1 Tui 18 - Vakavakadewa Makawa

Sa talai ko Ilaija me tukuna na uca, 1-6; a sa kauti koya ko Opetaia vei Eapi, 7-15. Sa moku ko ira na parofita i Peali, 17-40. Sa soli na uca e na masu i Ilaija, 41-46.

¹ Sa bogi vuqa, sa qai yaco mai na vosa i Jiova vei Ilaija e na kenai katolu ni yabaki, ka kaya, Mo lako, mo rairai mada vei Eapi; ia ka'u na vakatauca tale na uca ki vuravura.

² A sa lako ko Ilaija, me rairai vei Eapi. A sa ka levu na dausiga mai Samaria.

³ A sa kacivi Opetaia ko Eapi, o koya ka lewa na lewe ni vale: (ia sa rerevaki Jiova vakalevu ko Opetaia;

⁴ ka sa yaco eliu ni sa vakamatei ira tiko na parofita i Jiova ko Jesepeli, sa kauta e le dua na drau na parofita ko Opetaia, ka vunitaki ira vakayayalimasagavulu e na qara vatu, ka vakani ira e na madrai kei na wai.)

⁵ A sa kaya vei Opetaia ko Eapi, Mo lako voli e na vanua, ki na mata ni wai vure kecega, kei na uciwai kecega; de daru na kunea na co me vakabula na ose kei na meule, me kakua ni mate kece na noda manumanu.

⁶ A rau sa wasea rua na vanua, me rau dui lako voli kina: sa lako vakataki koya e na dua na sala ko Eapi, a sa lako vakataki koya e na dua na sala tani ko Opetaia.

⁷ Ia ni sa lako tu e na sala ko Opetaia, raica, sa tavaki koya ko Ilaija; a sa kilai koya, a sa cuva vakatoboicu, ka kaya, O iko beka na noqu turaga ko Ilaija?

⁸ A sa kaya vua, Koi au ga: ia mo la'ki kaya vua na nomu turaga, Raica, sa tiko ko Ilaija.

⁹ Sa qai kaya ko koya, A cava na noqu cala, ko sa via solia kina na nomu tamata ki na liga i Eapi, me vakamatei au?

¹⁰ Me vaka sa bula ko Jiova na nomu Kalou, sa sega e dua na vanua se matanitu sa sega ni talaki kina na noqu turaga me vakasaqarai iko: ia ni ra sa kaya, Sa yali; sa qai vakabubuluitaki ira ko koya na matanitu kei na vanua ko ya, ni ra sa sega ni kunei iko.

¹¹ Ia ko sa kaya oqo, Mo la'ki kaya vua na nomu turaga, Raica, sa tiko ko Ilaija.

¹² Ia ni'u sa lako tani vei iko, ena kauti iko tani na yalo i Jiova, ia ka'u na sega ni kila se ko sa kau kivei; ia ni'u sa lako ka tukuna vei Eapi, ka sega ni kunei iko ko koya, ena qai vakamatei au: ia koi au na nomu tamata, au sa rerevaki Jiova ni'u sa cauravou, ka yacova na gauna oqo.

¹³ Sa sega beka ni tukuni vei iko na noqu turaga na ka ka'u a kitaka ni sa vakamatei ira na parofita i Jiova ko Jesepeli, ni'u a vunia e le dua na drau na tamata vei ira na parofita i Jiova, ka vakayayalimasagavulu e na qara vatu, ka vakani ira e na madrai kei na wai?

¹⁴ Ia ko sa kaya oqo, Mo la'ki kaya vua na nomu turaga, Raica, sa tiko ko Ilaija; ia ena qai vakamatei au ko koya.

¹⁵ Sa qai kaya ko Ilaija, Me vaka sa bula ko Jiova ni lewe vuqa, o koya ka'u sa tu e matana, au na vakaraitaki au vakaidina vua edaidai.

¹⁶ A sa la'ki tavaki Eapi ko Opetaia, a sa tukuna vua: a sa la'ki tavaki Ilaija ko Eapi.

¹⁷ Ia ni sa raici Ilaija ko Eapi, sa kaya vua ko Eapi, ko iko beka ko koya ka vakararawataki ira na Isireli?

¹⁸ A sa kaya ko koya, Au sa sega ni vakararawataki ira na Isireli; koi kemuni ga, kei na mataqali i tamamuni, ni kemuni sa biuta na vunau i Jiova, ka sa muri ira na Peali.

¹⁹ Ia oqo, mo ni talaki, mo ni vakasoqoni ira kecega na Isireli vei au, ki na ulu-ni-vanua ko Kameli, kei ira na parofita i Peali era sa lewe va na drau ka limasagavulu, kei ira na parofita ni kalouyalewa ni veikau era sa lewe va na drau, era sa kana tiko mai na tepeli i Jesepeli.

²⁰ A sa talaki ko Eapi vei ira kecega na Isireli, ka vakasoqoni ira vata na parofita ki na ulu-ni-vanua ko Kameli.

²¹ A sa toro voleka vei ira kecega na tamata ko Ilaija, ka kaya, E bogi vica mada kemuni na lomalomarua tiko kina? kevaka sa Kalou ko Jiova, mo ni muri koya: ia kevaka ko Peali, mo ni muri koya. A ra sa sega ni kaya vua e dua na vosa ko ira na tamata.

²² A sa kaya vei ira na tamata ko Ilaija, Oi au duaduaga, ka'u sa vo tiko na parofita i Jiova; ia na parofita i Peali, era sa le va na drau ka limasagavulu.

²³ Ia me ra solia vei keda e rua na pulumokau; me ra qai digitaka vei ira e dua na pulumokau, ka me talaka mada, ka vakotora e na dela ni buka, ia me kakua ni viri kina na bukawaqa: ia ka'u na vakarautaka na pulumokau kadua, ka vakotora e na dela ni buka, ia ka'u na sega talega ni viria kina e dua na bukawaqa;

²⁴ ia mo ni masu ki na yaca ni nomuni kalou, ia ka'u na masu ki na yaca i Jiova; ia na kalou sa vosa mai e na bukawaqa, me Kalou ga ko koya. A ra sa vosa kecega na tamata, ka kaya, Sa vinaka na vosa.

²⁵ A sa kaya ko Ilaija vei ira na parofita i Peali, mo ni digitaka e dua na nomuni pulumokau, vakarautaka mada eliu; ni kemuni sa lewe vuqa; ni qai masu ki na yaca ni nomuni kalou, ia kakua ni viria kina e dua na bukawaqa.

²⁶ A ra sa kauta na pulumokau sa soli vei ira, a ra sa vakarautaka, a ra sa qai masu ki na yaca i Peali e na mataka, ka sigalevutaka, a ra sa kaya, I Peali, mo rogoci keimami mai. A sa sega na domo e rorogo, se dua e vosa mai. A ra sa ladeva nai cabocabo-ni-soro sa caka.

²⁷ Ia ni sa siga levu, sa qai vakalialiai ira ko Ilaija, ka kaya, Dou kaci vakadomoilevu: ni sa kalou ko koya: sa vakanananu tiko, se sa tiko tani, se sa lako tu ki na dua na vanua; se sa moce beka, ka sa yaga me vakayadrati.

²⁸ A ra sa kaci vakadomoilevu, ka tavalaki ira e nai seleiwau kei nai sele, me vaka na nodra i valavala, a sa dave mai na nodra dra.

²⁹ Ia ni sa oti na siga levu, era sa parofisai tiko ka yacova na gauna sa dauvakacabori kina nai soro; a sa sega na domo e rorogo, se dua e vosa mai, se dua e rogoca.

³⁰ A sa kaya vei ira kecega na tamata ko Ilaija, Ni toro mai vei au. A ra sa toro vua ko ira na tamata kecega: a sa vakavinakataka ko koya nai cabocabo-ni-soro i Jiova, ka sa talaraki sobu.

³¹ A sa kauta ko Ilaija na vatu e tinikarua, me vaka nai wiliwili ni nodra veimataqali na luve i Jekope, o koya ka yaco vua na vosa i Jiova, ka kaya, Ena vakatokai na yacamu ko Isireli;

³² a sa cakava ko koya e na veivatu ko ya nai cabocabo-ni-soro e na yaca i Jiova: a sa kelia e dua na keli me volita nai cabocabo-ni-soro, ka me rauta e rua nai vakarau ni sila.

³³ A sa virikotora na buka, ka tamusumusuka na pulumokau, ka vakotora e dela ni buka,

³⁴ ka kaya, Ni vakasinaita e va na saqa e na wai, ka sova ki nai soro kama, kei na buka. A sa kaya, Ni vakaruataka: a ra sa vakaruataka: A sa kaya ko koya, Ni vakatolutaka: a ra sa vakatolutaka.

³⁵ A sa dave vakavolivolita nai cabocabo-ni-soro na wai; a sa vakasinaiti talega na keli e na wai.

³⁶ Ia e na gauna sa dauvakacabori kina nai soro ni yakavi, sa toro kina ko Ilaija na parofita, ka kaya, Kemuni Jiova na Kalou i Eparaama, kei Aisake, kei Isireli, me kilai mada edaidai ni kemuni sa Kalou e Isireli, ka ni'u sa nomuni tamata talega koi au, ka sa nomuni vosa ka'u sa cakava kina na ka kecega oqo:

³⁷ mo ni rogoci au, I Jiova, mo ni rogoci au; me ra kila na tamata oqo ni ko sa Kalou koi kemuni, Jiova, ka ni kemuni sa saumaka tale na yalodra.

³⁸ Sa qai lutu sobu mai na bukawaqa i Jiova, ka kania nai soro kama, kei na buka, kei na vatu, kei na kuvu-ni-qele, ka dramica na wai e na keli.

³⁹ Ia ni ra sa raica ko ira na tamata kecega, era sa cuva vakatoboicu; a ra sa kaya, Sa Kalou ga ko Jiova; Sa Kalou ga ko Jiova.

⁴⁰ A sa kaya vei ira ko Ilaija, Ni tauri ira mada na parofita i Peali, me kakua ni dro bula e dua vei ira. A ra sa tauri ira; a sa kauti ira sobu ko Ilaija ki na uciwai ko Kisoni, ka vakamatei ira maikea.

⁴¹ A sa kaya vei Eapi ko Ilaija, Mo lako cake; mo kana ka gunu; ni sa kere mai e dua na uca levu.

⁴² A sa lako cake ko Eapi me kana ka gunu: a sa lako cake ki na dela i Kameli ko Ilaija; a sa cuva ki na qele, ka vakacuva na matana ki na macawa ni duruna.

⁴³ A sa kaya vua na nona cauravou, Mo lako cake mada, mo rai vaka ki na wasawasa. A sa lako cake ko koya, ka rai voli, a sa kaya, Sa sega na ka e kune, A sa kaya ko koya, Mo lako tale ka vakavitu.

⁴⁴ Ia e na kenai kavitu, sa kaya ko koya, Raica, sa lako cake mai na wasawasa e dua na o lailai, sa vaka na liga ni tamata. A sa kaya ko koya, Mo lako cake, mo kaya vei Eapi, Mo ni vakarautaka na nomuni qiqi vakaturaga, ka lako sobu, de tarovi kemuni na uca.

⁴⁵ A sa loaloa mai na lomalagi, e na veiyasana kecega, e na o kei na cagi, a sa tau na uca levu. A sa vodo ko Eapi, ka lako ki Jesirieli.

⁴⁶ A sa tiko kei Ilaija na liga i Jiova; a sa vauca ko koya na tolona, ka cici ka liutaki Eapi ki nai bili mai Jesirieli.