1 Tui 15 - Vakavakadewa Makawa

Sa tui Juta ko Epaijami, 1-8. Sa tui Juta ko Esa, 9-24. Sa tui Isireli ko Netapi, 25-32; a sa tarava ko Pasa, 33,34.

¹ E na kenai katinikawalu ni yabaki i Jeropoami na tui, na luve i Nipati, sa tekivu me lewa vei ira na Juta ko Epaijami.

² Sa tui tiko mai Jerusalemi ka yabaki tolu. Ia na yaca i tinana ko Meeka, na luve i Apisalomi.

³ A sa muria ko koya nai valavala ca kecega i tamana, o koya ka kitaka ni sa bula eliu vua; a sa sega ni dodonu na lomana vei Jiova na nona Kalou, me vaka na loma i Tevita na nona qase.

⁴ Ia e na vuku i Tevita ga sa solia vei koya ko Jiova na nona Kalou e dua na cina mai Jerusalemi, ni sa vakatubura na luvena me taravi koya, ka me vakataudeitaki Jerusalemi:

⁵ ni sa cakava ko Tevita na ka e dodonu e na mata i Jiova, ka sega ni lesu tani mai na dua na ka sa vakaroti vua, e na veisiga kecega ni nona bula, na ka ga i Uraia na Itaiti.

⁶ A rau sa veivaluti ko Riopoami kei Jeropoami e na gauna kece ni nona bula.

⁷ Ia na vo ni cakacaka i Epaijami, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Juta? A rau sa veivaluti tiko ko Epaijami kei Jeropoami.

⁸ A sa moce vata kei ira na nona qase ko Epaijami; a sa bulu ko koya e na koro i Tevita; a sa tui ko Esa na luvena, me kenai sosomi.

⁹ Ia e na kenai karuasagavulu ni yabaki i Jeropoami na tui Isireli, sa tekivu me lewa vei ira na Juta ko Esa.

¹⁰ A sa tui tiko ko koya mai Jerusalemi ka yabaki vasagavulu ka dua. Ia na yaca i tinana ko Meeka, na luve i Apisalomi.

¹¹ A sa caka dodonu ko Esa e na mata i Jiova, me vakataki Tevita na nona qase:

¹² a sa vakasevi ira tani mai na vanua era sai valavala vaka-Sotoma, ka biuta tani na matakau kecega ka cakava ko ira na nona qase:

¹³ ia ko Meeka talega na tinana, sa vakasivoya ko koya me kakua ni ranadi tiko, ni sa cakava e dua na matakau ki na kalouyalewa ni veikau; a sa vakacacana na nona matakau ko Esa, ka vakama mai na uciwai ko Kitironi.

¹⁴ Ia sa sega ni biu na veitikina cecere: ka sa dodonu ga vei Jiova na loma i Esa e na nona gauna kecega.

¹⁵ A sa kauta ki na vale i Jiova na veika ka vakatabuya ko tamana me nei Jiova, kei na veika ka vakatabuya ko koya me nei Jiova, na siliva, kei na koula, kei nai yaya.

¹⁶ A rau sa veivaluti tiko ko Esa kei Pasa na tui Isireli e na nodrau gauna kecega.

¹⁷ A sa lako cake ko Pasa na tui Isireli me veivala kei ira na Juta, a sa tarai Rama, ka me dredre vua e dua me lako tani se lako mai vei Esa na tui Juta.

¹⁸ A sa qai kauta ko Esa na siliva kei na koula kecega sa vo tu e nai yau ni vale i Jiova, kei nai yau ni vale ni tui, ka solia ki na ligadra na nona tamata: a sa vakauta ko Esa na tui kivei Peni-etati na luve i Tapirimoni, na luve i Esioni, na tui Siria, o koya sa tiko mai Tamasiko, ka kaya,

¹⁹ Sa dua na nodaru veiyalayalati, ka dua vei rau na tamaqu kei na tamamu: raica, ka'u sa vakauta vei iko e dua na ka-ni-loloma, na siliva kei na koula: mo lako mai, mo tinia na nomudrau veiyalayalati kei Pasa na tui Isireli, ka me lako tani vei au ko koya.

²⁰ A sa vakarorogo vei Esa na tui ko Peni-etati, ka talai ira na kapiteni ni nona mataivalu me veivala kei na nodra veikoro na Isireli, a sa samuti Aijoni, kei Tani, kei Epeli-peci-meeka, kei Kineroci taucoko, kei na vanua taucoko ko Nafitalai.

²¹ Ia ni sa rogoca ko Pasa, sa kua so ni tarai Rama ko koya, a sa la'ki tiko mai Tirisa.

²² A sa kacivi ira kecega na Juta ko Esa na tui; sa sega ni vo e dua: a ra sa kauta tani na veivatu mai Rama, kei na kena kau, ka tarai Rama kina ko Pasa; a sa tarai Kipa kina ka nei Penijamini, kei Misipa, ko Esa na tui.

²³ Ia na vo ni cakacaka kecega i Esa, kei na nona kaukauwa kecega, kei na ka kecega ka cakava ko koya, kei na veikoro ka tara ko koya, sa sega li ni volai e nai vola ni veika sa caka e na nodra gauna na tui Juta? Ia e na gauna sa qase kina sa tauvi mate na yavana.

²⁴ A sa moce vata kei ira na nona qase ko Esa, a sa bulu vata kei ira na nona qase e na koro i Tevita na nona qase: a sa tui ko Jiosafati na luvena, me nonai sosomi.

²⁵ A sa tekivu me lewa vei ira na Isireli ko Netapi, na luve i Jeropoami, e na kenai karua ni yabaki i Esa na tui Juta, a sa tui vei ira na Isireli ka yabaki rua.

²⁶ A sa daucaka ca ko koya e na mata i Jiova, ka muria nai tovo i tamana, kei na nonai valavala ca ka vakaivalavalacataki ira kina na Isireli.

²⁷ A sa buki kena vere ko Pasa na luve i Eaija, e na mataqali i Isakari; a sa mokuti koya ko Pasa mai Kipiconi, sa nodra na kai Filisitia; ni ra sa tiko vakaivalu ki Kipiconi ko Netapi kei ira kecega na Isireli.

²⁸ Ia sa vakamatei koya ko Pasa, e na kenai katolu ni yabaki i Esa na tui Juta; a sa tui ko koya me nonai sosomi.

²⁹ Ia ni sa tui ko koya, sa mokuti ira kecega na kawa i Jeropoami; sa sega ni vakabula vei Jeropoami e dua sa cegu rawa, ka sa vakarusai koya oti, me vaka na vosa i Jiova, ka vosataka ko koya e na gusu ni nonai talatala ko Eaija na kai Sailo:

³⁰ e na vuku ni valavala ca i Jeropoami ka kitaka ko koya, ka sa vakaivalavalacataki ira kina na Isireli, e na nonai valavala ka vakacudrui Jiova kina na nodra Kalou ni Isireli.

³¹ Ia na kena vo ni cakacaka i Netapi, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Isireli?

³² A rau sa veivaluti ko Esa kei Pasa na tui Isireli e na nodrau gauna kecega.

³³ E na kenai katolu ni yabaki i Esa na tui Juta, sa tekivu me lewa ko Pasa, na luve i Eaija, vei ira kecega na Isireli mai Tirisa, ka sa lewa yabaki ruasagavulu ka va.

³⁴ A sa daucaka ca ko koya e na mata i Jiova, ka muria nai tovo i Jeropoami, kei na nonai valavala ca sa vakaivalavalacataki ira kina na Isireli.