1 Tui 11 - Vakavakadewa Makawa

Sa vakawati kei ira na lewe vuqa ko Solomoni, ka cala kina ko koya vua na Kalou, 1-8. Sa cudruvi koya ko Jiova, 9-13; a sa so na nona meca, 14-40. Sa mate ko Solomoni, 41-43.

¹ A sa lomani ira e le vuqa na yalewa era yalewa tani ko Solomoni, kei koya na luve i Fero, io, ko ira na yalewa ni Moapi, ko ira na yalewa ni Amoni, ko ira na yalewa ni Itomi, ko ira na yalewa ni Saitoni, kei na Itaiti;

² mai na veimatanitu ka kaya kina ko Jiova vei ira na Isireli, Dou kakua ni toro vei ira, me ra kakua talega ni toro mai vei kemudou: ni ra na vukica vakaidina na lomamudou me muri ira na nodra kalou: sa kabiti ira oqo ko Solomoni e na loloma.

³ A sa le vitu na drau na watina, era marama, ka le tolu na drau na watina lalai: a ra sa vukica vakatani na lomana ko ira na watina.

⁴ Ia ni sa qase mai ko Solomoni, sa vukica na yalona ko ira na watina me muri ira na kalou tani: a sa sega ni dodonu na yalona vei Jiova na nona Kalou, me vaka na yalo i Tevita na tamana.

⁵ Ni sa muri Asetoreci ko Solomoni na nodra kalou yalewa na kai Saitoni, ka muri Milikomi na nodra ka vakasisila na luve i Amoni.

⁶ A sa cakava na ka ca ko Solomoni e na mata i Jiova, ka sega ni muri Jiova sara, me vaka sa kitaka ko Tevita na tamana.

⁷ Sa qai tara ko Solomoni na tikina cecere me nei Kimosi, na nodra ka vakasisila na Moapi, e na ulu-ni-vanua sa donui Jerusalemi, ka me nei Moloke talega na nodra ka vakasisila na luve i Amoni.

⁸ A sa kitaka vakakina e na vukudra na watina kecega era lako mai na vanua tani, era sa vakama na ka boi vinaka vakacaboi soro vei ira na nodra kalou.

⁹ A sa cudru vei Solomoni ko Jiova, ni sa vuki tani na yalona vei Jiova na nodra Kalou na Isireli, o koya ka rairai vakarua vua,

¹⁰ ka vunau vua e na vuku ni ka oqo, ka me kakua ni muri ira na kalou tani: a sa sega ni vakabauta ko koya na ka ka vakarota ko Jiova.

¹¹ A sa kaya kina vei Solomoni ko Jiova, Ni ko sa vakaoqo, ka sega ni vakabauta na noqu veiyalayalati kei na noqu i lesilesi ka'u a vakarota vei iko, au na kaliraka tani vakaidina maivei iko na matanitu, ka solia vua na nomu tamata:

¹² ia ka'u na sega ga ni cakava e na nomu gauna e na vuku i Tevita na tamamu; au na kaliraka ga mai na liga ni luvemu tagane:

¹³ ia ka'u na sega ni kaliraka na matanitu taucoko; au na solia ga e dua na mataqali vua na luvemu e na vuku i Tevita na noqu i talatala, e na vuku i Jerusalemi talega, o koya ka'u a digitaka.

¹⁴ A sa vakauqeta ko Jiova e dua na meca vei Solomoni, ko Etati na kai Itomi: e dua vei ira na kawa ni tui Itomi.

¹⁵ Ni sa tiko mai Itomi ko Tevita, a sa lako cake ko Joapi na kapiteni ni valu, me buluti ira sa moku, ni sa mokuta oti na tagane kecega mai Itomi:

¹⁶ (ni sa tiko maikea ko Joapi kei ira kecega na Isireli, ka vula ono, me mokuta oti mada eliu na tagane kecega mai Itomi:)

¹⁷ sa qai dro ko Etati, ko koya kei ira vata kaya eso na tamata nei tamana era kai Itomi, me ra lako ki Ijipita; ia sa gone lailai ko Etati.

¹⁸ A ra sa cavu tu mai Mitiani, ka lako ki Perana: a ra sa kauta vata kei ira eso na tamata mai Perana, a ra sa lako ki Ijipita, kivei Fero na tui Ijipita; ia sa solia vua ko koya e dua na vale, ka vota vua na kakana, ka soli vanua vua.

¹⁹ A sa lomani Etati vakalevu ko Fero, a sa solia kina ko koya na taci i watina me watina, io na taci i Tapanesi, na ranadi.

²⁰ A sa vakasucuma vua ko koya na taci i Tapanesi e dua na luvena tagane ko Kinupaca, a sa kalia ko Tapanesi e na vale i Fero: a sa tiko vata kei iratou na gonetagane i Fero ko Kinupaca e na vale i Fero.

²¹ Ia ni sa rogoca ko Etati mai Ijipita ni sa moce vata kei ira na nona qase ko Tevita, ka sa mate ko Joapi na kapiteni ni valu, sa qai kaya vei Fero ko Etati, Mo laivi au me'u lako yani, me'u lako ki na noqu vanua.

²² A sa kaya vua ko Fero, Ia ka cava ko sa dravudravua kina ni ko sa tiko kei au, ko sa gu kina mo lako ki na nomu vanua? A sa kaya ko koya, E segai: ia mo laivi au me'u lako ga.

²³ Sa vakauqeta na Kalou e dua tale na nona meca, ko Risoni na luve i Elaiata, o koya ka dro tani mai na nona turaga ko Etateseri na tui Sopa:

²⁴ a sa vakasoqoni ira vata vua na tamata eso, ka sa yaco me turaga ni dua na mataivalu, a sa mokuti ira ko Tevita: a ra sa lako ki Tamasiko, ka tiko kina, ka lewa mai Tamasiko.

²⁵ A sa nodra meca na Isireli ko koya e na gauna kece i Solomoni, ka sa vakaikuritaka na ca ka kitaka ko Etati: a sa vakasisilataki ira na Isireli, ka sa mai lewai Siria ko koya.

²⁶ Ia ko Jeropoami na luve i Nipati na kai Efiraca mai Sirata, na tamata nei Solomoni, na yaca i tinana ko Sirua e dua na yada, sa vuki tani ko koya me meca vua na tui.

²⁷ Ia oqo na ka sa vuki tani kina me meca vua na tui: sa tarai Milo ko Solomoni; ka viria na bai-ni-koro i Tevita na tamana ka kabasu.

²⁸ Ia sa tamata qaqa ko Jeropoami: a sa raica ko Solomoni ni sa cauravou daucakacaka ko koya, a sa lesi koya me lewa na cakacaka kecega e na mataqali i Josefa.

²⁹ Ia e na gauna ko ya ni sa lako tani mai Jerusalemi ko Jeropoami, sa kunei koya e na sala na parofita ko Eaija na kai Sailo; a sa vakaisulu ko koya e nai sulu vou; a rau sa tiko vakai rau ga e na were.

³⁰ A sa taura ko Eaija nai sulu vou ka vakaisulu kina ko koya, ka dresulaka me tinikarua na kena tikina:

³¹ a sa kaya vei Jeropoami, Mo kauta e tini na tikina: ni sa vosa vakaoqo ko Jiova, na nodra Kalou na Isireli, Raica, ka'u na dresulaka na matanitu mai na liga i Solomoni, ka solia vei iko e tini na mataqali:

³² (ia ena nona ga e dua na mataqali e na vuku i Tevita na noqu tamata, ka e na vuku i Jerusalemi: na koro ka'u sa digitaka mai na veimataqali kecega ni Isireli:)

³³ ni ra sa biuti au ko ira, ka soro vei Asetoreci na nodra kalouyalewa na kai Saitoni, kei Kimosi na nodra kalou na Moapi, kei Milikomi na nodra kalou na luve i Amoni; a ra sa sega ni muria na noqu sala, me ra cakava na ka e dodonu vei au, kei na noqu i lesilesi, kei na noqu lewa, me vakataki Tevita na tamana.

³⁴ Ia ka'u na sega ni kauta tani na matanitu taucoko mai na ligana: ia ka'u na qisi koya me lewa tiko e na veisiga kecega ni nona bula, e na vuku i Tevita na noqu i talatala, o koya ka'u a digitaka, ni sa vakabauta na noqu i vakaro kei na noqu i lesilesi:

³⁵ ia ka'u na kauta tani na matanitu mai na ligana na luvena tagane, ka solia vei iko, io e tini na mataqali.

³⁶ Ia ka'u na solia e dua na mataqali vei koya na luvena, me dua tikoga kina e mataqu na cina ni noqu i talatala ko Tevita mai Jerusalemi, na koro ka'u a digitaka me'u vakatikora kina na yacaqu.

³⁷ Ia ka'u na kauti iko, ka ko na lewa kina e na ka kecega sa gadreva na yalomu, ia ko na yaco mo tui Isireli.

³⁸ Ia kevaka ko na vakarorogo ki na ka kecega ka'u na vakarota vei iko, ka muria na noqu sala, ka cakava na ka e dodonu vei au, mo vakabauta na noqu i lesilesi kei na noqu i vakaro, me vaka ka cakava na noqu i talatala ko Tevita; au na qai tiko vata kei iko, ka tara vei iko na vale dei, me vaka ka'u a tara vei Tevita, ka soli ira na Isireli vei iko.

³⁹ Ia ka'u na vakararawataka na kawa i Tevita e na vuku ni ka oqo, ia ka na sega ga ni tawa mudu.

⁴⁰ A sa segata kina ko Solomoni me vakamatei Jeropoami. Ia sa cavu tu ko Jeropoami, ka dro ki Ijipita, kivei Sisaki na tui Ijipita, a sa tiko mai Ijipita ka me mate mada ko Solomoni.

⁴¹ Ia na kena vo ni cakacaka i Solomoni, kei na ka kecega sa cakava ko koya, kei na nona vuku, sa sega li ni volai e nai vola ni valavala i Solomoni?

⁴² Ia na gauna ka lewa kina ko Solomoni mai Jerusalemi, vei ira kecega na Isireli, sa vasagavulu na yabaki.

⁴³ A sa moce vata kei ira na nona qase ko Solomoni, a sa bulu e na koro i Tevita na tamana: a sa tui ko Riopoami na luvena, me kenai sosomi.