1 Samuela 28 - Vakavakadewa Makawa

Sa vala ko ira na Isireli kei ira na kai Filisitia, a sa qara e dua na yalewa daucurumi ko Saula me tukuna vua se sa na vakaevei nai valu, 1-11. Sa rairai vua ko Samuela, ka tukuna vua ni sa voleka mai na nona mate, 12-25.

¹ Ia e na gauna ko ya, era sa soqona vata na nodra veimataivalu ko ira na kai Filisitia, me ia nai valu; me ra veivala kei ira na Isireli. A sa kaya vei Tevita ko Akisi, Mo kila sara ni ko na lako vata kei au ki nai valu, o iko kei ira na nomu tamata.

² A sa kaya vei Akisi ko Tevita, O ni na kila vakaidina na ka ka'u sa cakava rawa na nomuni tamata. A sa kaya vei Tevita ko Akisi, O koya oqo ka'u sa lesi iko kina mo vakatawai au tikoga.

³ A sa mate eliu ko Samuela, a sa tagicaki koya oti ko ira kecega na Isireli, ka buluta mai Rama, io e na nona koro ga. A sa vakatakalitaki ira tani mai na vanua ko Saula na daucurumi, kei ira na dauveinita.

⁴ A ra sa soqoni vata ko ira na kai Filisitia, ka lako mai ka tiko mai Sunemi: a sa soqoni ira vata kecega na Isireli ko Saula, a ra sa la'ki tiko mai Kilipoa.

⁵ Ia ni sa raica ko Saula na nodra i valu na kai Filisitia, sa rere, ka sa taqaya vakalevu na lomana.

⁶ A sa tarogi Jiova ko Saula, a sa sega ni vosa vua ko Jiova e na tadra, se e na Urimi, se e na gusudra na parofita.

⁷ A sa kaya vei ira na nona tamata ko Saula, Dou qara mada e dua na yalewa sa daucurumi, me'u lako vua, ka tarogi koya. A ra sa kaya vua ko ira na nona tamata, Raica, sa tiko mai Edoa e dua na yalewa sa daucurumi.

⁸ A sa via vunitaki koya ko Saula, ka sulumaka nai sulu tani, ka lako, ko koya ka le rua na tamata, a ratou sa lako mai vua na yalewa e na bogi: a sa kaya ko koya, Mo cakai sausau mada e na vukuqu ni ko sa daucurumi, ka kauti koya cake mai vei au ka'u na cavuta vei iko.

⁹ A sa kaya vua ko koya na yalewa, Raica, ko sa kila na ka sa cakava ko Saula, ni sa vakamatei ira laivi era sa daucurumi, kei ira era sa dauveinita, mai na vanua; ia a cava ko sa via corita kina na noqu bula, me'u vakamatei?

¹⁰ A sa bubului vua ko Saula e na yaca i Jiova, ka vaka, Me vaka sa bula ko Jiova, ena sega ni yacovi iko e dua na ka ca e na vuku ni ka oqo.

¹¹ A sa kaya na yalewa, O cei me'u kauta cake mai vei iko? A sa kaya ko koya, Mo kauti Samuela cake mai vei au.

¹² Ia ni sa raici Samuela ko koya na yalewa, sa qoqolou vakadomoilevu: a sa vosa vei Saula na yalewa, ka kaya, A cava ko sa vakaisini au kina? ko Saula ga ko iko.

¹³ A sa kaya vua ko koya na tui, Mo kakua ni rere; a cava ko sa kunea? A sa kaya vei Saula na yalewa, Au sa raica e dua na kalou, ni sa lako cake mai na loma ni qele.

¹⁴ A sa kaya vua ko koya, Sa rairai me vakaevei ko koya? A sa kaya ko koya, Sa lako cake mai e dua na tamata qase; ka sa puloutaki e na dua nai tutuvi. Sa qai kila ko Saula ni sai koya ga ko Samuela, a sa cuva vaka ki na qele ka vakarokoroko.

¹⁵ A sa kaya vei Saula ko Samuela, A cava ko sa vakayavalati au kina, ka kauti au cake mai? A sa kaya ko Saula, Au sa leqa vakalevu; ni ra sa mai vala kei au na kai Filisitia, a sa lako tani vei au na Kalou, ka sega tale ni vosa vei au, sa segai e na gusudra na parofita, se e na tadra; ia ka'u a kacivi iko kina, mo vakatakila vei au na ka me'u cakava.

¹⁶ A sa kaya ko Samuela, Ia ka cava ko sa tarogi au kina, ni sa lako tani vei iko ko Jiova, a sa vuki me nomu meca?

¹⁷ A sa cakacaka ko Jiova e na vukuna me vaka na nona vosa ka'u a tukuna; ni sa kaliraka maivei iko na matanitu ko Jiova; ka solia vua na kai nomu, io vei Tevita:

¹⁸ ni ko a sega ni vakarorogo ki na vosa i Jiova, ka sega ni kitaka vei ira na Amalekaiti me vaka na nona cudru waqawaqa, o koya oqo sa cakava kina vei iko edaidai na ka oqo ko Jiova.

¹⁹ Ia ena soli ira na Isireli ko Jiova kei iko talega ki na ligadra na kai Filisitia: ia ko iko, kei iratou na luvemu, dou na tiko vata kei au e na mataka: ena solia talega ko Jiova na nodra i valu na Isireli ki na ligadra na kai Filisitia.

²⁰ A sa bale vakasauri sara ka dodo ki na qele ko Saula, a sa rere vakalevu e na vuku ni vosa i Samuela; a sa sega tale vua na kaukauwa; ni sa sega ni kana e na siga taucoko kei na bogi taucoko ko ya.

²¹ A sa toro vei Saula na yalewa, ka raica ni sa taqaya vakalevu ko koya, a sa kaya vua, Raica, sa vakarorogo na nomuni vada ki na nomuni vosa ka'u sa tauca ki ligaqu na noqu bula, ka'u sa talairawarawa ki na nomuni vosa ko a vosataka vei au:

²² ia mo ni qai muria na vosa ni nomuni vada, ka me'u vakarautaka mada e dua na kemuni kakana; ia mo ni kana, mo ni kaukauwa kina, ni kemuni sa lako tu yani e na nomuni lakolako.

²³ A sa bese ko koya, ka kaya, Au na sega ni kana. Ia eratou sa cikevi koya, koi rau na nona tamata kei koya na yalewa; a sa qai muria ko koya na nodratou vosa. A sa duri cake mai na qele ko koya, ka tiko e nai mocemoce.

²⁴ A sa tiko vua na yalewa mai vale e dua na luve ni pulumokau yago vinaka; a sa kusarawa ko koya, ka vakamatea, ka taura na madrai droka, ka natuka, ka vavia kina na madrai sa sega ni vakaleveni:

²⁵ a sa kauta kivei Saula, kivei rau talega na nona tamata; a ratou sa kana. Eratou sa qai cavu tu, ka lako yani e na bogi ko ya.