1 Samuela 4 - Vakavakadewa Makawa

Sa mokuti ira na Isireli ko ira na kai Filisitia, 1,2. Sa kauta mai na kato ni veiyalayalati ko ira na Isireli, a sa rere kina ko ira na kai Filisitia, 3-9. A ra sa moku tale, a ra sa kovea na kato ko ira na kai Filisitia, 10,11. Sa la'ki tukutuku e dua, a sa mate ko Ilai ni sa rogoca, 12-18. Sa vakasucu ka qai mate na wati i Finiase, 19-22.

¹ A ra sa lako yani ko ira na Isireli me ra veivala kei ira na kai Filisitia, a ra sa la'ki tiko mai Epenisa, a ra sa la'ki tiko mai Efeki na kai Filisitia.

² A ra sa tuvai ira vakaivalu ko ira na kai Filisitia me ra vala kei ira na Isireli: ia ni ra sa vala, sa mokuti ira na Isireli ko ira na kai Filisitia: a ra sa mokuti ira nai valu mai na veiwere, e le va beka na udolu na tamata.

³ A ra sa lako mai ki nai tikotiko ko ira na tamata, a ra sa kaya ko ira na nodra qase na Isireli, A cava sa mokuti keda kina edaidai ko Jiova e na matadra na kai Filisitia? me da kauta mai Sailo ki vei keda na kato ni veiyalayalati i Jiova, me yaco mai ki na keda maliwa, ka vakabulai keda mai na ligadra na noda meca.

⁴ Ia sa talaki ki Sailo ko ira na tamata, me ra kauta maikea na kato ni veiyalayalati i Jiova ni lewe vuqa, o koya sa tiko e na tadrua ni Jerupi: a rau sa tiko maikea kei na kato ni veiyalayalati ni Kalou koi rau na luve i Ilai, ko Ofinai kei Finiase.

⁵ Ia ni sa yaco mai ki nai tikotiko na kato ni veiyalayalati i Jiova, sa kaila ko ira kecega na Isireli e na kaila levu, a sa yavala kina na vanua.

⁶ Ia ni ra sa rogoca ko ira na kai Filisitia na rorogo ni kaila, era sa kaya, A cava nai balebale ni kaila levu oqo e na nodra i tikotiko na Iperiu? Era sa qai kila ni sa kau mai na kato i Jiova ki nai tikotiko.

⁷ A ra rere na kai Filisitia, ni ra sa kaya, Sa lako mai na Kalou ki nai tikotiko: a ra sa kaya, Isa! koi keda! ni sa sega ni vakaoqo eliu:

⁸ Isa! koi keda! o cei ena vakabulai keda mai na ligadra na kalou qaqa oqo? o ira oqo na kalou era a vakacataki ira na kai Ijipita e na mate ca kece mai na veikau.

⁹ Dou qaqa ka valavala vakatagane, na kai Filisitia, mo dou kakua ni qali vei ira na Iperiu, me vaka era a qali vei kemudou: ka dou i valavala vakatagane, ka ia nai valu.

¹⁰ A sa ia nai valu ko ira na kai Filisitia, a sa moku ko ira na Isireli, a ra sa dro ko ira yadua ki na nona vale laca: a sa ka levu sara na moku; a sa mate vei ira na Isireli e le tolu na oba era taubale.

¹¹ A sa kovei na kato ni Kalou; a rau sa vakamatei ko Ofinai kei Finiase na luve i Ilai.

¹² A sa dua na tamata vei ira na Penijamini sa cici mai nai valu, a sa lako mai ki Sailo e na siga ko ya, a sa kadresu na nonai sulu, a sa kabuya tu na uluna e na qele.

¹³ Ia ni sa lako mai, raica, sa tiko vakatawa ko Ilai e na dua nai tikotiko e na bati ni sala, ni sa ririkotaka na kato ni Kalou na yalona. Ia ni sa lako mai na tamata ka tukuna e na koro, sa qoqolou na koro taucoko.

¹⁴ A sa rogoca na rorogo ni qoqolou ko Ilai, a sa kaya, A cava nai balebale ni ue oqo? A sa lako vakatotolo mai na tamata, ka tukuna vei Ilai.

¹⁵ A sa ciwasagavulu ka walu na yabaki i Ilai; a sa buawa na matana ka sa sega ni rai rawa.

¹⁶ A sa kaya vei Ilai na tamata, Sai au ka lako mai nai valu, ka'u a dro edaidai mai nai valu. A sa kaya ko koya, A cava na ka sa yaco, na luvequ.

¹⁷ A sa vosa mai ko koya sa mai tukutuku, ka kaya, Sa dro ko ira na Isireli e matadra na kai Filisitia, a sa dua talega na moku levu vei ira na tamata, a sa mate talega koi rau na luvemu, ko Ofinai kei Finiase; a sa kovei na kato i Jiova.

¹⁸ Ia ni sa cavuta tiko ko koya na kato ni Kalou, sa qai bale sobu vakatadrai cake ko koya mai nai tikotiko sa voleka ki na matamata-ni-koro, a sa ramusu na domona, ka sa mate ko koya; ni sa qase ko koya, ka tamata bibi. A sa lewai ira oti na Isireli ko koya ka yabaki vasagavulu.

¹⁹ Ia sa bukete na vugona, na wati i Finiase, ka sa voleka ni vakasucu: ia ni sa rogoca ko koya nai rogorogo ni sa kovei na kato ni Kalou, ka sa mate na vugona kei na watina, sa cuva sobu ko koya ka vakasucu; ni sa qai taratara ko koya.

²⁰ Ia ni sa voleka ni ciba ko koya, sa kaya ko ira na yalewa era tiko vata kaya, Mo kakua ni rere; ni ko sa vakasucuma e dua na gonetagane. A sa sega ni vosa mai ko koya, ka sega ni vakarorogo.

²¹ A sa vakayacana na gone ko koya ko Ikapoti [Sa yali nai ukuuku], ni sa kaya, Sa qai takali vei ira na Isireli na nodra i ukuuku: ni sa kovei na kato ni Kalou, e na vuku talega ni vugona kei na watina.

²² Sa kaya talega ko koya, Sa takali vei ira na Isireli na ka era lagilagi kina; ni sa kovei na kato ni Kalou.