1 Samuela 9 - Vakavakadewa Makawa

Sa vakasaqara na asa nei tamana ko Saula, 1-5; ka la'ki tarogi Samuela, 6-14. Sa tukuni Saula vei Samuela ko Jiova, 15-17. A nodrau veivosaki ko Samuela kei Saula, 18-27.

¹ Ia sa dua na tamata vei ira na Penijamini, a yacana ko Kisi, na luve i Epieli, na luve i Sirori, na luve i Pikoraci, na luve i Efia, mai na mataqali i Penijamini, a tamata i valu ka qaqa.

² Ka sa dua na luvena, na yacana ko Saula, a cauravou totoka ka vatukai vinaka: a sa sega e dua vei ira na Isireli e vinaka cake vei koya: mai na tabana ki buradelana sa balavu cake vei ira kecega na tamata.

³ A sa yali na asa nei Kisi na tama i Saula. A sa kaya ko Kisi vei Saula na luvena, Mo drau lako vata kei na dua vei ira na cauravou, ka la'ki qara na asa.

⁴ A sa lako voli ko koya e na ulu-ni-vanua ko Ifireimi, ka lako voli e na vanua ko Salisa, ia erau a sega ni kunea: erau sa qai lako voli e na vanua ko Salimi, a sa sega ga maikina: a sa qai lako voli ko koya e na nodra vanua na Penijamini, ia erau a sega ni kunea.

⁵ Ni rau sa lako mai ki na vanua ko Sufi, a sa kaya ko Saula vua na nona cauravou erau sa lako vata kaya, Daru la'ki lesu; de sa cegu e na vuku ni asa ko tamaqu, ka sa nuinuica e na vukudaru.

⁶ A sa kaya vua ko koya, Raica, sa dua na tamata ni Kalou e na koro oqo, a sa dokai na tamata ko ya: a ka kecega sa kaya ko koya sa dauyaco vakaidina: oqo, me daru lako kina: de sa vakatakila rawa vei kedaru ko koya na sala me daru lako kina.

⁷ A sa kaya ko Saula vua na nona cauravou, Raica, kevaka edaru lako, a cava me daru kauta vua na tamata? ni sa oti na madrai e na nodaru bilo, a sa sega e dua na ka-ni-loloma me daru kauta vua na tamata ni Kalou: a cava sa tu vei kedaru?

⁸ A sa kaya tale vei Saula ko koya na cauravou, Raica, sa tu vei au eke e dua na kena wase ni sikeli siliva ni sa wase va; ko ya ka'u na solia vua na tamata ni Kalou, me vakatakila vei kedaru na nodaru sala.

⁹ (E na gauna eliu, ni sa lako e dua vei ira na Isireli me taroga na Kalou, sa kaya vakaoqo, Tou mai lako ki na rairai: ni sa vakatokai eliu me Rairai ko koya sa Parofita e na gauna oqo.)

¹⁰ A sa kaya vua na nona cauravou ko Saula, Sa vinaka na nomu vosa; daru lako. A rau sa lako ki na koro sa tiko kina na tamata ni Kalou.

¹¹ Ni rau sa lako cake tiko e nai cabecabe ki na koro, erau sa kunea na goneyalewa eso era lako tiko me taki wai, a rau sa kaya vei ira, Sa tiko eke ko koya na rairai, se segai?

¹² A ra sa kaya vei rau, Sa tiko ga eke; raica, sa tiko ki liu: tei kusarawa mada, ni sa lako mai edaidai ko koya ki na koro: ni sa dua na nodra so levu edaidai ko ira na tamata e na tikina cecere:

¹³ ni drau na yaco ki na koro, drau na kunei koya sara ni sa bera ni lako cake ki na tikina cecere me kana; ni ra na sega mada ni kana na tamata ena lako mai eliu ko koya ka vatonaka nai soro; era sa qai kana emuri ko ira era sa kacivi: ia oqo, drau lako cake; ni drau na la'ki kunei koya oqo.

¹⁴ A rau sa lako cake ki na koro; ka ni rau sa lako mai ki loma ni koro, raica, sa mai donui rau ko Samuela, ni sa lako cake ki na tikina cecere.

¹⁵ Ia sa bera ni lako mai ko Saula, sa oti bogi dua na nona tukuna vei Samuela ko Jiova, ka vaka,

¹⁶ E na mataka ni sa vakaoqo na tiki-ni-siga ka'u na tala vei iko e dua na tamata, mai na vanua nei Penijamini, ia mo lumuti koya me turaga vei ira na noqu tamata na Isireli, me vakabulai ira na noqu tamata, mai na ligadra na kai Filisitia; ni'u sa raici ira na noqu tamata, ka ni sa yaco vei au na nodra tagi.

¹⁷ Ia ni sa raici Saula ko Samuela, sa kaya vua ko Jiova, Raica na tamata ka'u a vosa kina vei iko! o koya oqo ena lewai ira na noqu tamata.

¹⁸ A sa lako yani vei Samuela ko Saula, ni sa tiko e na matamata-ni-koro, ka kaya vua, Mo tukuna mada mai vei au, se sa evei na nona vale na rairai.

¹⁹ A sa vosa mai vei Saula ko Samuela, ka kaya, Oi au na rairai: mo liutaki au mada ki na tikina cecere, ni datou na kana vata edaidai, ia e na mataka au na talai iko yani, ia ka'u na tukuna vei iko na ka kecega sa tu e lomamu:

²⁰ Ia na nomu asa sa qai yali bogi tolu, mo kakua ni nanuma tiko kina; ni ra sa qai kune: Ia ko cei era sa goleva ko ira kecega na Isireli? ko iko beka se segai, kei ira kecega na lewe-ni-vale i tamamu?

²¹ A sa kaya ko Saula, Au sa sega li ni dua vei ira na Penijamini koi au, o koya sa lailai e na nodra veimataqali na Isireli? ia na noqu vuvale sa sega li ni lailai sobu vei ira kecega na veivuvale e na mataqali i Penijamini? ia a cava ko sa vosa kina vakaoqo vei au?

²² A sa kauti Saula kei na nona cauravou ko Samuela, ka kauti rau ki na vale ni kana, ka vakatikori rau e na tikina vakaturaga vei ira sa kacivi, era sa le tolusagavulu beka na tamata.

²³ A sa kaya ko Samuela vua na liga ni kena, Mo kauta mai na kakana ka'u a solia vei iko, ko ya ka'u a kaya kina vei iko, Mo maroroya mada na ka oqo.

²⁴ A sa tara cake na taba ni manumanu na liga ni kena, kei na ka sa tu e delana, ka tauca e na mata i Saula. A sa kaya ko koya, Raica oqo sa maroroi! mo tauca e matamu, ka mo kana; ni sa maroroi ki na tiki-ni-siga oqo me kemu, ni'u a kaya, Au sa kacivi ira na tamata. A rau sa kana vata ko Saula kei Samuela e na siga ko ya.

²⁵ Ia eratou sa lako sobu ki na koro mai na tikina cecere; ia erau sa veivosaki kei Saula e na dela ni vale.

²⁶ A rau sa sou e na mataka; ia ni sa kida na mataka, sa kacivi Saula ko Samuela ki na dela ni vale, ka kaya, Mo tu, me'u talai iko yani. A sa tu cake ko Saula, a rau sa curu yani ki tautuba, ko koya kei Samuela.

²⁷ Ni rau sa lako sobu tiko ki nai bili ni koro, sa kaya vei Saula ko Samuela, Mo vosa vua na cauravou me lako mada yani me liutaki kedaru, (a sa lako yani ko koya,) ia ko iko, mo tei tu vakalailai mada me'u tukuna vei iko na vosa ni Kalou.