1 Tui 19 - Vakavakadewa Makawa

Sa dro ko Ilaija, 1-8. Sa rairai vua mai Orepi ko Jiova, 9-18. Sa kacivi ko Ilaisa, 19-21.

¹ A sa tukuna vei Jesepeli ko Eapi na ka kecega ka cakava ko Ilaija, ka ni sa vakamatei ira kecega na parofita e nai seleiwau.

² A sa tala ko Jesepeli e dua na tamata kivei Ilaija, ka kaya, Me cakacaka vakakina vei au ko ira na kalou, ka vakaikuritaka, kevaka ka'u sa sega ni vakatautauvatataki iko kei na dua vei ira, e na gau-ni-siga vakaoqo e na mataka.

³ Ia ni sa rogoca ko koya, sa cavu tu, ka dro yani me bula, ka yaco ki Pieri-sepa, ka nei Juta, ka laiva maikea na nona cauravou.

⁴ A sa lako tu ko koya ka bogi dua e loma ni veikau, ia ni sa yaco kina sa la'ki tiko sobu e na dua na ruku ni junipa: a sa masu me mate yani ko koya; ka kaya, I Jiova sa rui levu; ni vakaotia ga na noqu bula; ni'u sa sega ni vinaka cake vei ira na noqu qase.

⁵ Ia ni sa davo koto ka moce e na dua na ruku ni junipa; raica, sa qai tarai koya e dua na agilose, ka kaya vua, Mo duri cake; mo kana.

⁶ A sa rai voli ko koya, ka raica, sa voleka ki na uluna e dua na keki sa tavu oti e na qilaiso, ka dua na saqa wai. A sa kana ko koya ka gunu, ka koto sobu tale.

⁷ A sa baci lako vakarua mai na agilose i Jiova, ka tarai koya, ka kaya, Mo duri cake; mo kana; ni sa rui balavu vei iko na sala.

⁸ A sa duri cake ko koya, ka kana ka gunu, ka lako e na kaukauwa ni kakana ko ya ka siga vasagavulu ka bogi vasagavulu, ki Orepi na ulu-ni-vanua ni Kalou.

⁹ A sa la'ki curuma e dua na qara vatu maikea, ka moce kina; ka raica, sa vosa vua ko Jiova, ka kaya vua, A cava ko sa tiko kina eke, Ilaija?

¹⁰ A sa kaya ko koya, Au a yalokatakata vakalevu e na vuku i Jiova na Kalou ni lewe vuqa: ni ra sa biuta na veiyalayalati kei kemuni ko ira na Isireli; era sa talaraka sobu na nomuni cabocabo-ni-soro, ka vakamatei ira na nomuni parofita e nai seleiwau; ia koi au, ka'u sa vo duaduaga; a ra sa segata tiko me ra vakamatei au.

¹¹ A sa kaya ko koya, Mo curu yani, ka la'ki tu e na dela ni ulu-ni-vanua e na mata i Jiova. Ka raica, sa lako voli ko Jiova, a sa dua na cagi levu ka kaukauwa sa sea na veiulu-ni-vanua, a sa vorolaka na veiuluvatu e na mata i Jiova; ia sa segai e na cagi ko Jiova: ni sa oti na cagi, sa qai tavuki na vanua; ia sa segai e na tavuki ni vanua ko Jiova;

¹² sa oti na tavuki ni vanua, sa qai dua na bukawaqa; ka sa segai e na bukawaqa ko Jiova; ia sa oti na bukawaqa, sa qai rogo mai e dua na domo lailai e vinaka:

¹³ ia ni sa rogoca ko Ilaija, sa puloutaka na matana e nonai tutuvi, ka curu yani, ka la'ki tu e na mata ni qara vatu: ka raica, sa rogo vua e dua na vosa, ka vaka, A cava ko sa tiko kina eke, Ilaija?

¹⁴ A sa kaya ko koya, Au a yalokatakata vakalevu e na vuku i Jiova na Kalou ni lewe vuqa: ni ra sa biuta na veiyalayalati kei kemuni ko ira na Isireli; era sa talaraka sobu na nomuni cabocabo-ni-soro, ka vakamatei ira na nomuni parofita e nai seleiwau; ia koi au, ka'u sa vo duaduaga; a ra sa segata tiko me ra vakamatei au.

¹⁵ A sa kaya vua ko Jiova, Mo lako; mo lesu tale e na nomu lako e loma ni veikau ki Tamasiko: ia ni ko sa yaco kina, mo lumuti Eseeli me tui Siria:

¹⁶ ka lumuti Jeu na luve i Nimesai me tui Isireli: ka lumuti Ilaisa na luve i Safati, na kai Epelimeola, me parofita me kemui sosomi.

¹⁷ Ia ko koya sa dro bula mai nai seleiwau i Eseeli, ena vakamatea ko Jeu: kei koya sa dro bula mai nai seleiwau i Jeu, ena vakamatea ko Ilaisa.

¹⁸ Ia ka'u sa maroroya me noqu e le vitu na udolu vei ira na Isireli, ko ira kecega sa sega ni tekiduru vei Peali, kei na gusudra kecega sa sega ni reguci koya.

¹⁹ A sa lako tani maikea ko koya, a sa kunei Ilaisa na luve i Safati, sa taura tiko nai sivi yara, era sa yarataka tiko e ruasagavulu ka va na pulumokau, era noka vata vakayayarua, ka sa lako vata ko koya kei rau na kenai murimuri: a sa lako yani vei koya ko Ilaija, ka biuta vua na nonai tutuvi.

²⁰ A sa biuta tu na pulumokau ko koya, ka cicimuri Ilaija, a sa kaya, Me'u reguca mada na tamaqu kei na tinaqu, ka'u na qai muri iko. A sa kaya vua ko koya, Mo lesu tale yani: a cava ka'u sa kitaka vei iko?

²¹ A sa lesu yani ko koya, ka kauta e rua na pulumokau, ka vakamatea, a sa vakasaqa na lewedrau e nai yaya ni pulumokau, ka solia vei ira na tamata, a ra sa kana. Sa qai cavu tu, ka la'ki muri Ilaija, ka qaravi koya.