca.

³⁵ A sa levu cake tiko nai valu e na siga ko ya: a ra sa tokona tiko na tui e na nona qiqi-ni-valu, e matadra na kai Siria, a sa mate e na yakavi: a sa dave na dra mai na vue ki na loma ni qiqi-ni-valu.

³⁶ A sa kacivaki voli vei ira nai valu, ni sa vakarau dromu na mata-ni-siga, ka vaka, Ni suka na tamata yadua ki na nona koro, kei na tamata yadua ki na nona vanua.

³⁷ A sa mate na tui, ka sa kau ki Samaria; a sa bulu mai Samaria ko koya na tui.

³⁸ Ia ni sa savui tiko na qiqi-ni-valu mai na mata-ni-wai mai Samaria sa dausili kina ko ira na dautagane, sa dramica na nona dra ko ira na koli, me vaka na vosa ka cavuta ko Jiova.

³⁹ Ia na kena vo ni cakacaka i Eapi, kei na ka kecega sa cakava ko koya, kei na vale tabua ka tara ko koya, kei na veikoro kecega ka tara ko koya, sa sega li ni volai e nai vola ni veika sa caka e na nodra gauna na tui Isireli?

⁴⁰ A sa moce vata kei ira na nona qase ko Eapi; a sa tui ko Esaia na luvena, me kenai sosomi.

⁴¹ Ia ko Jiosafati na luve i Esa, sa tekivu me lewa vei ira na Juta e na kenai kava ni yabaki i Eapi na tui Isireli.

⁴² Sa tolusagavulu ka lima na yabaki i Jiosafati ni sa tekivu na nona lewa: a sa lewa tiko mai Jerusalemi ka yabaki ruasagavulu ka lima. Ia na yaca i tinana ko Asupa, na luve i Sili.

⁴³ A sa muria nai valavala kecega i Esa na tamana; sa sega ni vuki tani maikina, ka sa cakava na ka e dodonu e na mata i Jiova: ia ka sa sega ni biu na veitikina cecere; era sa vakacaboi soro tiko ko ira na tamata, ka vakama na ka boi vinaka e na veitikina cecere.

⁴⁴ A rau sa veisaututaki ko Jiosafati kei na tui Isireli.

⁴⁵ Ia na kena vo ni cakacaka i Jiosafati, kei na nona qaqa sa cakacaka kina ko koya, kei na nonai valu, sa sega li ni volai e nai vola ni veika sa caka e na nodra gauna na tui Juta?

⁴⁶ Ia na kedra vo ni tamata sai valavala vaka-Sotoma, o ira ka vo mai na gauna i Esa na tamana, sa vakaotia ko koya mai na vanua.

⁴⁷ Ia sa sega e dua na tui mai Itomi: sa lesi ga e dua me tui vakatawa.

⁴⁸ Sa cakava eso na waqa ni Tasisi ko Jiosafati, me lako ki Oferi me usa koula mai: a ra sa sega ni lako; ni sa vorolaki na veiwaqa mai Esi-oni-keperi.

⁴⁹ Sa qai kaya kivei Jiosafati ko Easaia na luve i Eapi, Me ra lako vata ga ko ira na noqu tamata kei ira na nomu tamata e na waqa. A sa bese ko Jiosafati.

⁵⁰ A sa moce vata kei ira na nona qase ko Jiosafati, a sa bulu kei ira na nona qase e na koro i Tevita na nona qase: a sa tui ko Jiorami na luvena, me kenai sosomi.

⁵¹ E na kenai katinikavitu ni yabaki i Jiosafati na tui Juta, sa tekivu me lewa vei ira na Isireli mai Samaria ko Easaia na luve i Eapi, a sa lewa tiko vei ira na Isireli, ka yabaki rua.

⁵² A sa daucaka ca e na mata i Jiova, ka muria nai valavala i tamana, kei nai valavala i tinana, kei nai valavala i Jeropoami na luve i Nipati, o koya ka vakaivalavalacataki ira na Isireli:

⁵³ ni sa qaravi Peali ko koya, ka cuva vua, ka vakacudrui Jiova na nodra Kalou na Isireli, me vaka na ka kecega ka cakava ko tamana.