1 Samuela 24 - Vakavakadewa Makawa

Sa kosova laivi na bui ni sulu i Saula ko Tevita, ka vakabulai koya, 1-7. Erau sa veivosaki kei Saula, 8-22.

¹ Ia ni sa lesu ko Saula mai na nona muri ira na kai Filisitia, sa qai tukuni vua, ka vaka, Raica, sa tiko ko Tevita e na veikau mai Eni-keti.

² A sa kauta ko Saula e le tolu na udolu na tamata sa digitaki maivei ira kecega na Isireli, ka la'ki qarai Tevita kei ira na nona tamata e na dela ni veivatu ni me kila.

³ A sa lako mai ko koya ki na bai ni sipi sa tu e na bati ni sala, a sa dua na qara maikea; a sa curu kina ko Saula me vakara: a sa tiko ko Tevita kei ira na nona tamata e loma ni qara.

⁴ A ra sa kaya vei Tevita ko ira na nona tamata, Raica, oqo na siga ka vosa kina vei iko ko Jiova, Raica, ka'u na solia na nomu meca ki na ligamu, ia ko na kitaka vua na ka e vinaka vei iko. A sa tu ko Tevita, ka kosova lo na bui ni sulu nei Saula.

⁵ Ia ni sa oti, sa qai veivutuni ka sa rarawa na loma i Tevita ni sa kosova na bui ni sulu nei Saula.

⁶ A sa kaya ko koya vei ira na nona tamata, E na vuku i Jiova, me'u kakua sara ni kitaka na ka oqo vua na noqu turaga, o koya ka lumuta ko Jiova, ka me'u dodoka vua na ligaqu, ni sai koya ka lumuta ko Jiova.

⁷ A sa tarovi ira na nona tamata ko Tevita e na vosa oqo, ka sega ni laivi ira me ra vakacacani Saula. A sa cavu tu ko Saula mai na qara, ka lako yani.

⁸ A sa cavu tu emuri ko Tevita, ka curu yani e na qara, ka kaci vei Saula, ka kaya, Noqu turaga, na tui. A sa rai ki muri ko Saula, a sa cuva tutu ko Tevita.

⁹ A sa kaya vei Saula ko Tevita, A cava ko ni sa goleva kina na nodra vosa na tamata, ni ra sa kaya, Raica, sa segata ko Tevita me vakacacani kemuni?

¹⁰ Raica, e na siga edaidai ko ni sa kila ni sa qai soli kemuni oqo ki na ligaqu mai na qara ko Jiova: a ra sa kaya eso me'u vakamatei kemuni: ia ka'u a lomani kemuni; ka'u a kaya kina, Au na sega ni dodoka na ligaqu me'u vakacacana na noqu turaga; ni sa lumuti koya ko Jiova.

¹¹ Ia, na tamaqu, mo ni raica, io, mo ni raica na bui ni nomuni sulu e na ligaqu, ni'u a kosova na bui ni nomuni sulu, ka sega ni ka'u vakamatei kemuni, mo ni kila ka raica ni sa sega vei au na ca se na talaidredre, ia ka'u a sega ni cakava na ka ca vei kemuni; ia ko ni sa qarai au tiko me'u mate.

¹² Me lewa mada vei kedaru ko Jiova, ka cudruvaki au ko Jiova e na vukumuni: ia ena sega ni tarai kemuni na ligaqu:

¹³ Me vaka na vosa vakaibalebale sa daucavuta ko ira na qase eliu, Sa tubu nai valavala ca maivei ira na tamata i valavala ca; ia ena sega ni tarai kemuni na ligaqu.

¹⁴ Sa lako mai me muri cei na tui Isireli? ko cei ko ni sa ciciva mai? e dua na koli mate: e dua na kutu ni manumanu.

¹⁵ Ia me dauveilewai ko Jiova, ka me lewa vei kedaru, ka raica, ka dautotaki au, ka vakabulai au mai na ligamuni.

¹⁶ Ia ni sa vosa oti vakaoqo vei Saula ko Tevita, sa kaya ko Saula, A domomu oqo, na luvequ Tevita, se segai? A sa tagi vakadomoilevu cake ko Saula:

¹⁷ ka sa kaya vei Tevita ko koya, O sa yalododonu ga, ka'u sa cala koi au; ni ko sa caka vinaka vei au, ia ka'u a caka ca vei iko.

¹⁸ Ia ko sa vakatakila edaidai ni ko sa caka vinaka vei au: ni ko a sega ni vakamatei au, ni sa soli au ko Jiova ki na ligamu.

¹⁹ Ia kevaka sa kunea na nona meca e dua na tamata, ena laivi koya li me lako vakavinaka yani? Ia me sauma vakavinaka vei iko ko Jiova na ka ko sa cakava vei au edaidai.

²⁰ Ia oqo, raica, au sa kila sa dina ni ko na tui, ia ena vakataudeitaki vei iko na matanitu i Isireli:

²¹ ia mo bubului vei au e na yaca i Jiova, ni ko na sega ni vakawabokotaka na noqu kawa, ka sega talega ni bokoca na yacaqu mai na vale i tamaqu.

²² A sa bubului vei Saula ko Tevita. Sa qai lako yani ko Saula ki na nona vale; ia ko Tevita kei ira na nona tamata, era sa lako cake ki na koro ni drodro.