1 Timoci 5 - Vakavakadewa Makawa

Sa vakavulici Timoci ko koya me kakua ni vunauci ira vakailoa na tamata, 1,2. Sa qai tukuni ira na yada, kei ira nai talatala qase, 325.

¹ Kakua ni vunauca vakaukauwa na qase, ia mo vakarota vakamalua ga me vaka vua na tamamu: vei ira na cauravou me vaka vei ira na tacimu;

² vei ira na yalewa qase, me vaka vua na tinamu; vei ira na goneyalewa, me vaka vei ira na ganemu, e na yalosavasava sara.

³ Vakaraici ira na yada era sa yada dina.

⁴ Ia kevaka sa dua na yada sa vakaluveni se so na makubuna, me ra vakatavulici mada me ra kitaka nai valavala dodonu mai nodratou, me ra sauma vinaka na nodra loloma na nodra qase: ni sa vinaka oqo vua na Kalou.

⁵ Ia na yada dina, o koya sa sega na wekana, sa vakararavi tiko vua na Kalou, a sa dauia tiko na veimasulaki kei na kerekere e na bogi kei na siga.

⁶ Ia ko koya sa dauguta na marau, sa mate ga ni sa bula lako.

⁷ Ia mo dauvakarota na veika oqo, me ra tawa cala kina.

⁸ Ia kevaka e dua sa sega ni vakaraici ira na kai nona, ka vakalevu sara ko ira na nona lewe-ni-vale, sa cakitaka na vakabauta, ka sa uasivi cake e na ca, sa uasivi sobu ko koya sa sega ni lotu.

⁹ Me kakua ni digitaki e dua na yada sa sega ni onosagavulu na nona yabaki, ka sa vakawati vakadua ga,

¹⁰ me rogo e na vuku ni valavala vinaka; kevaka sa qaravi ira na gone, kevaka sa dauvakacegui ira na vulagi, kevaka sa vuya na yavadra era sa lotu, kevaka sa vukei ira era sa vakararawataki, kevaka sa gumatua ni daucakava na cakacaka vinaka kecega.

¹¹ Ia ko ira ga na yada era tamata bula mo vakasuka: ni ra na garogaro ga, ka sega ni nanumi Karisito, ka ra na via vakawati tale:

¹² a ra sa cudruvi, ni ra sa biuta na ka era sa vakabauta eliu.

¹³ A ra sa yaco talega me ra vucesa, ka sa veilakoyaki ki na veivale; a ra sa sega ni vucesa walega, era sa dautalanoa wale talega, ka vakavuca, a ra sa daukaya na ka e sega ni kilikili.

¹⁴ O koya oqo kau sa vinakata kina me ra vakawati ko ira na yada era tamata bula, me ra vakasucu gone, me ra lewa na vale, ka me ra kakua ni kitaka e dua na ka me vosa vakacaca kina na meca.

¹⁵ Ni sa lesu tani eso me ra muri Setani.

¹⁶ Kevaka sa dua na yalewa sa vakabauta a sa tiko vua na nona yada eso, me vukei ira ko koya, ka me kakua ni vakabibitaki nai soqosoqo lewe ni lotu: me vukei ira rawa kina era sa yada dina ga.

¹⁷ O ira na qase era sa lewa vinaka me ra dokai vakalevu, ia ka vakalevu sara ko ira sa dauvunautaka na vosa kei nai vakavuvuli;

¹⁸ ni sa kaya nai Vola Tabu, Mo kakua ni vauca na gusu ni pulumokau, ni sa butusereka na sila. Ka, Sa dodonu me soli vua na tamata daucakacaka na kenai voli.

¹⁹ Mo kakua ni vakabauta e dua sa beitaka na qase, kevaka e sega ni lewe rua se lewe tolu era sa vakadinadina.

²⁰ O ira sai valavala ca, vunauca e na matadra na tamata kecega, me rere kina ko ira na tani.

²¹ Au sa vakarota e na mata ni Kalou kei na mata ni Turaga ko Jisu Karisito, kei na matadra na agilose digitaki, mo muria na veika oqo ka kakua ni vinakata e dua ka cata e dua, mo kakua ni kitaka e dua na ka e na veidigidigi walega.

²² Kakua ni tabaka vakasauri e dua e na ligamu; mo kakua ni kauwai e na nodra i valavala ca na tamata tani: maroroi iko mo savasava tiko.

²³ Kakua ni gunu wai dranu tikoga, ia mo gunuva vakalailai na waini e na vuku ni ketemu, kei na malumalumu sa dautauvi iko.

²⁴ Na nodra i valavala ca na tamata eso sa votu ga eliu, a ra sa lako eliu me cudruvi; ia na nodra ca na tamata eso sa muri mai.

²⁵ Sa vaka talega kina nai valavala vinaka sa votu ga eliu; ia ko ira e sega sa sega ni tabonaki rawa.