1 Tui 1 - Vakavakadewa Makawa

Sa qase sara ko Tevita, 1-4. Sa kacivaki me tui ko Atonaija, a sa lewa ko Tevita me tui ko Solomoni, 5-53.

¹ A sa qase mai ko Tevita na tui, ka sa vuqa na nona yabaki; a sa tutuvitaki koya e nai tutuvi, a sa sega ni katakata rawa.

² A ra sa kaya vua ko ira era sa qaravi koya, Me qarai mada e dua na goneyalewa me kau mai vei kemuni na neitou tui: ia me tu ga vei kemuni na tui, ka me vakaraici kemuni, ka koto e na lomaseremuni; mo ni katakata kina na neitou turaga na tui.

³ A ra sa qara e na veiyasana kecega e Isireli me ra kunea e dua na goneyalewa matavinaka, a ra sa kunei Apisaki, e dua na yalewa ni Sunemi, a ra sa kauti koya vua na tui.

⁴ A sa matavinaka sara na goneyalewa, a sa vakaraica na tui, ka dauqaravi koya: ia sa sega ni veiyacovi kaya ko koya na tui.

⁵ Sa qai vakalevulevui koya ko Atonaija na luve i Akici, ka kaya, Au na tui mada koi au: a sa vakarautaka me nona eso na qiqi vakaturaga, kei na tamata eso era dauvodo ose, ka le limasagavulu na tamata me ra daucici me liutaki koya.

⁶ A sa sega ni vunauci koya eliu ko tamana e na dua na siga, me kaya, A cava ko sa kitaka kina na ka oqo? A sa matavinaka sara talega ko koya; a sa sucu eliu ko Apisalomi, sa sucu emuri ko koya.

⁷ A ratou sa veivosaki ko koya kei Joapi na luve i Seruaia, kei Epaiaca na bete; a rau sa bauti Atonaija, ka vukei koya.

⁸ Ia ko Setoki na bete, kei Pinaia na luve i Jioiata, kei Necani na parofita, kei Semeai, kei Rei, kei ira na tamata qaqa nei Tevita, era sa sega ni to vata kei Atonaija.

⁹ A sa vakamatea ko Atonaija eso na sipi, kei na pulumokau, kei na manumanu uro, mai na vatu ko Soeleci, sa voleka ki Eni-rokeli, a sa kacivi ira kecega na tuakana kei na tacina, na luvena na tui, kei ira kecega na Juta era nona tamata na tui:

¹⁰ ia sa sega ni kacivi Necani na parofita, kei Pinaia, kei ira na tamata qaqa, kei Solomoni na tacina.

¹¹ A sa vosa vei Paci-sepa na tina i Solomoni ko Necani, ka kaya, O sa sega beka ni rogoca ni sa tui ko Atonaija na luve i Akici, ka sa sega ni kila ko Tevita na noda turaga?

¹² Ia mo lako mai, me'u tukuna mada vei iko na ka me caka, mo vakabulai iko kina, kei Solomoni na luvemu.

¹³ Mo lako mada vua na tui ko Tevita, ka kaya vua, O ni a sega li ni bubului, na noqu turaga na tui, vei au na nomuni vada, ka kaya, Ena taravi au vakaidina ko Solomoni na luvemu me tui, ka tiko e na noqu i tikotiko vakaturaga? ia ka cava e tui kina ko Atonaija?

¹⁴ Ka raica, ni drau sa vosa tiko maikea kei koya na tui, ka'u na muri iko talega ka vakadinadinataka na nomu vosa.

¹⁵ A sa curu vua na tui ko Paci-sepa ki na loqi: a sa qase sara na tui; a sa qaravi koya na tui ko Apisaki na yalewa ni Sunemi.

¹⁶ A sa cuva ko Paci-sepa, ka vakarokoroko vua na tui. A sa kaya na tui, A cava sa yalomu?

¹⁷ A sa kaya vua ko koya, Noqu turaga, ko ni a bubului vei au na nomuni vada e na yaca i Jiova na nomuni Kalou, ka vaka, Ena taravi au vakaidina ko Solomoni na luvemu me tui, ka na tiko e na noqu i tikotiko vakaturaga.

¹⁸ Ia oqo, raica, sa tui ko Atonaija; ia koi kemuni na noqu turaga na tui, ko ni sa sega ni kila:

¹⁹ A sa vakamatea ko koya e levu na pulumokau kei na manumanu uro, kei na sipi, a sa kacivi ira kecega na luvena na tui, kei Epaiaca na bete, kei Joapi na kapiteni ni valu: ia ko Solomoni na nomuni tamata, sa sega ni kaciva ko koya.

²⁰ Ia koi kemuni, na noqu turaga na tui, sa vakaraici kemuni tiko na matadra kecega na Isireli, mo ni tukuna vei ira se ko cei me tarava na noqu turaga na tui, me tiko e nonai tikotiko vakaturaga.

²¹ Ia de keirau kei Solomoni na luvequ sa na vaka na tamata ca, ni sa moce vata kei ira na nona qase ko koya na noqu turaga na tui.

²² Ka raica, ni sa vosa tiko koya vua na tui, sa curu talega ko Necani na parofita.

²³ A ra sa tukuna vua na tui, ka vaka, Raica, sa tiko saka ko Necani na parofita. Ia sa lako ko koya vua na tui, ka vakacuva na matana ki na qele vua na tui.

²⁴ A sa kaya ko Necani, Noqu turaga na tui, ko ni kaya li, Ena taravi au me tui ko Atonaija, ka na tiko e na noqu i tikotiko vakaturaga?

²⁵ Ni sa lako sobu edaidai ko koya, a sa ka levu na pulumokau, kei na manumanu uro, kei na sipi sa vakamatea ko koya a sa kacivi ira kecega na luvena na tui, kei iratou na kapiteni ni valu, kei Epaiaca na bete; ia raica, era sa kana ka gunu tiko e matana, ka kaya, Me bula ko Atonaija na tui.

²⁶ Ia koi au, na nomuni tamata, kei Setoki na bete, kei Pinaia na luve i Jioiata, kei na nomuni tamata ko Solomoni, sa sega ni kaciva ko koya.

²⁷ Sa cakava beka na ka oqo na noqu turaga na tui, ka ko ni sa sega ni vakatakila vei au na nomuni tamata, se ko cei ena tarava na noqu turaga na tui me tiko e na nonai tikotiko vakaturaga?

²⁸ A sa vosa ko Tevita na tui, ka kaya, Dou kacivi Paci-sepa mai vei au. A sa lako mai ko koya ki vua na tui, a sa tu e mata ni tui.

²⁹ A sa bubului na tui, ka kaya, Me vaka sa dina ni sa bula ko Jiova, o koya ka vakabulai au mai na ka rarawa kecega,

³⁰ me vaka ka'u a bubului vei iko e na yaca i Jiova na Kalou ni Isireli, ka kaya, E na taravi au vakaidina na luvemu ko Solomoni me tui, ka na tiko e na noqu i tikotiko vakaturaga me noqu i sosomi; ia ka'u na kitaka vakaidina me vakakina e na siga oqo.

³¹ A sa vakacuva na matana ki na qele ko Paci-sepa, ka vakarokoroko vua na tui, ka kaya, Me bula ga ka tawa mudu na noqu turaga ko Tevita na tui.

³² A sa kaya ko Tevita na tui, Dou kacivi Setoki na bete mai vei au, kei Necani na parofita, kei Pinaia na luve i Jioiata. A ratou sa lako mai vua na tui.

³³ A sa kaya vei iratou na tui, Dou kauti ira era sa qaravi au na nomudou turaga, ka vakavodoki Solomoni na luvequ ki na noqu meule, ka kauti koya sobu ki Kaioni:

³⁴ ia me lumuti koya maikea ko Setoki na bete kei Necani na parofita, me nodra tui na Isireli: ia dou uvuca na davui, ka kaya, Me bula ko Solomoni na tui.

³⁵ Dou na qai muri koya cake mai me mai tiko ko koya e na noqu i tikotiko vakaturaga; ni na tui ko koya me noqu i sosomi: ia ka'u sa lesi koya me lewai ira na Isireli kei ira na Juta.

³⁶ A sa vosa vua na tui ko Pinaia na luve i Jioiata, ka kaya, Emeni: me kaya vakakina ko Jiova na nona Kalou na noqu turaga na tui:

³⁷ me vaka ka tiko ko Jiova kei na noqu turaga na tui, me tiko vakakina ko koya kei Solomoni, ka cakava me uasivi cake na nonai tikotiko vakaturaga e na nonai tikotiko vakaturaga na noqu turaga ko Tevita na tui.

³⁸ A ra sa lako sobu ko Setoki na bete, kei Necani na parofita, kei Pinaia na luve i Jioiata, kei ira na Kireci, kei ira na Pileci, a ra sa vakavodoki Solomoni ki na meule i Tevita na tui, ka kauti koya ki Kaioni.

³⁹ A sa kauta ko Setoki na bete e dua na tavaya waiwai mai na Vale tabu, ka lumuti Solomoni. A ra sa uvuca na davui; a ra sa kaya kecega na tamata, Me bula ko Solomoni na tui.

⁴⁰ A ra sa muri koya cake na tamata kecega, a ra sa uvuca na bitu-ni-vakatagi ko ira na tamata, ka reki e na reki levu, a sa yavala na vanua e na domodra.

⁴¹ A ra sa rogoca ko Atonaija kei ira kece era sa kacivi me tiko vata kaya, ni ra sa kana oti. Ia ni sa rogoca ko Joapi na domo ni davui, sa kaya, Mei cavai na ue sa rogo e na koro?

⁴² Ni sa vosa tiko ko koya, raica, sa lako mai ko Jonacani na luve i Epaiaca na bete: a sa kaya ko Atonaija, Mo curu mai; ni ko sa tamata qaqa ko iko, a sa kauta mai nai tukutuku vinaka.

⁴³ A sa vosa vei Atonaija ko Jonacani, ka kaya, Sa lesi Solomoni vakaidina me tui ko Tevita na noda turaga na tui:

⁴⁴ a sa tala vata kaya ko koya na tui na bete ko Setoki, kei Necani na parofita, kei Pinaia na luve i Jioiata, kei ira na Kireci kei ira na Pileci, a ra sa vakavodoki koya e na nona meule na tui:

⁴⁵ a rau sa lumuti koya mai Kaioni me tui, koi rau ko Setoki na bete kei Necani na parofita: a ra sa lako cake maikea ka reki lako, a sa ue kina na koro: oqo na rorogo dou a rogoca:

⁴⁶ a sa tiko talega ko Solomoni e nai tikotiko ni matanitu:

⁴⁷ A ra sa lako tale na tamata sa dauqarava na tui, me vosavakalougatataka na noda turaga ko Tevita na tui, a ra sa kaya, Me vakalevuya na yaca i Solomoni na nomuni Kalou me vinaka cake e na yacamuni, ka cakava me uasivi cake na nonai tikotiko vakaturaga e na nomuni tikotiko vakaturaga: a sa cuva ko koya na tui e na nonai mocemoce:

⁴⁸ A sa kaya talega ko koya na tui, Me vakavinavinakataki ko Jiova na Kalou i Isireli, o koya sa solia edaidai e dua me tiko e na noqu i tikotiko vakaturaga, ka ni sa raica tiko na mataqu.

⁴⁹ A ra sa rere ko ira kecega na tamata sa kacivi, era sa tiko kei Atonaija, a ra sa tu cake, ka dui lako na tamata e nonai lakolako.

⁵⁰ A sa rere ko Atonaija e na vuku i Solomoni, ka tu cake, ka la'ki taura na tutuna sa balavu cake e nai cabocabo-ni-soro.

⁵¹ A sa tukuni vei Solomoni, ka vaka, Raica, sa rerevaki Solomoni na tui ko Atonaija: ka raica, sa taura na tutuna sa balavu cake e nai cabocabo-ni-soro, a sa kaya, Me bubului vei au edaidai ko Solomoni na tui, ni na sega ni vakamatei au na nona tamata e nai seleiwau.

⁵² A sa kaya ko Solomoni, Kevaka sa tamata yaga ko koya, ena sega e dua na drau ni uluna me lutu ki na qele: ia kevaka sa kune vua na ca, ena mate:

⁵³ A sa talaki ko Solomoni na tui, a ra sa kauti koya sobu mai nai cabocabo-ni-soro. A sa lako mai ko koya ka cuva vei Solomoni na tui: a sa kaya vua ko Solomoni, Mo lako ki na nomu vale.