1 Samuela 8 - Vakavakadewa Makawa

Erau sa tamata ca na luve i Samuela, a sa kerea kina ko ira na Isireli me dua na nodra tui, 1-5. Sa masu vua na Kalou ko Samuela, a sa kaya na Kalou me rogoci ira na tamata e na ka ko ya, 6-9. Sa tukuna ko Samuela vei ira na tamata nai valavala ni tui, 10-18. A ra sa guta ga na tui ko ira na tamata, 19-22.

¹ Ia ni sa qase ko Samuela, sa lesi rau na luvena me rau turaga-ni-lewa vei ira na Isireli.

² Ia na yaca ni nona ulumatua ko Joeli; kei na yacana na kenai karua ko Epaia: erau sa turaga-ni-lewa koi rau mai Pieri-sepa.

³ A rau sa sega ni muria na nonai valavala koi rau na luvena, a rau sa vuki me guta nai yau, ka taura nai solisoli me rau lewa vakatani, a rau sa vakatanitaka kina na lewa.

⁴ A ra sa soqoni vata ko ira kecega na qase ni Isireli, ka lako vei Samuela ki Rama,

⁵ a ra sa kaya vua, Raica, ko sa qase mai, ia na luvemu, erau sa sega ni muria na nomu i valavala: mo lesia mada vei keda e dua na tui me lewai keda me vakataki ira na veimatanitu kecega.

⁶ Ia sa ca vei Samuela na ka oqo, ni ra sa kaya, Solia vei keda e dua na tui me lewai keda. A sa masu vei Jiova ko Samuela.

⁷ A sa kaya vei Samuela ko Jiova, Mo vakarorogo vei ira na tamata e na ka kecega era sa kaya vei iko: ni ra sa sega ga ni beci iko, sai au ga era sa beca, me'u kakua ni nodra tui koi au.

⁸ Me vaka na ka kecega era sa cakava mai na siga ka'u a kauti ira cake mai kina mai Ijipita ka yacova na siga oqo, ni ra sa biuti au ka qarava na veikalou tani, era sa kitaka vaka talega kina vei iko.

⁹ Ia oqo, mo vakarorogo ki na nodra vosa; ia mo tukuna vakabibi sara vei ira, ka vakatakila vei ira na nonai valavala na tui sa na lewai ira.

¹⁰ A sa tukuna kecega na vosa i Jiova ko Samuela vei ira na tamata era masuta vua me dua na nodra tui.

¹¹ A sa kaya ko koya, Oqo na nonai valavala na tui sa na lewai kemuni: Ena kauti ira na luvemuni ko koya, ka lesia me yaga vua, ki na nona qiqi-ni-turaga, ka me ra nona tamata dauvodo ose: ka so me ra cici ka liutaka na nona qiqi-ni-turaga.

¹² Ia ena lesia eso me ra turaga ni yayaudolu, ka turaga ni yayalimasagavulu; ka so me cukita na nona veiwere e nai siviyara me tamusuka talega na nona sila, ka mataitaka na nonai yaya ni valu, kei nai yaya ni nona qiqi-ni-valu.

¹³ Ia ena kauti ira ko koya na nomuni goneyalewa me ra caka kakana kamikamica, me ra dauvakasasaqa talega, ka dauvavavi.

¹⁴ Ia ena kauta talega ko koya na nomuni veiwere, kei na nomuni veiwere-ni-vaini, kei na nomuni veiolive, io na kena ka vinaka, ka na solia vei ira na nona tamata.

¹⁵ Ia ena kauta na kenai katini ni nomuni sore ni kau, kei na nomuni veiwere-ni-vaini, ka solia vei ira na nona matanivanua, kei ira na nona tamata.

¹⁶ Ia ena kauti ira talega na nomuni tamata, kei ira na nomuni vada, kei ira na nomuni cauravou vinaka, kei na nomuni asa, me ra yaga e na nona cakacaka.

¹⁷ Ena kauta ko koya nai katini ni nomuni sipi, ia koi kemuni, ena nona tamata.

¹⁸ Kemuni na qai tagi sara e na siga ko ya e na vuku ni nomuni tui kemuni sa digitaka me nomuni; ena qai sega ni rogoci kemuni ko Jiova e na siga ko ya.

¹⁹ A ra sa bese ga na tamata ni vakarogoca na vosa i Samuela; a ra kaya, E segai; me dua na neimami tui;

²⁰ me keimami sa vakataki ira na veimatanitu kecega; me lewai keimami na neimami tui, ka liutaki keimami, ka la'ki ia na neimami valu.

²¹ A sa rogoca kecega na nodra vosa na tamata ko Samuela, a sa la'ki tukuna e na daliga i Jiova.

²² A sa kaya vei Samuela ko Jiova, Mo vakarorogo ki na nodra vosa, ka bulia vei ira e dua na tui. A sa kaya vei ira na Isireli ko Samuela, Ni lako na tamata yadua ki na nona koro.