1 Tui 2 - Vakavakadewa Makawa

Sa tatau vei Solomoni ko Tevita, ka qai mate 1-11. Sa vakataudeitaki na matanitu i Solomoni, 12; a sa vakamatei ko Atonaija, 13-25. Sa vakasivoi ko Epaiaca, 26,27; a sa vakamatei ko Joapi, 28-35. Sa vakamatei ko Semeai, 36-46.

¹ A sa toro mai na siga me mate kina ko Tevita; a sa tatau vei Solomoni na luvena, ka kaya,

² Au sa lako e na sala era lako kina ko ira kecega na kai vuravura: mo kaukauwa ka mo tagane mada;

³ ka vakabauta na ka sa vakarota ko Jiova na nomu Kalou, mo lako e nona sala, mo vakabauta na ka e lesia ko koya, na ka e vunautaka, kei na ka e lewa ko koya, kei na ka e tukuna mai ko koya, me vaka sa volai e na vunau i Mosese, mo vinaka kina e na ka kecega ko na cakava, kei na ka kecega ko na goleva:

⁴ me vakataudeitaka kina ko Jiova na nona vosa ka vosataka vei au, ni sa kaya, Kevaka ena raica vinaka na nodra i valavala ko ira na luvemu, me ra lako e mataqu e na yalodina, e na lomadra taucoko, kei na vu ni yalodra taucoko, sa kaya ko koya, ena sega ni mudu vei iko na tamata e nai tikotiko vakaturaga ni Isireli.

⁵ Ia ko sa kila talega na ka ka kitaka vei au ko Joapi na luve i Seruaia, io, na ka ka kitaka vei rau na kapiteni ni valu ni Isireli, vei Apineri na luve i Neri, kei Amasa na luve i Jica, oi rau ka vakamatea ko koya, ka vakadave dra e na gauna ni sautu ni sa sega ni ia nai valu, ka boroya e na dra ni valu na nonai vau ni sulu sa vau kina na tolona, kei na nonai vava sa vakaivava kina.

⁶ Ia mo kitaka ga me vaka na nomu vuku, ka kua ni laiva na uluna sa sika me lako sobu e na vakacegu ki nai bulubulu.

⁷ Ia mo caka vinaka vei iratou na luve i Pasiliai na kai Kiliati, ka me ratou tiko kei ira era kana mai na nomu tepeli: ni ratou sa lako vakakina mai vei au ni'u a dro e na vuku i Apisalomi na tuakamu.

⁸ Ka raica, sa tiko vata kei iko ko Semeai na luve i Kira, na Penijamini na kai Peurimi, o koya ka rukaki au vakaca sara e na siga ka'u a lako kina ki Meeneimi: a sa lako sobu ko koya me tavaki au mai na Joritani, ia ka'u a bubului vua e na yaca i Jiova, ka kaya, Au na sega ni vakamatei iko e nai seleiwau.

⁹ Ia oqo, mo kakua ni vakadonui koya, ni ko sa tamata vuku ko iko, ka kila na ka mo cakava vua; ka mo vakayacora na uluna sa sika ki nai bulubulu ka ni sa vakamavoataki.

¹⁰ A sa moce vata kei ira na nona qase ko Tevita, a sa bulu e na koro i Tevita.

¹¹ Ia na gauna sa tui kina ko Tevita vei ira na Isireli e vasagavulu na yabaki: sa tui mai Epironi ka yabaki vitu, ka sa tui mai Jerusalemi ka yabaki tolusagavulu ka tolu.

¹² Sa qai tiko ko Solomoni e nai tikotiko vakaturaga nei Tevita na tamana; a sa vakataudeitaki sara na nona matanitu.

¹³ A sa lako ko Atonaija na luve i Akici kivei Paci-sepa na tina i Solomoni. A sa kaya ko koya, O sa lako vakavinaka mai, se segai? A sa kaya ko koya, Au sa lako vakavinaka mai.

¹⁴ Sa kaya talega ko koya, Sa dua na ka me'u vosa kina vei iko. A sa kaya ko koya, Mo vosa mai.

¹⁵ Sa qai kaya ko koya, Ko sa kila ni sa noqu eliu na matanitu, ka ni ra sa golevi au na Isireli kecega me'u tui: ia sa qai vuki ga na matanitu, ka sa yaco me nona na taciqu: ni sa nona ga maivei Jiova:

¹⁶ Ia oqo, sa dua bauga na ka ka'u sa kerea vei iko, mo kakua ni bureitaka vei au. A sa kaya vua ko koya, Mo tukuna mai.

¹⁷ A sa kaya ko koya, Mo vosa mada vei Solomoni na tui, (ni na sega ni bureitaka vei iko,) me soli Apisaki vei au, o koya na yalewa ni Sunemi, me watiqu.

¹⁸ A sa kaya ko Paci-sepa, Sa vinaka; au na vosa vua na tui e na vukumu.

¹⁹ A sa lako ko Paci-sepa vua na tui ko Solomoni, me vosa vua e na vuku i Atonaija. A sa tu cake na tui me la'ki tavaki koya, ka sa cuva vua, a sa tiko sobu e nonai tikotiko vakaturaga, ka sa vakatura e dua nai tikotiko me tiko kina na tinana na tui, sa qai tiko ko koya ki na ligana i matau.

²⁰ A sa kaya ko koya, Au sa kerea e dua na ka lailai vei iko; mo kakua ni bureitaka vei au. A sa kaya vua ko koya na tui, Mo kerea ga, na tinaqu; ni'u na sega ni bureitaka vei iko.

²¹ A sa kaya ko koya, Me soli ko Apisaki na yalewa ni Sunemi kivei Atonaija na tuakamu me watina.

²² A sa vosa na tui ko Solomoni, ka kaya vei tinana, Ia ka cava ko sa kerei Apisaki kina na yalewa ni Sunemi me nei Atonaija? mo kerea talega me nona na matanitu; ni sa tuakaqu ko koya; io, me nona, ka nei Epaiaca na bete, ka nei Joapi na luve i Seruaia.

²³ A sa bubului ko Solomoni na tui e na yaca i Jiova, ka kaya, Me cakacaka vakakina vei au na Kalou, ka vakaikuritaka, kevaka sa sega ni mate ko Atonaija, ni sa qai vosataka na vosa oqo:

²⁴ ia oqo, me vaka sa bula ko Jiova, o koya ka vakataudeitaki au, ka vakatikori au e nai tikotiko vakaturaga i Tevita na tamaqu, a sa solia vei au na kawa, me vaka ka yalataka ko koya, ena mate edaidai ko Atonaija.

²⁵ A sa talai Pinaia na luve i Jioiata ko Solomoni na tui; a sa mokuti koya mate ko koya.

²⁶ A sa kaya na tui vei Epaiaca na bete, Mo lako tani ki Anacoci, ki na nomu vanua; ni sa dodonu mo mate: ia ka'u na sega ni vakamatei iko edaidai, ni ko a kauta voli na kato ni Turaga ko Jiova e na mata i Tevita na tamaqu, ka ni ko a vakararawataki e na ka kecega ka vakararawataki kina ko tamaqu.

²⁷ A sa vakasevi Epaiaca ko Solomoni me kakua ni bete tiko vei Jiova; me vakayacori kina na vosa i Jiova, ka vosataka e na vuku ni mataqali i Ilai mai Sailo.

²⁸ A sa yaco vei Joapi na kenai tukutuku: ni sa vuki me muri Atonaija ko Joapi, ia sa sega ni vuki me muri Apisalomi. A sa dro ko Joapi ki na Vale tabu i Jiova, ka la'ki taura na tutuna sa balavu cake e nai cabocabo-ni-soro.

²⁹ A sa tukuni vei Solomoni na tui ni sa dro ko Joapi ki na Vale tabu i Jiova, ka raica, sa tiko mai nai cabocabo-ni-soro. A sa talai Pinaia na luve i Jioiata ko Solomoni, a sa kaya, Mo la'ki mokuti koya.

³⁰ A sa lako ki na Vale i Jiova ko Pinaia, ka kaya vua, Sa vosa vakaoqo na tui, Mo curu mai. A sa kaya ko koya, E segai; au na mate ga eke. A sa kauta tale na vosa vua na tui ko Pinaia, ka kaya, Sa kaya vaka ka vaka vei au ko Joapi.

³¹ A sa kaya vua ko koya na tui, Mo cakava me vaka ka kaya ko koya, ka mo mokuti koya, ka buluti koya; mo kauta tani kina vei au, kei na lewe-ni-vale i tamaqu, na dra sa sega ni cala sa vakadavea ko Joapi:

³² ia e na tauca ko Jiova ki na uluna na nona dra; ni sa mokuta ko koya e lewe rua na tamata, erau yalododonu ka vinaka, ka ca ko koya, ka vakamatei rau e nai seleiwau, ka sa sega ni kila ko Tevita, na tamaqu; io ko Apineri na luve i Neri, na kapiteni ni nodra i valu na Isireli, kei Amasa na luve i Jica, na kapiteni ni nodra i valu na Juta:

³³ Ia na kedrau dra e na baleti Joapi, kei na nona kawa ka tawa mudu: ia ena tiko na vakacegu maivei Jiova, vei Tevita, kei na nona kawa, kei na nona mataqali, kei na nonai tikotiko vakaturaga, ka sega ni mudu.

³⁴ A sa lako cake ko Pinaia na luve i Jioiata, ka mokuti koya mate; ka sa bulu ko koya e na nona vale mai veikau.

³⁵ A sa lesi Pinaia na luve i Jioiata ko koya na tui me kenai sosomi me lewai ira nai valu: a sa lesi Setoki na bete ko koya na tui mei sosomi kei Epaiaca.

³⁶ A sa talaki na tui me kacivi Semeai, a sa kaya vua, Mo tara e Jerusalemi e dua na nomu vale, ka mo tiko kina, kakua ni ko lako tani maikea ki na dua na vanua:

³⁷ ia ena yaco e na siga ko sa lako tani, ka qalo-kosova na uciwai ko Kitironi, mo kila macala ko na mate vakaidina: ena baleti iko ga na nomu mate.

³⁸ A sa kaya vua na tui ko Semeai, Sa vinaka na vosa oqori: koi au na nomuni tamata au na cakava me vaka sa kaya na noqu turaga na tui. A sa tiko vakadede mai Jerusalemi ko Semeai.

³⁹ Ia ni sa oti e tolu na yabaki, sa dro e le rua na nona tamata ko Semeai, vua na tui Kaca ko Akisi, na luve i Meeka. A sa tukuni vei Semeai, ka vaka, Raica, sa tiko mai Kaca na nomu tamata ruarua.

⁴⁰ A sa ia ko Semeai, ka vauca nai vodovodo ki na nona asa, ka lako ki Kaca kivei Akisi, me qarai rau na nona tamata: a sa lako ko Semeai, ka kauti rau na nona tamata mai Kaca.

⁴¹ A sa tukuni vei Solomoni ni sa lako ko Semeai mai Jerusalemi ki Kaca, ka sa tale mai.

⁴² A sa talaki na tui me kacivi Semeai, a sa kaya vua, Au a sega beka ni vakabubuluitaki iko e na yaca i Jiova, ka vakarota vei iko, ka kaya, Mo kila macala ni ko na mate vakaidina e na siga ko sa lako tani kina, ka lako yani ki na dua na vanua? Ia ko a kaya vei au, Sa vinaka na vosa ka'u sa rogoca:

⁴³ Ia ka cava ko sa sega ni vakabauta kina na bubului vei Jiova, kei nai vakaro ka'u a vakarota vei iko?

⁴⁴ Sa kaya talega vei Semeai ko koya na tui, O sa kila na ka ca kecega sa tu e lomamu, ko a kitaka vei Tevita na tamaqu: o koya ena sauma kina ko Jiova na nomu ca ki na ulumu;

⁴⁵ ia ena kalougata ko Solomoni na tui, ka na vakataudeitaki e na mata i Jiova nai tikotiko vakaturaga i Tevita, ka tawa mudu.

⁴⁶ A sa vakarota ko koya na tui vei Pinaia na luve i Jioiata; a sa curu yani ko koya, ka mokuti koya mate. A sa vakataudeitaki na matanitu e na liga i Solomoni.