1 Samuela 7 - Vakavakadewa Makawa

Sa kau na kato ki na vale i Epinatapi mai Kiriaci-jiarimi, 1,2. Sa vunauci ira na tamata ko Samuela, a ra sa veivutuni kina, 3-6. Era sa mai vala na kai Filisitia, a sa gumatua ko ira na Isireli ni sa sorovaki ira ko Samuela, 7-12. Era sa malumalumu na kai Filisitia, 13,14. A lewa i Samuela, 15-17.

¹ A ra sa lako mai na kai Kiriaci-jiarimi, ka kauta cake na kato i Jiova, ka kauta ki na vale i Epinatapi mai Kipea, a ra sa qisi Eliesa na luvena me qarava na kato i Jiova.

² Ia sa tiko dede mai Kiriaci-jiarimi na kato; io sa ruasagavulu na yabaki. Ia sa tagici Jiova ko ira kecega na mataqali i Isireli.

³ A sa vosa vei ira kecega na mataqali i Isireli ko Samuela, ka kaya, Kevaka kemuni sa saumaki vei Jiova e na yalomuni taucoko, mo ni biuta na nodra kalou na kai tani kei Aseteroci mai na kemuni maliwa, ka vakarautaka na yalomuni vei Jiova, ka qaravi koya duaduaga; ena qai vakabulai kemuni ko koya mai na ligadra na kai Filisitia.

⁴ Era sa qai biuti ira tani na Peali, kei na Aseteroci, ko ira na Isireli, a ra sa qaravi Jiova duaduaga.

⁵ A sa kaya ko Samuela, Mo ni vakasoqoni ira vata na Isireli kecega ki Misipa, ia ka'u na masulaki kemuni vei Jiova.

⁶ A ra sa soqoni vata ki Misipa, a ra sa taki wai, ka sovara e na mata i Jiova, ka lolo e na siga ko ya, a ra sa kaya maikea, Eda sai valavala ca vei Jiova. A sa lewai ira na Isireli ko Samuela mai Misipa.

⁷ Ia ni ra sa rogoca na kai Filisitia sa soqoni vata mai Misipa ko ira na Isireli, era sa lako cake ko ira na nodra turaga na kai Filisitia me ra veivala kei ira na Isireli. A ra sa rogoca ko ira na Isireli, a ra sa rerevaki ira na kai Filisitia.

⁸ A sa kaya vei Samuela ko ira na Isireli, Mo kakua ni cegu ni tagi vei Jiova na noda Kalou e na vukuda, me vakabulai keda mai vei ira na kai Filisitia.

⁹ A sa kauta ko Samuela e dua na lami sa sucuma tiko na tinana, a sa vakacabora taucoko mei soro kama vei Jiova: a sa tagi ko Samuela vei Jiova e na vukudra na Isireli; a sa vakarorogo vua ko Jiova.

¹⁰ Ia ni sa vakacabora tiko nai soro kama ko Samuela, era sa toro mai na kai Filisitia me ra veivala kei ira na Isireli; a sa ia na kurukuru vakadomoilevu vei ira na kai Filisitia ko Jiova e na siga ko ya, ka vakubutaki ira; a ra sa mokuti ira ko ira na Isireli.

¹¹ A sa lako yani e Misipa ko ira na Isireli, ka cici muri ira na kai Filisitia, ka yaviti ira ka yaco ki na ruku i Peci-kari.

¹² A sa taura e dua na vatu ko Samuela, ka vakaduria e na maliwa i Misipa kei Seni, ka vakatoka na yacana ko Epenisa [Na vatu ni veivuke], ni sa kaya, Sa vukei keda ko Jiova ka yacova na gauna oqo.

¹³ A ra sa malumalumu sobu na kai Filisitia, ka sega ni lako tale mai ki na nodra i yalayala na Isireli: ka sa veivala kei ira na kai Filisitia na liga i Jiova e na gauna kecega i Samuela.

¹⁴ Ia sa vakasukai tale vei ira na Isireli na veikoro, era a kovea maivei ira na Isireli ko ira na kai Filisitia, mai Ekironi ka yaco ki Kaca; na kedra veiyasana talega sa taura tale ko ira na Isireli maivei ira na kai Filisitia, A sa sautu ko ira na Isireli kei ira na Amoraiti.

¹⁵ A sa lewai ira na Isireli ko Samuela e na veisiga kecega ka bula kina.

¹⁶ A sa lako voli e na veiyabaki ki Peceli, kei Kilikali, kei Misipa, ka sa lewai ira na Isireli e na yasana kecega oqori.

¹⁷ A sa daulesu mai ki Rama; ni sa tiko kina na nona vale; a sa lewai ira na Isireli maikina ko koya; a sa tara maikina e dua nai cabocabo-ni-soro vei Jiova.