1 Samuela 31 - Vakavakadewa Makawa

Sa vala kei ira na Isireli ko ira na kai Filisitia, a sa mate ko Saula kei na luvena tolutolu, 1-6. Era sa biuta na nodra veikoro ko ira na Isireli, a ra sa tiko kina ko ira na kai Filisitia, 7. Era sa vakota na yago i Saula ki na bai mai Peci-sani, a ra sa lako na tamata qaqa vei ira na kai Jepesi, ka kauta tani, 8-13.

¹ Sa ra vala kei ira na Isireli ko ira na kai Filisitia: a ra sa dro tani ko ira na Isireli mai vei ira na kai Filisitia, ka ra bale mate mai na ulu-ni-vanua ko Kilipoa.

² A ra sa cici muri Saula, kei iratou na luvena, ko ira na kai Filisitia; ia ko ira na kai Filisitia era sa mokuti Jonacani, kei Epinatapi, kei Malikisua, o iratou na luve i Saula.

³ A sa gumatua vei Saula nai valu, a sa lau gasau ko koya vei ira na tamata dauvavana; a sa vuetaki vakalevu vei ira na dauvavana.

⁴ A sa kaya ko Saula vua sa daucolata na nonai yaragi, Ucuna na nomu i seleiwau, ka suaki au kina; de ra lako mai na tamata sa sega ni cili oqo, ka suaki au, ka vakalialiai au. A sa bese ko koya sa daucolata na nonai yaragi; ni sa rere vakalevu. A sa taura nai seleiwau ko Saula, ka baletaka.

⁵ Ia ni sa raica ko koya sa daucolata na nonai yaragi ni sa mate tu ko Saula, sa baletaka talega ko koya na nonai seleiwau, ka mate vata kaya.

⁶ A sa mate vata ko Saula, kei iratou na luvena tolutolu, kei koya sa daucolata na nonai yaragi, kei ira na nona tamata kecega, e na siga ko ya.

⁷ Ia ni ra sa raica ko ira na Isireli era sa tiko e na yasa ni buca kadua, kei ira era tiko mai tai kadua ni Joritani, ni ra sa dro na Isireli, a sa mate tu ko Saula kei iratou na luvena, era sa qai biuta na nodra veikoro, ka dro; a ra sa curuma ko ira na kai Filisitia ka tiko kina.

⁸ Ia e na mataka, ni ra sa lako na kai Filisitia me ra luvata tani na nodra i sulu na moku, era sa kunei Saula kei iratou na luvena tolutolu, ni ratou sa bale tu e na ulu-ni-vanua ko Kilipoa.

⁹ A ra sa tamusuka na uluna, ka luvata tani na nonai yaragi, ka ra vakatadu mata voli ki na nodra vanua na kai Filisitia, me ra tukuna e na bure ni nodra veimatakau, vei ira talega na tamata.

¹⁰ A ra sa ciqira na nonai yaragi e na bure i Aseteroci; a ra sa vakota na yagona ki na bai ni koro mai Peci-sani.

¹¹ Ia ni ra sa rogoca na kai Jepesi-kiliati na ka sa kitaka vei Saula ko ira na kai Filisitia,

¹² era sa cavu tu ko ira kecega na tamata qaqa, ka lako tu e na bogi taucoko ko ya, ka kevutaka sobu na yago i Saula, kei na yagodratou na luvena, mai na bai ni koro mai Peci-sani, ka tale mai ki Jepesi, ka vakama maikina.

¹³ A ra sa kauta na suidratou, ka buluta e na ruku ni dua na kau mai Jepesi, ka lolo ka bogi vitu.