1 Tui 12 - Vakavakadewa Makawa

Sa buli me tui ko Riopoami; ka sai valavala vakaukauwa ko koya, ka bese kina ni vakarogoci koya na veimataqali e tini 1-24. Sa tui Isireli ko Jeropoami, a sa soro ki na matakau eso 20, 25-33.

¹ A sa lako ki Sikemi ko Riopoami: ni ra sa lako mai ko ira kecega na Isireli ki Sikemi me buli koya me tui.

² Ia ni sa rogoca ko Jeropoami na luve i Nipati, (ni sa tiko ga mai Ijipita, ni sa dro eliu mai na mata i Solomoni na tui, ka sa tiko mai Ijipita ko Jeropoami;

³ a ra sa talaki me kacivi koya mai;) era sa qai lako, ko Jeropoami kei na nodra i soqosoqo taucoko na Isireli, ka ra la'ki vosa vei Riopoami, ka kaya,

⁴ Ko tamamuni sa vakabibitaka na neimami tavi; ia oqo, mo ni vakamamadataka na cakacaka rarawa i tamamuni, kei nai tavi bibi sa lesia vei keimami ko koya; keimami na qai qaravi kemuni.

⁵ A sa kaya vei ira ko koya, Dou lako mada ga ka me bogi tolu, dou qai lako tale mai vei au. A ra sa lako tani na tamata.

⁶ A sa bose vata ko Riopoami na tui, kei ira na qase ka tu e na mata i Solomoni na tamana ni sa bula tiko ko koya, a sa kaya ko koya, Dou lewa mada se cava me'u kaya vei ira na tamata oqo?

⁷ A ra sa vosa vua, ka kaya, Kevaka ko ni sa vinakata edaidai mo ni nodra tamata nai soqosoqo oqo, ka qaravi ira, ka vosa tale vei ira, ka vosataka vei ira na vosa vinaka, era na qai qaravi kemuni ka tawa mudu.

⁸ A sa biuta ko koya na nodra lewa na qase era sa tukuna vua, ka bose vata kei ira na cauravou era tubu vata kaya, era dautu e matana: a sa kaya vei ira ko koya,

⁹ A cava dou sa lewa me da vosataka vei ira na tamata oqo, ko ira ka vosa mai vei au, ka kaya, Mo vakamamadataka nai tavi ka lesia vei keimami ko tamamu?

¹⁰ A ra sa vosa vua na cauravou era tubu vata kaya, ka kaya, mo ni vosa vakaoqo vei ira na tamata oqo ka vosa vei kemuni, ka kaya, Sa vakabibitaka na neimami tavi ko tamamuni, ia mo ni vakamamadataka vei keimami; Mo ni vosa vaka oqo vei ira, A noqu i qaqalo lailai ena vavaku, ka mamare na tolo i tamaqu.

¹¹ Ia oqo, sa bibi nai tavi sa virikotora vei kemudou ko tamaqu, ia ka'u na vakaikuritaka na nomudou i tavi: sa vakanakuitataki kemudou ko tamaqu e na dali, ia ka'u na vakanakuitataki kemudou e na kuita sa buki.

¹² A ra sa tale mai ko Jeropoami kei ira kecega na tamata kivei Riopoami e na bogi tolu, me vaka ka kaya eliu vei ira na tui, ni sa kaya, Dou lako tale mai vei au e na bogi tolu.

¹³ A sa vosa vakaukauwa ko koya na tui vei ira na tamata, ka biuta na nodra lewa na qase era a tukuna vua;

¹⁴ ka vosa vei ira me vaka na nodra lewa na cauravou, ni ra sa kaya, Sa vakabibitaka na nomudou i tavi ko tamaqu, ia ka'u na vakaikuritaka na nomudou i tavi: sa vakanakuitataki kemudou ko tamaqu e na dali, ia ka'u na vakanakuitataki kemudou e na kuita sa buki.

¹⁵ A sa sega ni vakarorogo na tui vei ira na tamata; ni sa vu maivei Jiova na ka oqo, me vakayacora na nona vosa ka vosataka ko Jiova e na gusu i Eaija, na kai Sailo, kivei Jeropoami na luve i Nipati.

¹⁶ Ia ni ra sa raica ko ira kecega na Isireli ni sa sega ni rogoci ira ko koya na tui, era sa qai vosa vua na tui ko ira na tamata, ka kaya, Keimami sai votavota vata vakaevei kei Tevita? ka sa sega na neimami votavota vata kei koya na luve i Jese: ki na nomudou veivale, oi kemudou na Isireli: ia oqo, Tevita mo qarauna na nomu vale. A ra sa lako ki na nodra veivale ko ira na Isireli.

¹⁷ Ia ko ira na Isireli era tiko e na veikoro i Juta, sa turaga vei ira ko Riopoami.

¹⁸ A sa talai Etorami ko Riopoami na tui, o koya ka lewa nai vakacavacava: a ra sa vakaviriki koya e na vatu ko ira kecega na Isireli, a sa mate ko koya. A sa kusarawa kina ko Riopoami na tui me vodoka na nona qiqi vakaturaga, me dro ki Jerusalemi.

¹⁹ A ra sa vuki tani mai na mataqali i Tevita ko ira na Isireli, ka yacova na siga oqo.

²⁰ Ia ni ra sa rogoca ko ira kecega na Isireli ni sa tale mai ko Jeropoami, era sa talaki ka kacivi koya vei ira nai soqosoqo, ka ra sa buli koya me tui vei ira kecega na Isireli: sa sega e dua sa muria na mataqali i Tevita, na mataqali i Juta duaduaga.

²¹ Ia ni sa yaco ki Jerusalemi ko Riopoami, sa vakasoqoni ira vata kecega na mataqali i Juta, kei na mataqali i Penijamini, e le oba vakatinikawalu na tamata digitaki era tamata i valu, me ra la'ki veivala kei na nodra mataqali na Isireli, me vakalesuya tale na matanitu kivei Riopoami na luve i Solomoni.

²² A sa yaco mai na vosa ni Kalou vei Semaia na tamata ni Kalou, ka kaya,

²³ Mo vosa vei Riopoami, na luve i Solomoni, na tui Juta, kei ira kecega na mataqali i Juta kei Penijamini, kei ira na tamata sa vo, ka kaya,

²⁴ Sa kaya vakaoqo ko Jiova, Dou kakua ni lako cake; dou kakua ni veivala kei ira na wekamudou na Isireli: dou lesu yani na tamata yadua ki na nona vale; ni sa vu vei au na ka oqo. A ra sa vakarorogo ki na vosa i Jiova; ka lesu me lako yani me vaka na vosa i Jiova.

²⁵ A sa tarai Sikemi mai na ulu-ni-vanua ko Ifireimi ko Jeropoami, ka tiko kina; a sa lako tani maikea, ka tarai Penueli.

²⁶ A sa kaya e lomana ko Jeropoami, Sa na qai vuki na matanitu ki na mataqali i Tevita:

²⁷ kevaka era sa lako cake na tamata oqo, me vakacaboi soro e na vale i Jiova mai Jerusalemi, ena qai vuki na lomadra na tamata oqo ki vua na nodra turaga, io kivei Riopoami na tui Juta, a ra na vakamatei au, ka vuki tale vei Riopoami na tui Juta.

²⁸ Sa qai bose mada na tui, ka cakava kina e rua na luve ni pulumokau koula, a sa kaya vei ira, Sa rui dredre vei kemudou mo dou lako cake ki Jerusalemi: raica, koi rau na nomudou kalou, oi kemudou na Isireli, erau a kauti kemudou cake mai na vanua ko Ijipita.

²⁹ A sa viritura e dua mai Peceli ko koya, ka viritura na kenai karua mai Tani.

³⁰ Ia na ka oqo sa vakavuna nai valavala ca; ni ra sa lako ki Tani ko ira na tamata me ra qarava e dua.

³¹ A sa tara ko koya na vale e na veitikina cecere, ka lesi ira na bete maivei ira na tamata wale, era sega ni luve i Livai.

³² A sa lesia ko Jeropoami e dua na so levu e na kenai kawalu ni vula, e na kenai katinikalima ni siga ni vula, me tauvata kei na so levu mai Juta, a sa vakacaboi soro e nai cabocabo-ni-soro. Sa kitaka vakakina mai Peceli, ka vakacaboi soro vei rau na luve ni pulumokau ka cakava ko koya: a sa lesi iratou na bete ni veitikina cecere ka cakava ko koya me ra tiko ki Peceli.

³³ A sa vakacaboi soro e nai cabocabo-ni-soro ka cakava ko koya mai Peceli, e na kenai katinikalima ni siga e na kenai kawalu ni vula, e na vula ka lesia, vakai koya walega; a sa lesia e dua na so levu vei ira na Isireli: ka vakacaboi soro e nai cabocabo-ni-soro, ka vakama na ka boi vinaka.