1 Tui 17 - Vakavakadewa Makawa

Sa tukuna ko Ilaija na dausiga, ka qai la'ki vakani mai na uciwai, 1-7. Sa qai lako ko koya ki na dua na yada mai Sarifaci, 8-16; ka sa vakabula na luvena ka mate, 17-24.

¹ A sa kaya vei Eapi ko Ilaija na kai Tisipa, e dua vei ira na kai Kiliati, Me vaka sa bula ko Jiova na nodra Kalou na Isireli, o koya ka'u sa tu e matana, ena sega ni lutu na tegu se tau na uca e na veiyabaki oqo, ena yaco ga me vaka na noqu vosa.

² A sa yaco mai vua na vosa i Jiova, ka kaya,

³ Mo lako tani eke, ka gole vaka ki na tu-i-cake, ka vunitaki iko mai na uciwai ko Kirici, oqori e na mata ni Joritani:

⁴ ia ko na gunu mai na uciwai; au sa vakaroti ira talega na reveni me ra vakani iko tiko maikea.

⁵ A sa muria ko koya na vosa i Jiova: ka sa la'ki tiko ko koya mai na uciwai ko Kirici, oqori sa tu mai na mata ni Joritani.

⁶ Ia na reveni sa daukauta vua na kena madrai kei na kena lewe ni manumanu e na veimataka, kei na kena madrai kei na kena lewe ni manumanu e na veiyakavi: a sa gunu ko koya mai na uciwai.

⁷ Ia sa bogi vica, sa qai maca na uciwai, ni sa sega ni tau na uca e na vanua.

⁸ A sa yaco vua na vosa i Jiova, ka kaya,

⁹ Mo cavu tu, mo lako ki Sarifaci, oqori sa vaka-Saitoni, ka tiko maikea: raica, ka'u sa vakarota vua e dua na yada maikea me vakani iko.

¹⁰ A sa cavu tu ko koya, ka lako ki Sarifaci. Ia ni sa yaco ki na matamata-ni-koro, raica, sa tiko maikea e dua na yada, a sa ca buka tiko: a sa kaci vua ko koya, ka kaya, Mo kauta mada mai vei au e dua na wai lailai e na bilo, me'u gunu.

¹¹ Ia ni sa lako yani ko koya me kauta mai, sa kaci tale vua ko koya, ka kaya, Mo kauta talega mai vei au e na ligamu e dua na tiki ni madrai.

¹² A sa kaya ko koya, Me vaka sa bula ko Jiova na nomu Kalou, sa sega vei au e dua na keki, sa dua ga na madrai droka e na saqa sa yakuta rawa na ligaqu, ka dua na waiwai lailai e na tavaya: ka raica, ka'u sa cava e rua na buka me'u la'ki vakarautaka na keirau kei luvequ, me keirau kania, ka qai mate.

¹³ A sa kaya vua ko Ilaija, Mo kakua ni rere; mo la'ki cakava me vaka na nomu vosa; ia mo cakava mada eliu vei au e dua na keki lailai, ka kauta mai vei au, mo qai vakarautaka emuri na kemudrau kei luvemu.

¹⁴ Ni sa kaya vakaoqo ko Jiova na nodra Kalou na Isireli, Ena sega ni oti na saqa madrai droka, ena sega talega ni maca sobu na tavaya waiwai, ka me yaco mada na siga ena vakatauca na uca ko Jiova ki vuravura.

¹⁵ A sa lako ko koya, ka kitaka me vaka na vosa i Ilaija: a sa kana tiko ko Ilaija, kei na yalewa, kei iratou na nona lewe-ni-vale, ka bogi vuqa.

¹⁶ Sa sega ni oti na saqa madrai droka, ka sega ni maca sobu na tavaya waiwai, me vaka na vosa i Jiova ka vosataka ko koya e na gusu i Ilaija.

¹⁷ Sa oti na veika oqo, sa qai tauvi mate na luvena na yalewa, nai taukei ni vale; ia sa bibi sara na nona mate, ka me sega ni vo vua na nonai cegu.

¹⁸ A sa kaya ko koya vei Ilaija, A cava li na ka vei kedaru, o iko na tamata ni Kalou? o sa lako beka mai mo vakananumi au e na noqu i valavala ca, mo vakamatea talega na luvequ?

¹⁹ A sa kaya vua ko koya, Mo solia mai vei au na luvemu. A sa kauti koya tani mai na lomaserena ko koya, ka kauta ki na loqi e cake sa dautiko kina ko koya, a sa vakadavora e na nonai mocemoce.

²⁰ A sa tagi vei Jiova ko koya, ka kaya, Kemuni Jiova na noqu Kalou, o ni sa vakayacora talega beka na ca vua na yada ka'u sa tiko vulagi kaya, ni kemuni sa vakamatea na luvena?

²¹ A sa davo bikaca na gone vakatolu ko koya, ka tagi vei Jiova, ka kaya, Kemuni Jiova na noqu Kalou, me curu tale mada vua na gone oqo na yalona.

²² A sa rogoca na vosa i Ilaija ko Jiova; a sa curu tale mai vua na gone na yalona, a sa bula.

²³ A sa keveta na gone ko Ilaija, ka kauti koya sobu ki vale mai na loqi e cake, ka solia vei tinana; a sa kaya ko Ilaija, Raica, sa bula na luvemu.

²⁴ A sa kaya vei Ilaija ko koya na yalewa, Au sa qai kila e na ka oqo ni ko sa tamata ni Kalou, ka sa dina na vosa i Jiova e na gusumu.