1 Samuela 6 - Vakavakadewa Makawa

Era sa bose na kai Filisitia me kau tale ki na kena vanua na kato ni Kalou, 1-9. Sa kauta na kato ki Peci-semesi e rua na pulumokau, 10-18. Sa yaviti ira na kai Peci-semesi ko Jiova; a ra sa talaki ki Kiriaci-jiarimi, me kau tani vei ira na kato ni Kalou, 19-21.

¹ A sa tiko na kato i Jiova e na nodra vanua na kai Filisitia ka vula vitu.

² Ia era sa kacivi ira na bete kei ira na rairai ko ira na kai Filisitia, ka kaya, A cava me da cakava e na vuku ni kato i Jiova? dou vakatakila vei keitou se keitou na vakauta vakaevei ki na kena tikina.

³ A ra sa kaya, Kevaka dou sa vakauta yani na kato ni Kalou ni Isireli, dou kakua ni vakauta wale; ia dou vakauta sara vua e dua nai soro ni caka cala: dou na qai vakabulai, ia ena qai kilai vei kemudou se na vuku ni cava sa sega ni kau tani kina vei kemudou na ligana.

⁴ A ra sa kaya, A cava na ka mei soro ni caka cala me keitou vakauta yani vua? A ra sa kaya, E lima na somunadara koula, ka lima na kalavo koula, me vaka na kedratou i wiliwili na nodra turaga na kai Filisitia: ni sa dua bauga na mate sa tauvi kemudou kecega kei iratou na nomudou turaga.

⁵ Ia dou qai cakava eso nai vakatakarakara ni nomudou somunadara, ka so nai vakatakarakara ni nomudou kalavo sa vakacacana na vanua; ia dou vakarokorokotaka na Kalou ni Isireli: ena qai vakamamadataka beka ko koya na ligana vei kemudou, kei ira na nomudou kalou, kei na nomudou vanua.

⁶ Ia a cava dou sa vakaukauwataka kina na yalomudou, me vaka era a vakaukauwataka na yalodra na kai Ijipita kei Fero? ni sa caka mana oti ko koya vei ira, era sa sega li ni talai ira yani na tamata, a ra sa qai lako kina?

⁷ Ia oqo ga, mo dou ia ka cakava e dua na qiqi-ni-yaya vou, ka kauta e rua na pulumokau yalewa sa to na sucudrau, sa sega ni tau vei rau nai vua, ia dou vauci rau na pulumokau yalewa ki na qiqi-ni-yaya, ka sogolatia ki vale na luvedrau me rau kakua ni muri rau:

⁸ ka kauta na kato i Jiova, ka vakavodoka ki na qiqi-ni-yaya; ia nai yaya koula dou sa vakauta vua mei soro ni caka cala, dou tugana ki na dua na kato lailai me tu e na kena yasana; ia dou qai vakatala yani me lako:

⁹ ia mo dou vakaraica se sa lako cake e na sala ki na kenai yalayala ki Peci-semesi, sa qai koya ga ka cakava vei keda na ka ca levu oqo: ia kevaka e segai, eda na qai kila ni sa sega ni ligana ka yaviti keda: a ka ga sa yaco vakailoa vei keda.

¹⁰ A ra sa cakava vakakina ko ira na tamata; era sa kauta e rua na pulumokau yalewa sa to na sucudrau, a ra sa nokati rau ki na qiqi-ni-yaya, ka sogolatia na luvedrau ki vale.

¹¹ A ra sa vakavodoka na kato i Jiova ki na qiqi-ni-yaya, kei na kato lailai sa tu kina na kalavo koula kei nai vakatakarakara ni nodra somunadara.

¹² Ia erau sa lako vakadodonu na pulumokau yalewa, e na sala sa lako sara ki Peci-semesi, a rau sa muria na salatu, a rau sa tagi lako ga, ka sega ni gole ki nai matau se nai mawi; ka sa muri rau ko iratou na nodra turaga na kai Filisitia, ka yacova nai yalayala kei Peci-semesi.

¹³ Ia era sa tamusuki witi tiko e na buca ko ira na kai Peci-semesi, a ra sa ta cake ka raica na kato, ka reki ni ra sa raica.

¹⁴ A sa lako mai na qiqi-ni-yaya ki na were i Josua, na kai Peci-semesi, a sa tu vakadua kina, ia sa tu maikea e dua na vatu levu: a ra sa talaka na kau ni qiqi-ni-yaya, ka cabori rau na pulumokau yalewa mei soro kama vei Jiova.

¹⁵ Ia ko ira na Livai era a tauca sobu na kato i Jiova, kei na kato lailai sa tu vata kaya, sa tu kina nai yaya koula, ka tauca ki dela ni vatu levu: ka ra sa vakacabora eso nai soro kama ko ira na kai Peci-semesi, ka vakamatea eso nai soro vei Jiova e na siga ko ya.

¹⁶ Ia ni ratou sa raica ko iratou na turaga limalima ni kai Filisitia, eratou sa lesu ki Ekironi e na siga ko ya.

¹⁷ Ia na somunadara koula oqo era sa solia na kai Filisitia mei soro ni caka cala vei Jiova; e dua e na vuku i Asitoti, e dua e na vuku i Kesa, e dua e na vuku i Asikiloni, e dua e na vuku i Kaca, e dua e na vuku i Ekironi;

¹⁸ kei na kalavo koula me vaka nai wiliwili ni koro kecega ni kai Filisitia, sa nodratou na turaga limalima, io na veikoro vakabai, kei na veikoro lalai ki vanua; ia sai vakadinadina, ka yacova na siga oqo, na vatu levu, era sa tauca kina na kato i Jiova, e na were i Josua na kai Peci-semesi.

¹⁹ A sa yaviti ira na kai Peci-semesi ko Jiova, ni ra sa rai ki na loma ni nona kato; a sa yavita vei ira na tamata e lewe limasagavulu na udolu ka vitusagavulu: a ra sa tagi na tamata ni sa yavita ko Jiova na lewe vuqa maivei ira na tamata.

²⁰ A ra sa kaya na kai Peci-semesi, O cei sa rawata me tu e na mata i Jiova na Kalou yalosavasava oqo? ia ena lako cake vei cei ko koya maivei keda?

²¹ A ra sa tala eso na tamata vei ira na kai Kiriaci-jiarimi, a ra sa kaya, Era sa kauta tale mai na kato i Jiova ko ira na kai Filisitia; dou lako sobu mai, mo dou kauta cake vei kemudou.