1 Samuela 30 - Vakavakadewa Makawa

Era sa kabai Sikilaki ko ira na Amalekaiti, ka vakabobulataka na wati i Tevita, kei na wekadra na nona tamata, 1-6. Sa taroga na Kalou ko Tevita, a sa qai la'ki muri ira na Amalekaiti, 7-10. Era sa sota kaya e dua na kai Ijipita, a sa tukutuku vei Tevita, ka kauta vei ira na Amalekaiti, 11-15. Sa mokuti ira ko Tevita, ka vakabulai ira na bobula, ka taura nai toki ni valu a ka levu sara, 16-31.

¹ Ia ni sa lako mai ko Tevita kei ira na nona tamata ki Sikilaki e nai katolu ni siga, era a curuma vakaivalu ko ira na Amalekaiti na vanua mai na mata ni ceva kei Sikilaki, ka samuti Sikilaki, ka vakama e na bukawaqa;

² a ra sa vakabobulataki ira na yalewa era sa tiko kina: era sega ni vakamatea e dua e lailai se dua e levu, era kauti ira ga, ka lako yani e nodra i lakolako.

³ Ia ni ra sa tadu mai ki na koro ko Tevita kei ira na nona tamata, raica, sa vakamai e na bukawaqa; a sa vakabobulataki ko ira na watidra, kei ira na luvedra tagane, kei ira na luvedra yalewa.

⁴ A ra sa tagi vakadomoilevu ko Tevita kei ira na tamata era tiko kaya, ka ra sa droga kina ka sega ni tagi rawa.

⁵ A sa vakabobulataki na wati i Tevita ruarua, ko Eiinoami na yalewa ni Jesirieli, kei Apikali na yalewa ni Kameli na wati i Nepali.

⁶ A sa rarawa vakalevu ko Tevita; ni ra sa kaya na tamata me lauviri e na vatu ko koya, ni sa rarawa na yalodra na tamata kecega, ko ira yadua e na vuku ni luvena tagane kei na luvena yalewa: a sa vakaukauwataki koya ga ko Tevita e na vuku i Jiova na nona Kalou.

⁷ A sa kaya ko Tevita vei Epaiaca na bete, na luve i Eiimeleki, Mo kauta mada mai vei au na efoti. A sa kauta mai na efoti kivei Tevita ko Epaiaca.

⁸ A sa tarogi Jiova ko Tevita, ka kaya, Kevaka ka'u sa muria na mataivalu oqo au na vauci ira, se segai? A sa kaya vua ko koya, Mo muria; ni ko na vauci ira vakaidina, ka ia dina sara na veivakabulai.

⁹ A sa lako yani ko Tevita kei ira na tamata lewe ono na drau era tiko vata kaya, ka ra yaco ki na uciwai ko Pisori, a ra sa tiko kina ko ira na kenai murimuri:

¹⁰ Ia sa cicimuria ga ko Tevita kei ira na tamata e lewe va na drau: ia sa toka e le rua na drau na tamata, era sa malumalumu, ka sega ni qalo-kosova rawa na uciwai ko Pisori.

¹¹ A ra sa kunea mai na were e dua na kai Ijipita, ka ra kauta kivei Tevita, ka solia vua na kakana, a sa kana ko koya; a ra sa vagunuva e na wai;

¹² a ra sa solia vua e dua na tiki ni buli lolo, ka rua nai soso vua ni vaini: ia ni sa kana ko koya, sa lesu mai vua na yalona: ni sa sega ni kana, se gunu, ka siga tolu ka bogi tolu.

¹³ A sa kaya vua ko Tevita, Ko cei na nomu turaga? ko a lako talega maivei? A sa kaya ko koya, Koi au na cauravou ni Ijipita, ka nona tamata e dua na Amalekaiti; sa biuti au na noqu turaga, ni'u a tauvi mate ka sa qai bogi tolu:

¹⁴ keimami a lako vakaivalu ki na dua na vanua ki na mata ni ceva vei ira na Kireci, oqori talega sa nei Juta, kei na vanua ki na mata ni ceva vei ira na Kelepi; ia ko Sikilaki keimami a vakama e na bukawaqa.

¹⁵ A sa kaya vua ko Tevita, O sa kauti au sobu rawa vei ira nai valu ko ya, se segai? A sa kaya ko koya, Mo bubului vei au e na yaca ni Kalou, ni ko na sega ni vakamatei au, se soli au yani vua na noqu turaga, ka'u na qai kauti iko sobu ki na mataivalu ko ya.

¹⁶ Ia sa kauti koya sobu ko koya, ka raica, era sa robota na vanua, a ra sa kana ka gunu tiko, ka marau tiko, e na vuku ni toki levu kece era a kauta mai na nodra vanua na kai Filisitia, kei na nodra vanua na Juta.

¹⁷ A sa mokumokuti ira ko Tevita sa tekivu ni sa kida na mataka ka yacova na yakavi e na siga kadua: a sa sega ni bula vei ira e le dua na tamata, e le va ga na drau na cauravou era vodoka na kameli ka dro.

¹⁸ A sa rawata tale ko Tevita na ka kecega era a kovea ko ira na Amalekaiti: ka vakabula talega na watina ruarua ko Tevita.

¹⁹ Ka sa sega ni yali vei ira e dua na ka lailai se dua na ka levu, se na luvedra tagane se na luvedra yalewa, se nai toki, se dua na ka era a kovea me nodra: sa rawata kece tale ko Tevita.

²⁰ Sa taura talega ko Tevita na sipi kecega, kei na pulumokau, era sa vakauta me liutaka na manumanu tani, ka sa kaya, Oqo nai toki ni valu nei Tevita.

²¹ A sa lako mai ko Tevita vei ira na le rua na drau na tamata, era a malumalumu ka sega ni muri Tevita rawa, ko ira era a kaya me tiko mai na uciwai ko Pisori: a ra sa lako yani me tavaki Tevita, kei ira talega na tamata era tiko vata kaya: ia ni sa torovi ira na tamata ko Tevita, sa veikidavaki kei ira.

²² Era sa qai kaya ko ira kecega na tamata ca, kei ira na tamata ni vu-ni-ca, vei ira era a lako vata kei Tevita, Keitou na sega ni solia vei ira e dua na ka e nai toki eda sa taura, ni ra sa sega ni lako kei keda, a watidra ga kei na luvedra na tamata yadua, me ra kauti ira, ka lako yani.

²³ A sa kaya ko Tevita, Dou kakua ni cakava na ka oqo, na wekaqu, e na ka sa solia vei keda ko Jiova, o koya sa vakabulai keda, ka solia ki na ligada nai valu sa mai vala kei keda:

²⁴ ia ko cei ena vakarorogo vei kemudou e na ka oqo? me vaka na nonai votavota sa lako sobu ki nai valu, sa na vakakina na nonai votavota sa tiko kei nai yaya: ena tautauvata na nodra i votavota.

²⁵ Ia mai na siga ko ya sa lesia ko koya me vakakina vei ira na Isireli me kena lawa ka me vakabau tiko, ka yacova na siga oqo.

²⁶ Ia ni sa lako mai ki Sikilaki ko Tevita, sa vakauta eso nai toki vei ira na qase ni Juta, io vei ira na wekana, ka kaya, Raica, e dua na ka-ni-loloma vei kemudou e nai toki maivei ira na meca i Jiova;

²⁷ io, vei ira era tiko mai Peceli, vei ira talega mai Remoci-nekipa, vei ira talega mai Jatiri,

²⁸ vei ira talega mai Aroeri, vei ira talega mai Sifimoci, vei ira talega mai Esitimoa;

²⁹ vei ira talega mai Rakali, vei ira talega era tiko e na nodra veikoro na kai Jiramieli, vei ira talega era tiko e nodra veikoro na Kenaiti;

³⁰ vei ira talega mai Orima, vei ira talega mai Kori-asani, vei ira talega mai Ataki;

³¹ vei ira talega mai Epironi, kei na tikina kecega sa dautiko voli kina ko Tevita kei ira na nona tamata.