1 Tui 16 - Vakavakadewa Makawa

Sa taravi Pasa na tui Isireli ko Ela na luvena, a sa vakamatei koya ko Simirai, 1-14. Sa tui Isireli ko Simirai, 15-22. Sa tui Isireli ko Omirai, 23-28; a sa tarava ko Eapi, 29-33. Sa tarai ko Jeriko, 34.

¹ A sa yaco mai na vosa i Jiova vei Jeu na luve i Anani e na vuku i Pasa, ka vaka,

² E na vuku ni ka'u a laveti iko cake mai na kuvu-ni-qele, ka lesi iko mo turaga vei ira na noqu tamata na Isireli; ia ko sa muria ga nai tovo i Jeropoami, ka sa vakaivalavalacataki ira na noqu tamata na Isireli, ka me vakacudrui au e na vuku ni nodra i valavala ca;

³ raica, ka'u na kauta laivi na kawa i Pasa, kei na kawa ni nona mataqali; ia ka'u na cakava na nomu mataqali me tauvata kei na mataqali i Jeropoami na luve i Nipati:

⁴ o koya ka nei Pasa sa mate e na koro, ena kania na koli; kei koya sa mate vua e na were, ena kania na manumanu vuka.

⁵ Ia na kena vo ni cakacaka i Pasa, kei na ka sa cakava ko koya, kei na nona kaukauwa, sa sega li ni volai e nai vola ni veika sa caka e na nodra gauna na tui Isireli?

⁶ A sa moce vata kei ira na nona qase ko Pasa, a sa bulu mai Tirisa; a sa tui ko Ela na luvena, me nonai sosomi.

⁷ A sa yaco talega mai na vosa i Jiova e na gusu i Jeu na parofita, na luve i Anani, e na vuku i Pasa, ka e na vuku ni nona mataqali; io e na vuku ni ka ca kecega ka cakava ko koya e na mata i Jiova, me vakacudrui koya e na cakacaka ni ligana, ni sa tautauvata kei na mataqali i Jeropoami; ka ni sa mokuti koya.

⁸ E na kenai karuasagavulu ka ono ni yabaki i Esa na tui Juta, sa tekivu me lewa vei ira na Isireli mai Tirisa ko Ela na luve i Pasa, ka lewa yabaki rua.

⁹ A sa buki kena vere ni sa tiko mai Tirisa na nona tamata ko Simirai, na kapiteni ni dua na kena wase ni nona qiqi-ni-valu, ni sa gunu ka sa mateni e na vale i Erisa, ko koya sa lewa na nona vale mai Tirisa.

¹⁰ A sa curu ko Simirai, ka mokuti koya, ka vakamatea, e na kenai karuasagavulu ka vitu ni yabaki i Esa na tui Juta, a sa tui me nonai sosomi.

¹¹ A sa yaco ni sa qai tui ko koya, ni sa tiko e na nonai tikotiko vakaturaga, sa qai vakamatei ira kecega na mataqali i Pasa; sa sega ni vakabula vua e dua na gone tagane: e sega vei ira na wekana dina, se vei ira sa wekana walega.

¹² A sa vakarusai ira kece na mataqali i Pasa ko Simirai, me vaka na vosa i Jiova ka vosataki Pasa kina e na gusu i Jeu na parofita,

¹³ e na vuku ni valavala ca kecega i Pasa, kei nai valavala ca i Ela na luvena, erau sai valavala ca kina, ka vakaivalavalacataki ira kina na Isireli, me vakacudrui Jiova na nodra Kalou na Isireli, e na nodra veika vakailasu.

¹⁴ Ia na kena vo ni cakacaka i Ela, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Isireli?

¹⁵ E na kenai karuasagavulu ka vitu ni yabaki i Esa na tui Juta, sa tui mai Tirisa ko Simirai, ka bogi vitu. A sa tiko vakaivalu ko ira na tamata ki Kipiconi, ka nodra na kai Filisitia.

¹⁶ A sa rogoca ko ira na tamata ka tiko vakaivalu ka vaka, Sa buki vere ko Simirai, ka mokuta talega na tui: a ra sa buli Omira na turaga ni valu ko ira kecega na Isireli me tui Isireli e na siga ko ya e nai tikotiko ni valu.

¹⁷ A sa lako cake mai Kipiconi ko Omirai, kei ira vata kaya na Isireli kecega, ka buku druadrua ki Tirisa.

¹⁸ Ia ni sa raica ko Simirai ni sa kabai na koro, sa curu ki na tikina cecere e na vale ni tui, ka vakama na vale ni tui ni sa tiko eloma, a sa mate,

¹⁹ e na vuku ni nonai valavala ca sai valavala ca kina ni sa caka ca e na mata i Jiova, ni sa muria nai tovo i Jeropoami, kei na nonai valavala ca ka kitaka ko koya, ni sa vakaivalavalacataki ira na Isireli.

²⁰ Ia na kena vo ni cakacaka i Simirai, kei na nona vere ka kitaka ko koya, sa sega li ni volai e nai vola ni veika sa caka e na nodra gauna na tui Isireli?

²¹ Sa ra qai wase rua ko ira na Isireli: e dua na kena wase sa muri Tipini na luve i Kinaci, me ra buli koya me nodra tui; ka dua na kena wase sa muri Omirai.

²² Ia na tamata era sa muri Omirai era sa gumatua vei ira na tamata era sa muri Tipini na luve i Kinaci: a sa mate ko Tipini, ka sa tui ko Omirai.

²³ E na kenai katolusagavulu ka dua ni yabaki i Esa na tui Juta, sa qai tekivu me lewai ira na Isireli ko Omirai, ka sa lewa yabaki tinikarua: e ono na yabaki sa tui kina mai Tirisa ko koya.

²⁴ A sa volia ko koya na ulu-ni-vanua ko Samaria maivei Semeri, e na taledi siliva e rua, a sa tara e dua na koro e na ulu-ni-vanua, ka vakayacana ko koya, vei Semeri, nai taukei ni ulu-ni-vanua ko Samaria.

²⁵ A sa daucaka ca ko Omirai e na mata i Jiova, ia sa levu cake na nona ca ka lailai sobu na nodra ca ko ira kecega sa bula eliu vei koya.

²⁶ A sa muria ko koya nai tovo kecega i Jeropoami na luve i Nipati, kei na nonai valavala ca sa vakaivalavalacataki ira kina na Isireli, ka me vakacudrui Jiova na nodra Kalou na Isireli e na nodra veika vakailasu.

²⁷ Ia na kena vo ni cakacaka i Omirai ka kitaka ko koya, kei na nona qaqa ka rairai vua, sa sega li ni volai e nai vola ni veika sa caka e na nodra gauna na tui Isireli?

²⁸ A sa moce vata kei ira na nona qase ko Omirai, ka sa bulu mai Samaria; a sa tui ko Eapi na luvena, me nonai sosomi.

²⁹ Ia e na kenai katolusagavulu ka walu ni yabaki i Esa na tui Juta, sa tekivu me lewa ko Eapi na luve i Omirai vei ira na Isireli; a sa tui vei ira na Isireli mai Samaria ko Eapi na luve i Omirai, ka yabaki ruasagavulu ka rua.

³⁰ A sa daucaka ca e na mata i Jiova ko Eapi na luve i Omirai, ka uasivi vei ira kecega era a bula eliu vua e nai valavala ca.

³¹ Ia me vaka sa ka lailai vua me muria nai valavala ca i Jeropoami na luve i Nipati, sa kuria ni sa kauti Jesepeli me watina, o koya na luve i Ecipeali, na nodra tui na kai Saitoni, ka la'ki qaravi Peali, ka cuva vua.

³² A sa cakava e dua nai cabocabo-ni-soro vei Peali, e na bure kalou i Peali, oqori ka tara ko koya mai Samaria.

³³ A sa cakava ko Eapi e dua na kalouyalewa ni veikau; a sa levu cake na ka sa vakacudrui Jiova kina na nodra Kalou na Isireli ko Eapi, ka lailai na ka era cakava ko ira kecega na tui Isireli era a bula eliu vua.

³⁴ E na nona gauna sa tarai Jeriko ko Aieli na kai Peceli: ni sa tauyavutaka ko koya, sa mate ko Epairami na nona ulumatua, ia ni sa vakaduria cake na kena matamata-ni-koro, sa mate ko Sikupi, o koya sa nonai tinitini, me vaka na vosa i Jiova ka vosataka e na gusu i Josua na luve i Nuni.