1 Tui 13 - Vakavakadewa Makawa

Sa tukuna na tamata ni Kalou na ka ena yaco vei Jeropoami, 1-10. Sa qai muria na vosa ni dua na parofita qase na tamata ni Kalou, ka mate kina, 11-32. Sai valavala ca ga ko Jeropoami, 33-34.

¹ Ka raica, sa lako e dua na tamata ni Kalou mai Juta ki Peceli, ni sa vosa vua ko Jiova: a sa wavu tu ko Jeropoami mai nai cabocabo-ni-soro, me vakama na ka boi vinaka.

² A sa kaci ko koya ki nai cabocabo-ni-soro e na vosa i Jiova, ka kaya, Nai cabocabo-ni-soro! Nai cabocabo-ni-soro! sa kaya vakaoqo ko Jiova, Raica, ena sucu e dua na gonetagane mai na mataqali i Tevita, ko Josaia na yacana; ia ena vakamatei iratou ko koya e delamu na bete ni veitikina cecere, eratou a vakama na ka boi vinaka e delamu, ka na vakamai e delamu na sui ni tamata.

³ Sa solia talega nai vakadinadina e na siga ko ya, ka kaya, Sa vakaoqo nai vakadinadina sa vosataka ko Jiova; Raica, sa na kavida nai cabocabo-ni-soro, ka na tasova na dravusa sa koto e delana.

⁴ Ia ni sa rogoca ko koya na tui na nona vosa na tamata ni Kalou, o koya ka kaci ki nai cabocabo-ni-soro mai Peceli, sa dodoka yani na ligana ko Jeropoami mai nai cabocabo-ni-soro, ka kaya, Tauri koya. A sa malai sara na ligana ka dodoka yani vua ko koya, a sa sega tale ni lokia rawa vua.

⁵ A sa kavida nai cabocabo-ni-soro, a sa tasova na dravusa mai nai cabocabo-ni-soro, me vaka nai vakadinadina ka solia na tamata ni Kalou e na vosa i Jiova.

⁶ A sa vosa na tui, ka kaya vua na tamata ni Kalou, Mo vakamasuti Jiova mada na nomu Kalou, ka masulaki au, ka me'u loki tale mai vei au na ligaqu. A sa vakamasuti Jiova na tamata ni Kalou, a sa lokia tale vei koya na ligana na tui, ka sa yaco me vaka eliu.

⁷ A sa kaya na tui vua na tamata ni Kalou, Daru lako ki vale, mo vakacegu kina, ia ka'u na solia vei iko e dua na ka-ni-loloma.

⁸ A sa kaya vua na tui ko koya na tamata ni Kalou, Kevaka ko ni na solia vei au e dua nai wase ni nomuni vale ni sa wase rua, au na sega ni curu vata kei kemuni, se kania na kakana se gunu wai e na tikina oqo:

⁹ ni'u sa vakaroti vakakina e na vosa i Jiova, ka vaka, Mo kakua ni kania na kakana se gunu wai, se lesu tale yani e na sala ko a lako kina.

¹⁰ A sa lako yani ko koya e na sala tani, ka sega ni lesu tale e na sala ka lako kina ki Peceli.

¹¹ A sa tiko mai Peceli e dua na parofita qase; a sa lako na luvena ka tukuna vua na cakacaka kecega ka cakava mai Peceli na tamata ni Kalou e na siga ko ya: kei na vosa ka vosataka ko koya vua na tui, eratou sa tukuna talega vua na tamadratou.

¹² A sa kaya vei iratou na tamadratou, A sala cava sa lako kina ko koya? a ratou sa raica oti ko iratou na luvena na sala ka lako kina na tamata ni Kalou, o koya ka lako mai Juta.

¹³ Sa kaya talega vei iratou na luvena, Dou vauca mada nai vodovodo ki na asa me'u vodo kina. A ra sa vauca nai vodovodo ki na asa; a sa vodoka ko koya,

¹⁴ ka la'ki muria na tamata ni Kalou, ka kunei koya ni sa tiko e na dua na ruku ni vu ni oki: a sa kaya vua, O iko beka na tamata ni Kalou ka lako mai Juta? A sa kaya ko koya, Koi au.

¹⁵ A sa kaya vua, Daru lako ki noqu vale, ka kania na kakana.

¹⁶ A sa kaya, E tabu me'u lesu vata kei iko, se curu vata kei iko: au na sega talega ni kania na kakana se gunu wai kei iko e na tikina oqo:

¹⁷ ni sa vakaroti vei au e na vosa i Jiova, Mo kakua ni kania na kakana se gunu wai maikea, se lesu tale mo lako e na sala ko a lako mai kina.

¹⁸ A sa kaya vua, Au sa parofita talega koi au me vakataki iko: a sa vosa vei au e dua na agilose e na vosa i Jiova, ka kaya, Mo vakalesui koya mai vei iko ki na nomu vale, me kania na kakana ka gunu wai. Ia sa lasu ga vua ko koya.

¹⁹ Sa qai lesu vata kaya, ka kania na kakana ka gunu wai, e na nona vale.

²⁰ A sa yaco ni rau sa tiko vata mai na tepeli, sa lako mai na vosa i Jiova vua na parofita ka kauti koya mai:

²¹ a sa kaci ko koya vua na tamata ni Kalou ka lako mai Juta, ka kaya, Sa vosa vakaoqo ko Jiova, Ni ko a talaidredre ki na vosa i Jiova, ka sega ni vakabauta nai vakaro ka vakarota vei iko ko Jiova na nomu Kalou,

²² a sa lesu ga mai, ka kania na kakana ka gunu wai; ena tikina ka vakaroti kina vei iko, Mo kakua ni kania na kakana se gunu wai, ena sega ni bulu na yagomu e na nodra i bulubulu na nomu qase.

²³ Ia ni sa kana oti ka gunu oti ko koya, sa vauca ko koya nai vodovodo ki na asa me vodo kina na parofita ka kauta tale mai.

²⁴ Ia ni sa lako tu ko koya, sa donui koya e na sala e dua na laioni, ka vakamatei koya: a sa biu tu e na sala na yagona, a sa tu voleka kina na asa; sa tu voleka talega ki na yagona na laioni.

²⁵ Ka raica, era sa veilakoyaki na tamata, ka raica ni sa koto no e na sala na yagona, ka tu voleka ki na yagona na laioni: a ra sa la'ki tukuna e na koro sa tiko kina na parofita qase.

²⁶ Ia ni sa rogoca na parofita ka vakalesui koya mai na sala, sa kaya ko koya, Ko ya na tamata ni Kalou, o koya ka talaidredre ki na gusu i Jiova: a sa soli koya kina ko Jiova ki na laioni, o koya sa basuraki koya, ka vakamatea, me vaka na vosa i Jiova ka vosataka vua.

²⁷ Sa vosa talega vei iratou na luvena, ka kaya, Dou vauca mada nai vodovodo ki na asa. A ratou sa vauca.

²⁸ A sa lako ko koya, ka kunea na yagona sa biu no e na sala, kei na asa kei na laioni erau sa tu voleka ki na yagona: sa sega ni kania na yagona na laioni, se basuraka na asa.

²⁹ A sa laveta na yago ni tamata ni Kalou ko koya na parofita, ka vakavodoka ki na asa, ka kauta tale: a sa lesu ki na koro na parofita qase, me tagi, ka me buluti koya.

³⁰ A sa vakotora na yagona e nonai bulubulu, ka ratou sa tagicaki koya, ka vaka, Ulei, na wekaqu!

³¹ Ia ni sa buluta oti ko koya, sa vosa vei iratou na luvena, ka kaya, Ni'u sa mate, dou buluti au e nai bulubulu sa bulu kina na tamata ni Kalou; dou vakotora vata na suiqu kei na suina:

³² ni na yaco vakaidina na vosa ka kacivaka ko koya e na vosa i Jiova e na vuku ni cabocabo-ni-soro mai Peceli, kei na veivale kecega e na veitikina cecere mai na veikoro vaka-Samaria.

³³ Ni sa oti na ka oqo sa sega ni biuta tani ko Jeropoami na nonai valavala ca, ka sa lesia tale me ra bete ni veitikina cecere na tamata wale: o koya sa vinakata, sa bulia ko koya me bete ni veitikina cecere.

³⁴ Ia na ka oqo sa vu ni ca ki na mataqali i Jeropoami, ka me muduki tani kina, ka me vakarusai tani mai na dela i vuravura.