1 Samuela 23 - Vakavakadewa Makawa

Sa vakabulai ira na kai Kiila ko Tevita, 1-6. Sa rogoca ko Saula, ka via tauri Tevita, ia sa bula ko Tevita, 7-14. Sa lako vua ko Jonacani, 15-18. Sa tukuni koya ko ira na kai Sifi, 19-24. Sa qarai Tevita ko Saula, 25,26; a sa qai lesu me muri ira na kai Filisitia, 27,28; a sa lako ki Eni-keti ko Tevita, 29.

¹ A sa tukuni vei Tevita, ka vaka, Raica, era sa la'ki kabai Kiila ko ira na kai Filisitia, a ra sa butakoca na veirara ni samu sila.

² A sa tarogi Jiova ko Tevita, ka kaya, Me'u la'ki mokuti ira na kai Filisitia oqo, se me'u kakua? A sa kaya vei Tevita ko Jiova, Mo la'ki mokuti ira na kai Filisitia, ka vakabulai Kiila.

³ A ra sa kaya ko ira na tamata nei Tevita vei koya, Raica, keitou sa rere oqo e Juta: ia sa na levu cake kevaka keitou na lako ki Kiila ki na nodra veimataivalu na kai Filisitia.

⁴ Sa qai tarogi Jiova tale ko Tevita. A sa vosa vua ko Jiova, ka kaya, Mo cavu tu, mo lako sobu ki Kiila; ni'u na soli ira na kai Filisitia ki na ligamu.

⁵ A sa lako ko Tevita kei ira na nona tamata ki Kiila, ka veivala kei ira na kai Filisitia, ka kovea na nodra manumanu, ka mokuti ira e na moku levu. A sa vakabulai ira na kai Kiila ko Tevita.

⁶ Ia ni sa dro ko Epaiaca na luve i Eiimeleki kivei Tevita ki Kiila, sa lako sobu ko koya, ka kauta e ligana e dua na efoti.

⁷ A sa tukuni vei Saula ni sa lako mai ki Kiila ko Tevita: sa qai kaya ko Saula, Sa soli koya na Kalou ki na ligaqu; ni sa sogolati ki loma, ni sa curu ki na dua na koro sa vakaisogo ka vakasamugakagaka.

⁸ A sa kacivi ira na tamata kecega ko Saula me ia nai valu, ka me lako sobu ki Kiila, me buku na druadrua ni koro vei Tevita kei ira na nona tamata.

⁹ A sa kila ko Tevita ni sa nakita tiko na ka ca vua ko Saula; a sa kaya vei Epaiaca na bete ko koya, Mo kauta mada mai na efoti.

¹⁰ Sa qai kaya ko Tevita, I Jiova na Kalou i Isireli, sa rogoca vakavinaka na nomuni tamata ni sa nakita tiko ko Saula me lako mai ki Kiila, me vakarusa na koro e na vukuqu.

¹¹ Era na soli au yani na kai Kiila ki na ligana, se segai? ena lako sobu mai ko Saula, me vaka ka'u sa rogoca na nomuni tamata, se segai? I Jiova na Kalou i Isireli, mo ni tukuna mada vei au na nomuni tamata. A sa kaya ko Jiova, Ena lako sobu mai.

¹² A sa kaya ko Tevita, Era na soli au yani, kei ira na noqu tamata, ki na liga i Saula, ko ira na kai Kiila, se segai? A sa kaya ko Jiova, Era na soli kemudou yani.

¹³ Sa qai cavu tu ko Tevita, kei ira na nona tamata, era sa le ono beka na drau, ka lako tani mai Kiila, ka lako tu e na yasana era sa lako rawa kina. A sa tukuni vei Saula ni sa dro ko Tevita mai Kiila; ia sa sega kina ni lako yani.

¹⁴ A sa tiko mai veikau ko Tevita e na veitikina kaukauwa, a sa tiko e na ulu-ni-vanua e na veikau mai Sifi. A sa qarai koya e na veisiga kecega ko Saula, ia na Kalou sa sega ni soli koya ki na ligana.

¹⁵ A sa raica ko Tevita ni sa lako voli yani ko Saula me qarai koya me mate: a sa tiko ko Tevita mai na veikau mai Sifi, e na veikau.

¹⁶ A sa cavu tu ko Jonacani na luve i Saula, ka lako yani vei Tevita ki na vanua veikau, ka vakaukauwataki koya e na vuku ni Kalou.

¹⁷ A sa kaya vua ko koya, Mo kakua ni rere; ni na sega ni rawai iko na liga i Saula na tamaqu; ia ko na nodra tui na Isireli, ia koi au, ka'u na kemui karua; ia sa kila talega oqori ko Saula na tamaqu.

¹⁸ A rau sa veiyalayalati e na mata i Jiova: a sa tiko ga ko Tevita e na vanua veikau, a sa lako yani ko Jonacani ki na nona vale.

¹⁹ Era sa qai lako cake mai na kai Sifi kivei Saula ki Kipea, a ra sa kaya, Sa sega li ni vunitaki koya ko Tevita ka voleka vei keimami, e na veitikina kaukauwa e na vanua veikau, e na vanua cecere ko Ekila, sa no vaka ki na mata ni ceva ki na Veikau?

²⁰ ia oqo, mo ni lako sobu mada mai, na tui, me vaka na gagadre ni yalomuni mo ni lako sobu; ia ena neitou i tavi me soli koya ki na ligamuni na tui.

²¹ A sa kaya ko Saula, Mo ni kalougata maivei Jiova; ni dou a lomani au.

²² Dou lako mada yani, ka vakarau tale, ka kila ka raica na nona tikina sa dautiko kina, se ko cei sa raici koya maikina: ni sa tukuni vei au ni sa dauivalavala vaqaseqase sara ko koya.

²³ Ia dou rai voli mada, ka kila na tikina vuni kecega sa vunitaki koya kina, mo dou qai lesu tale mai vei au ni dou sa kila na kena dina, ia ka'u na lako vata kei kemudou: ia kevaka sa tiko e na vanua oqo, ka'u na qarai koya e na kedra maliwa na veiudolu kecega i Juta.

²⁴ A ra sa ia, ka liu yani vei Saula ki Sifi. Ia ko Tevita kei ira na nona tamata era sa tiko e na veikau mai Maoni, e na vanua cecelevu vaka ki na ceva mai na Veikau.

²⁵ A sa lako ko Saula kei ira na nona tamata, me qarai koya. A sa tukuni vei Tevita: a sa lako sobu ki na uluvatu, ka tiko e na veikau mai Maoni. Ia ni sa rogoca ko Saula, sa muri Tevita ki na veikau mai Maoni.

²⁶ A sa lako ko Saula e na yasa ni ulu-ni-vanua vaka, ia ko Tevita kei ira na nona tamata e na yasa ni ulu-ni-vanua vaka: a sa vakatotolo ko Tevita me dro tani vei Saula; ni sa vakavolivoliti Tevita kei ira na nona tamata ko Saula kei ira na nona tamata, me ra tauri ira.

²⁷ A sa lako mai vei Saula e dua na talai, ka kaya, Mo ni kusarawa, ka lako mai; ni ra sa curuma vakaivalu na vanua na kai Filisitia.

²⁸ A sa cegu ni muri Tevita ko Saula, ka lesu ka la'ki vala kei ira na kai Filisitia: o koya sa vakatokai kina na tikina ko ya ko Sela-amalikoci.

²⁹ A sa lako cake maikea ko Tevita, ka la'ki tiko e na veitikina kaukauwa mai Eni-keti.