1 Samuela 27 - Vakavakadewa Makawa

Sa la'ki tiko kei tui Kaca ko Tevita, ni sa rerevaki Saula, 1-4. Sa soli vua ko Sikilaki, 5-7. Sa ia nai valu ko koya, a sa tukuna vakailasu vei tui Kaca, 8-12.

¹ A sa kaya e lomana ko Tevita, Au na mate ga e na dua na siga e na liga i Saula; sa sega na ka e vinaka cake vei au, ka me'u dro ga ki na nodra vanua na kai Filisitia; ena qai sega tale ni via qarai au ko Saula e na dua na nodra yasana na Isireli: au na qai bula mai na ligana.

² A sa cavu tu ko Tevita, ka lako yani vua na tui Kaca, ko Akisi na luve i Meoki, ko koya kei ira na tamata e lewe ono na drau era tiko vata kaya.

³ A sa tiko kei Akisi mai Kaca ko Tevita kei ira na nona tamata, na tamata yadua kei na nona lewe-ni-vale, io ko Tevita kei rau na watina ruarua, ko Eiinoami na yalewa ni Jesirieli, kei Apikali na yalewa ni Kameli na wati i Nepali.

⁴ A sa tukuni vei Saula ni sa dro ki Kaca ko Tevita; sa qai sega tale ni qarai koya.

⁵ A sa kaya vei Akisi ko Tevita, Kevaka ka'u sa kune loloma e matamuni, me soli vei au e dua na tikina e na dua na koro ki vanua, me'u tiko kina; ia ka cava me'u tiko kina kei kemuni e na koro vakaturaga koi au na nomuni tamata?

⁶ A sa soli Sikilaki vua ko Akisi e na siga ko ya: o koya oqo sa nodra koro kina na tui Juta ko Sikilaki, ka yacova na siga oqo.

⁷ Ia na kena dede na nona tiko ko Tevita e na nodra vanua na kai Filisitia, sa dua na yabaki ka va na vula.

⁸ A sa lako cake ko Tevita kei ira na nona tamata, ka vala kei ira na kai Kesuri, kei ira na kai Keseri, kei ira na Amalekaiti, ni ra sai taukei ni vanua eliu ko ira oqo, e na gaunisala ki Suri, ka yacova na vanua ko Ijipita.

⁹ A sa samuta na vanua ko Tevita, ka sega ni vakabula e dua na tagane se dua na yalewa, ka kauta yani na sipi, kei na pulumokau, kei na asa, kei na kameli, kei nai sulu, ka lesu mai, ka lako vei Akisi.

¹⁰ A sa kaya ko Akisi, Dou sa vala beka kei cei edaidai. A sa kaya ko Tevita, Keitou sa vala kei ira mai na mata ni ceva ki Juta, kei ira mai na mata ni ceva vei ira na kai Jiramieli, kei ira mai na mata ni ceva vei ira na Kenaiti.

¹¹ A sa sega ni vakabula ko Tevita e dua na tagane se dua na yalewa, me tukutuku ki Kaca, ni sa kaya, De ra tukuni keda, ka vaka, Sa cakacaka vakaoqo ko Tevita: ia sa na vakakina na nonai valavala e na veisiga kecega sa tiko kina e na nodra vanua na kai Filisitia.

¹² A sa vakadinati Tevita ko Akisi, ka sa kaya, Sa vakaboicataki koya vei ira na kai nona, na Isireli; ia sa na qai noqu tamata kina ko koya ka tawa mudu.