1 Samuela 25 - Vakavakadewa Makawa

Sa mate ko Samuela, 1. Sa talaki vei Nepali ko Tevita, a sa vakarau la'ki cudruvi koya e na vuku ni nona vosa, 2-13. A sa vakayalovinakataki koya ko Apikali e na nona vosa vinaka, 14-35. Sa mate ko Nepali, a rau sa qai veiwatini ko Tevita kei Apikali, 36-44.

¹ Sa qai mate ko Samuela; ka ra sa soqoni vata ko ira kecega na Isireli, ka tagicaki koya, ka buluti koya e na nona vale mai Rama. A sa cavu tu ko Tevita, ka lako sobu ki na veikau mai Perana.

² A sa dua na tamata mai Maoni, sa tiko mai Kameli na nonai yau; a sa vutuniyau sara na tamata ko ya, sa tolu na udolu na nona sipi, ka dua na udolu na nona me: a sa ia tiko ko koya na veikoti ni nona sipi mai Kameli.

³ Ia na yaca ni tamata ko Nepali; ka sa yaca ni watina ko Apikali: sa yalewa yalomatua ko koya, a sa matavinaka; ia na tagane sa yalotakelo, ka sa ca na nonai valavala; a sa dua vei ira na Kelepi ko koya.

⁴ A sa rogoca mai veikau ko Tevita ni sa kotiva tiko na nona sipi ko Nepali:

⁵ sa qai tala ko Tevita e le tini na cauravou, a sa kaya ko Tevita vei iratou na cauravou, Dou lako cake ki Kameli, ka lako vei Nepali, ka cavuta na yacaqu vua, ka tarogi koya se sa vinaka ko koya se segai:

⁶ ia dou vosa vakaoqo vua sa tiko vinaka, Mo vakacegu ko iko, ka me vakacegu na nomu lewe-ni-vale, ia me tu vinaka talega na nomu ka kecega.

⁷ Ia ka'u sa qai rogoca sa tiko kei iko ko ira na dauveikoti sipi: ia era a tiko kei keitou ko ira na nomu i vakatawa ni manumanu, ia keitou a sega ni vakacacani ira, a sa sega e dua na ka sa yali vei ira e na gauna kece era a tiko kina mai Kameli.

⁸ Mo tarogi ira mada na nomu cauravou, ka ra na tukuna vei iko. Ia me ratou kune loloma e matamu ko iratou na cauravou: ni keitou sa lako mai e na siga vinaka: mo solia mada kivei ira na nomu tamata, kei na luvemu ko Tevita, eso na ka sa tu vei iko.

⁹ A sa lako ko iratou na cauravou nei Tevita, ka vosataka vei Nepali na vosa kecega ko ya e na yaca i Tevita, ka qai cegu.

¹⁰ A sa vosa mai ko Nepali vei iratou na tamata nei Tevita, ka kaya, O cei ko Tevita? ia ko cei na luve i Jese? era sa lewe vuqa na tamata e na gauna oqo era sa biuta yadua na nona turaga, ka dro:

¹¹ ia me'u taura beka na noqu kakana, kei na noqu wai, kei na noqu lewe ni manumanu ka'u sa vakamatea me kedra na noqu tamata dauveikoti sipi, ka solia vei ira na tamata ka'u sa sega ni kila se ra maivei?

¹² A ra sa gole ki na nodratou sala ko iratou na cauravou nei Tevita, ka lesu tale, ka la'ki tukuna vua na vosa kecega oqo.

¹³ A sa kaya ko Tevita vei ira na nona tamata, Dou dui vauca yadua na nomudou i seleiwau. A ra sa dui vauca vua na nonai seleiwau; ka sa vauca talega vua ko Tevita na nonai seleiwau: a ra sa muri Tevita cake e le va beka na drau na tamata; a sa le rua na drau era tiko ga kei nai yau.

¹⁴ Ia sa dua vei ira na cauravou sa tukuna vei Apikali na wati i Nepali, ka kaya, Raica, sa tala ko Tevita eso na tamata mai veikau me veikidavaki kei na neitou turaga; a sa cudru vei iratou ko koya.

¹⁵ Ia era a caka vinaka sara vei keitou ko ira na tamata, ka sega ni yaco vei keitou na ca, ka sega e dua na ka sa yali vei keitou e na veisiga kecega keitou a tiko vata kei ira, ni keitou a tiko e na veiwere:

¹⁶ era a neitou bai e na bogi kei na siga, e na veisiga kecega keitou a tiko kina kei ira, ni keitou a vakatawa tiko na sipi.

¹⁷ Ia oqo, mo kila ka lewa mada na ka mo cakava; ni sa nakiti na ka ca vua na neitou turaga, kei ira kece na nona lewe-ni-vale: ni sa luve ni vu-ni-ca ko koya ka sega e dua me vosa rawa vua.

¹⁸ A sa kusarawa ko Apikali, ka kauta e rua na drau nai buli madrai, ka rua na tavaya waini, ka lima na sipi sa vakarautaki oti, ka lima nai vakarau sila tavu, ka dua na drau nai soso vua ni vaini ka rua na drau nai buli lolo, ka vakavodoka ki na asa eso:

¹⁹ ka sa kaya vei ira na nona cauravou, Dou liutaki au yani: raica, au sa muri kemudou. Ia sa sega ni tukuna ko koya vei Nepali, na watina.

²⁰ Ia ni sa vodo lako e na asa, ka lako sobu ki ruku ni ulu-ni-vanua, raica, sa lako sobu me donui koya ko Tevita kei ira na nona tamata; a sa la'ki toro vei ira ko koya.

²¹ Ia sa kaya oti ko Tevita, E dina sa sega ni yaga na noqu vakatawa na nona ka kecega na tamata la oqo mai veikau, ka sega kina e dua na ka sa yali vua e nona ka kecega: ia sa vukica vei au, mei sau ni ka vinaka.

²² Me cakacaka vakakina na Kalou kivei ira na meca i Tevita, ka vakaikuritaka, kevaka ka'u sa vakabula e dua na nona tagane me yacova na mataka.

²³ Ia ni sa raici Tevita ko Apikali, sa kusarawa, ka sobu mai na asa, ka cuva vakatoboicu e na mata i Tevita, ka cuva sobu ki na qele,

²⁴ ka cuva ki na yavana, ka kaya, Me saumi vei au, noqu turaga, na ka ca: ia me'u vosa mada vei kemuni na nomuni vada, ia mo ni rogoca mada na vosa ni nomuni vada.

²⁵ Me kakua mada ni rarawa na yalo ni noqu turaga, e na vukuna oqo sa tamata ni vu-ni-ca, io ko Nepali: me vaka na yacana, sa vakakina ko koya; a yacana ko Nepali, a sa tu vua na lialia; ia koi au na nomuni vada, ka'u a sega ni raici iratou na cauravou ni noqu turaga, ko iratou ko ni a tala.

²⁶ Ia oqo, noqu turaga, me vaka sa bula ko Jiova, ka vaka sa bula na yalomuni, ni sa tarovi kemuni ko Jiova mo ni kakua ni lako yani me ia na veivakamatei, kei na sauma na ca sa caka vei kemuni, e na ligamuni: ia me ra vakataki Nepali mada ko ira na nomuni meca, kei ira era segata me vakayacora na ca vei kemuni na noqu turaga.

²⁷ Ia na ka-ni-loloma oqo au sa kauta mai na nomuni vada vei kemuni na noqu turaga, me soli vei ira na cauravou era muria na noqu turaga.

²⁸ Mo ni kakua mada ni cudruva na noqu cala na nomuni vada: ni na vakadeitaka vakaidina ko Jiova na nomuni vale na noqu turaga: ni ko sa kitaka tiko nai valu i Jiova koi kemuni na noqu turaga; ka sega na ca ena kune vei kemuni e na nomuni gauna kecega.

²⁹ Ia ka sa tu cake ga e dua na tamata me muri kemuni, ka qarai kemuni mo ni mate: ia ena vauci ga na yalomuni na noqu turaga e nai vau bula kei Jiova na nomuni Kalou; ia na yalodra na nomuni meca, ena rabotaki ira ko koya me vaka mai loma ni rabo.

³⁰ Ia ni na cakava oti ko Jiova vei kemuni na noqu turaga na ka vinaka kecega sa vosataka oti e na vukumuni, sa lesi kemuni mo ni nodra turaga na Isireli;

³¹ me qai kakua ni ka rarawa vei kemuni na ka oqo, se me ca kina na lomamuni na noqu turaga, ni sa vakadavei walega na dra ni tamata se na nomuni sauma na ka ca sa caka vei kemuni na noqu turaga: ia ni sa caka vinaka oti ko Jiova vei kemuni na noqu turaga, mo ni qai nanuma na nomuni vada.

³² A sa kaya vei Apikali ko Tevita, Me vakavinavinakataki ko Jiova na nodra Kalou na Isireli, o koya ka talai iko mai edaidai mo tavaki au;

³³ ia me vakavinavinakataki na nomu vuku, ia mo kalougata ko iko ka tarovi au edaidai me'u kakua ni ia na veivakamatei, ka sauma na ca sa caka vei au.

³⁴ Ia sa dina, me vaka sa bula ko Jiova na nodra Kalou na Isireli, o koya sa tarovi au me'u kakua ni vakacacani iko, kevaka ko a sega ni kusarawa ka lako mai me tavaki au, sa sega dina ni vo vei Nepali e dua na tagane me yacova na mataka.

³⁵ A sa taura ko Tevita mai vua na ka sa kauta mai, a sa kaya vua, Mo lako cake e na vakacegu ki na nomu vale; raica, au sa vakarorogo ki na nomu vosa, ka vinakati iko.

³⁶ A sa lesu yani vei Nepali ko Apikali: ka raica, sa caka magiti ko koya e na nona vale, ka sa vaka na magiti ni tui; a sa marau na yalo i Nepali, ni sa mateni sara ko koya: a sa sega ni tukuna vua ko koya e dua na ka se ka lailai se ka levu, ka me rarama mada na mataka.

³⁷ Ia e na mataka ni sa takali vei Nepali na waini, sa tukuna vei koya na watina na veika oqo: a sa mate na yalona e lomana, a sa yaco ko koya me vaka e dua na vatu.

³⁸ Ka sa oti beka e tini na bogi, sa qai yaviti Nepali ko Jiova, ka sa mate ko koya.

³⁹ Ia ni sa rogoca ko Tevita sa mate ko Nepali, sa kaya, Me vakavinavinakataki ko Jiova, o koya sa cudrutaka na vosa ca vei au, ka ia ko Nepali, a sa tarova na nona tamata mai na ka ca: ka ni sa vakalesuya ko Jiova nai valavala ca i Nepali ki na uluna. A sa talaki ko Tevita me vosa vei Apikali, ka me kau mai ko koya me watina.

⁴⁰ A ratou sa lako vei Apikali na tamata nei Tevita ki Kameli, a ratou sa vosa vua, ka kaya, Sa talai keitou vei iko ko Tevita, me kauti iko mo la'ki watina.

⁴¹ A sa cavu tu ko koya, ka vakacuva na matana vaka ki na qele, ka kaya, Raica, na nomu vada, ka me'u veiqaravi ga me'u vuya na yavadra na nona tamata na noqu turaga.

⁴² A sa kusarawa ko Apikali, ka la'ki vodoka na asa, a sa le lima na nona goneyalewa eratou muri koya; a sa muri iratou ko koya nai talaki i Tevita, a sa yaco me watina.

⁴³ Sa kauti Eiinoami talega na yalewa ni Jesirieli ko Tevita; a rau sa watina ruarua.

⁴⁴ Ia ko Saula sa solia oti na luvena ko Maikali, na wati i Tevita, kivei Paliti na luve i Leisi, o koya na kai Kalimi.