1 Samuela 26 - Vakavakadewa Makawa

Sa tukuni Tevita vei Saula ko ira na kai Sefi, 1-4. Sa vakabulai Saula ko Tevita ni sa rawarawa me vakamatea, 5-12. Sa vunauci Apineri kei Saula ko Tevita, a sa veivutuni ko Saula, 13-25.

¹ A ra sa lako mai kivei Saula ki Kipea ko ira na kai Sifi, ka kaya, Sa sega li ni vunitaki koya ko Tevita e na vanua cecere ko Ekila, ka donuya na Veikau?

² A sa ia ko Saula, ka lako sobu ki na veikau mai Sifi, kei ira e le tolu na udolu na tamata era sa digitaki tu mai vei ira na Isireli, me ra qarai Tevita e na veikau mai Sifi.

³ A sa la'ki tiko ko Saula e na ulu ni vanua ko Ekila, ka donuya na Veikau, e na bati ni sala. Ia sa tiko mai veikau ko Tevita; a sa raica ni sa mai muri koya ki na veikau ko Saula:

⁴ sa qai tala ko Tevita eso na tamata me ra yamata, a sa kila kina ni sa lako vakaidina mai ko Saula.

⁵ A sa ia ko Tevita, ka lako mai ki na tikina ka tiko kina ko Saula: a sa raica ko Tevita na tikina sa koto kina ko Saula, kei Apineri na luve i Neri, na kapiteni ni nonai valu: a sa tiko ko Saula e na yasana ni qiqi-ni-yaya, a ra sa koto vakavolivolita ko ira na tamata.

⁶ A sa vosa ko Tevita, ka kaya vei Eiimeleki na Itaiti, vua talega na luve i Seruaia, ko Apisai, na taci i Joapi, ka kaya, O cei me daru lako sobu kaya vei Saula ki nai tikotiko? A sa kaya ko Apisai, Au na lako sobu kei iko.

⁷ A rau sa lako kivei ira na tamata e na bogi ko Tevita kei Apisai; ka raica, sa moce koto ko Saula e na yasana ni qiqi-ni-yaya, a sa cokataki tu e na qele na nona moto ka voleka ki na uluna: a sa koto vakavolivoliti koya ko Apineri kei ira na tamata.

⁸ A sa kaya vei Tevita ko Apisai, Sa solia edaidai na nomu meca ki na ligamu na Kalou; ia oqo, me'u cokai koya vakadua mada e na moto ki na qele, ia ka'u na sega ni vakaruataka vua.

⁹ A sa kaya vei Apisai ko Tevita, Mo kakua ni vakamatea; o cei me dodoka na ligana vua ka lumuta ko Jiova, ka sega ni cala kina?

¹⁰ Sa kaya talega ko Tevita, Me vaka sa bula ko Jiova, ena yaviti koya ga ko Jiova; se na yaco na nona siga me mate kina, se na lako sobu ki nai valu, ka mate kina:

¹¹ me kakua sara vei au e na vuku i Jiova me'u dodoka yani na ligaqu vua ka lumuta ko Jiova; ia mo kauta mada na moto sa tu mai na uluna, kei na saqa wai, me daru qai lako.

¹² A sa kauta ko Tevita na moto kei na saqa wai mai na ulu i Saula; a rau sa lako yani, a sa sega na tamata e raica, ka sega e kila, ka sa sega e dua sa yadra mai: ni ra sa moce kecega; ka ni sa biti ira na moce lutu maivei Jiova.

¹³ A sa lako yani ki na yasana kadua ko Tevita, ka tu vakayawa e dela ni ulu-ni-vanua, me sa veiyawaki sara kei ira:

¹⁴ a sa kaci vei ira na tamata ko Tevita, vei Apineri talega na luve i Neri, ka kaya, O sa sega beka ni vosa mai, Apineri? A sa vosa mai ko Apineri, ka kaya, O cei ko iko sa kaci vua na tui?

¹⁵ A sa kaya vei Apineri ko Tevita, Sa sega li ni tagane qaqa ko iko? ia ko cei vei ira na Isireli e tautauvata kei iko? ia ka cava ko sa sega ni vakatawa kina na nomu turaga na tui? ni sa lako e dua na tamata me vakamatea na tui na nomu turaga.

¹⁶ Sa sega ni vinaka na ka oqo ko sa cakava. Me vaka sa bula ko Jiova, e dodonu mo dou mate, ni dou sa sega ni vakatawa na nomudou turaga, o koya ka lumuta ko Jiova. Ia dou liaca mada na nona moto na tui, kei na saqa wai ka tu mai uluna.

¹⁷ A sa kila na domo i Tevita ko Saula, ka kaya, Oqo na domomu, na luvequ Tevita, ne? A sa kaya ko Tevita, A domoqu ga, noqu turaga na tui.

¹⁸ A sa kaya ko koya, A cava sa muria kina vakaoqo na nona tamata na noqu turaga? a cava ka'u sa cakava? se cava na ca sa tu vei au?

¹⁹ Ia oqo, mo ni rogoca mada na noqu turaga na tui na vosa ni nomuni tamata. Kevaka sa vakauqeti kemuni ko Jiova mo noqu meca, me bau vinakata ko koya e dua nai madrali; ia kevaka ko ira ga na tamata, me vakarusai mada ko ira e na mata i Jiova; ni ra sa vakasevi au tani edaidai me'u kakua ni tiko e na vanua i Jiova, ka ra kaya, Mo la'ki qarava eso na kalou tani.

²⁰ O koya me qai kakua ni lutu tani ki na qele mai na mata i Jiova na noqu dra; ni sa lako voli mai na tui Isireli me qara e dua na kutu ni manumanu, me vaka sa vakasavi na toa ni veikau mai na veiulu-ni-vanua.

²¹ A sa kaya ko Saula, Au sa cala ga: mo lesu mada, na luvequ Tevita: ni'u na sega ni vakacacani iko tale, ni sa ka talei e matamu na noqu bula e na siga edaidai: raica, ka'u sa cakacaka vakalialia, ka'u sa cala vakalevu sara.

²² A sa vosa ko Tevita, ka kaya, Raica, sa tu na moto, kemuni na tui! ia me lako mai e dua vei ira na cauravou, ka kauta.

²³ Ia me sauma ko Jiova na nona yalododonu na tamata yadua kei na nona yalodina: ni sa soli kemuni ko Jiova ki na ligaqu edaidai, ia ka'u a bese ni dodoka yani na ligaqu vua ka lumuta ko Jiova.

²⁴ Ka raica, me vaka sa ka levu e mataqu na nomu bula e na siga oqo, me ka levu vakakina na noqu bula e na mata i Jiova, ka me vakabulai au ko koya mai na ka rarawa kecega.

²⁵ A sa kaya vei Tevita ko Saula, Mo kalougata, na luvequ Tevita; ko na cakava na ka levu, ka ko na gumatua tikoga. A sa lako yani ko Tevita e nonai lakolako, a sa lesu ko Saula ki na nona tikina.