1 Samuela 20 - Vakavakadewa Makawa

Sa dro mai Naioci ko Tevita, a sa la'ki bose kei Jonacani e na ka me bula kina, a sa vakabulai koya ko Jonacani: erau sa veiyalayalati, 1-42.

¹ A sa dro ko Tevita mai Naioci mai Rama, ka lako, ka kaya vei Jonacani, A cava ka'u a cakava? a cava na noqu cala, ka cava na noqu i valavala ca e na mata i tamamu, sa segata tiko kina ko koya me'u mate?

² A sa kaya vua ko koya, Me kakua sara oqo; o na sega ni mate: raica, ko tamaqu, sa sega ni kitaka e dua na ka levu se dua na ka lailai, ni sega ni tukuna mada vei au; ia a cava me vunia kina vei au na ka oqo ko tamaqu? ena sega ni vakakina.

³ A sa bubului tale ko Tevita, ka kaya, Sa kila vakaidina ko tamamu ni'u sa kune loloma vei iko: a sa kaya ko koya, Me kakua ni kila oqo ko Jonacani, de rarawa ko koya: ia me vaka sa dina ni bula ko Jiova, ka vaka sa bula na yalomu, sa vo ga me'u kalawa vakadua ga ka'u na qai mate.

⁴ A sa kaya vei Tevita ko Jonacani, A ka kecega sa lomamu, ka'u na kitaka ga e na vukumu.

⁵ A sa kaya vei Jonacani ko Tevita, Raica, sa vula vou e na mataka, ia e dodonu me keirau tiko vata kei na tui me kana; ia mo laivi au mada me'u la'ki vunitaki au e na were, me yaco mada nai katolu ni yakavi.

⁶ Kevaka sa bau tarogi au ko tamamu, mo kaya, Sa vakamasuti au matua ko Tevita me bau cici yani ki Pecileema na nona koro; ni sa caka kina nai soro vakayabaki e na vukudra na nona mataqali taucoko.

⁷ Kevaka sa mani kaya, Sa vinaka; au na vinaka na nomu tamata: ia kevaka sa cudru vakalevu ko koya, mo kila sa naki ca vei au ko koya.

⁸ Ia ko na qai caka vinaka vei au na nomu tamata, ni ko sa vakavuna vei au na nomu tamata me daru veiyalayalati e na yaca i Jiova: ia kevaka sa tu vei au e dua na ca, mo vakamatei au ko iko ga: ia ko na kauti au vei tamamu e na vuku ni cava?

⁹ A sa kaya ko Jonacani, Me yawa dina sara vei iko oqo me'u sega beka ni tukuna vei iko, kevaka ka'u a kila deivaka, ni sa nakita na ka ca vei iko ko tamaqu.

¹⁰ A sa kaya vei Jonacani ko Tevita, O cei ena tukuna vei au ke sa vosa vakacudrucudru vei iko ko tamamu?

¹¹ A sa kaya vei Tevita ko Jonacani, Daru lako yani ki na were. A rau sa lako yani ruarua ki na were.

¹² A sa kaya vei Tevita ko Jonacani, Ko Jiova na nodra Kalou na Isireli, ni'u sa vakataroga na loma i tamaqu e na gau-ni-siga vakaoqo e na mataka, se na bogi rua, kevaka sa dua na ka vinaka vei Tevita, ia ka'u na sega ni talaki vei iko, ka vakatakila vei iko,

¹³ me qai cakacaka vakakina vei Jonacani ko Jiova, ka me vakaikuritaka: ia kevaka sa via cakava vei iko na ka ca ko tamaqu, au na qai vakatakila vei iko, ka talai iko yani, mo lako e na vakacegu: ia me tiko vata kei iko ko Jiova, me vaka ka tiko vata kei tamaqu.

¹⁴ Ia mo kakua ni caka vinaka vei au walega e na vuku i Jiova ni'u sa bula tiko, me'u kakua ni mate:

¹⁵ ia me kakua talega ni mudu na nomu loloma vei ira na noqu lewe-ni-vale ka tawa mudu: ia me kakua ga, ni sa muduka tani oti ko Jiova na meca kecega i Tevita mai na dela i vuravura.

¹⁶ A sa ia na veiyalayalati ko Jonacani kei na lewe-ni-vale i Tevita, ka vaka ne, Me taroga ko Jiova vei ira na meca i Tevita.

¹⁷ A sa vakabubuluitaki Tevita tale ko Jonacani ni sa lomani koya; ni sa lomani koya me vaka sa lomana na yalona.

¹⁸ Sa qai kaya vei Tevita ko Jonacani, Sa na vula vou e na mataka: ia ko na tarogi ga, ni na lala na nomu i tikotiko.

¹⁹ Ia ni ko sa wawa ka bogi tolu, mo kusarawa sobu, ka lako ki na tikina ko a vunitaki iko kina e na siga sa ia kina na ka ko ya, ia mo tiko ga mai na vatu ko Eseli.

²⁰ Ia ka'u na vanataka e tolu na gasau ki na dua na yasa ni vatu, me vaka ka'u sa via vana e dua na ka.

²¹ Ia raica, au na tala na cauravou, ka vaka ne, Mo la'ki qara na gasau. Kevaka ka'u sa kaya vakadodonu vua na cauravou, Raica, sa no vaka mai ki ke na gasau, mo taura, mo qai lako mai: ni sa qai vinaka vei iko, ka sega na ca; me vaka sa bula ko Jiova.

²² Ia kevaka ka'u sa kaya vakaoqo vua na cauravou, Raica, sa no yani vaka ki liu na gasau; mo lako yani: ni sa talai iko yani ko Jiova.

²³ Ia e na vuku ni ka edaru sa veivosakitaka, raica, me lewai kedaru kina ko Jiova, ka sega ni mudu.

²⁴ A sa vunitaki koya mai na were ko Tevita; ia ni sa taqa na vula vou, sa tiko sobu na tui me kana.

²⁵ A sa tiko na tui e nonai tikotiko, me vaka sa daukitaka, io, e nonai tikotiko e voleka ki lalaga: a sa tu cake ko Jonacani, a sa tiko voleka kivei Saula ko Apineri, a sa lala na nonai tikotiko ko Tevita.

²⁶ A sa sega na ka e kaya ko Saula e na siga ko ya: ni sa nanuma, Sa yaco beka vua e dua na ka, sa sega kina ni savasava; sa sega dina ni savasava ko koya.

²⁷ Ia e na mataka, nai karua ni siga ni vula, sa lala na nonai tikotiko ko Tevita: a sa kaya ko Saula vei Jonacani na luvena, A cava e sega kina ni lako mai na luve i Jese me kana, e na noa se edaidai oqo?

²⁸ A sa kaya vei Saula ko Jonacani, Sa masuti au matua ko Tevita me lako ki Pecileema:

²⁹ a sa kaya ko koya, Mo laivi au mada me'u lako; ni sa dua nai soro sa ia ko iratou na neitou mataqali e na koro ko ya; ka sa vakarota vei au ko tuakaqu me'u lako kina: ia oqo, kevaka ka'u sa kune loloma e matamu, mo laivi au mada me'u la'ki raici iratou na wekaqu. O koya oqo sa sega kina ni lako mai ko koya ki na tepeli ni tui.

³⁰ A sa cudru sara ko Saula vei Jonacani, a sa kaya vua, O iko na luve ni yalewa yalovakatani ka talaidredre, au sa sega beka ni kila ni ko sa digitaki koya na luve i Jese mo vakamaduataki kina, me vakamaduataki talega kina ko tinamu ni sa luvawale?

³¹ ia e na veisiga kecega ena bula kina na luve i Jese e na dela ni vanua, ko na sega ni vakataudeitaki, se na nomu matanitu: ia oqo, mo talaki mo kauti koya mai vei au, ni sa dodonu me mate ko koya.

³² A sa vosa ko Jonacani vei Saula na tamana, ka kaya vua, E na vuku ni cava me vakamatei ko koya? a cava sa cakava?

³³ A sa cokataka vua na nona moto ko Saula me cokai koya: a sa kila kina ko Jonacani sa nakita ko tamana me vakamatei Tevita.

³⁴ A sa tu cake ko Jonacani mai na tepeli ni sa waqawaqa na cudru, ka sega ni kana e nai karua ni siga ni vula; ni sa rarawa na lomana e na vuku i Tevita, ka ni sa vakalialiai koya ko tamana.

³⁵ Ia e na mataka sa lako yani ki na were ko Jonacani me vaka erau a lokuca kei Tevita, a sa tiko vata kaya e dua na gonetagane.

³⁶ A sa kaya vua na nona gone ko koya, Mo cici mada, mo qara na gasau ka'u sa vanataka. Sa cici na gonetagane, a sa vanataka ko koya e dua na gasau me la'ki sivi koya.

³⁷ Ia ni sa yaco ki na tikina sa vanataka kina na gasau ko Jonacani, sa kaci vua na gonetagane ko Jonacani, ka kaya, Sa sega li ni no vaka ki liu vei iko na gasau?

³⁸ A sa kaci vua na gonetagane ko Jonacani, Mo kusarawa, mo vakatotolo, kakua ni wawa. A sa kumuna vata na gasau na gonetagane i Jonacani, ka lako mai vua na nona turaga.

³⁹ A sa sega ni kila e dua na ka na gonetagane: o Jonacani ga kei Tevita erau kila na ka ko ya.

⁴⁰ A sa solia ko Jonacani na nonai yaragi vei koya na nona gonetagane, a sa kaya vua, Mo lako, mo kauta ki na koro.

⁴¹ Ni sa lako yani na gonetagane, sa tu cake ko Tevita mai na yasana sa donuya na ceva, a sa cuva vakatoboicu ki na qele, ka cuva vakatolu: a rau sa veireguci, ka veitagicaki, a sa tagi vakalevu cake ko Tevita.

⁴² A sa kaya vei Tevita ko Jonacani, Mo lako ga e na vakacegu, ni daru sa bubului vata e na yaca i Jiova, ka vaka ne, Me lewai kedaru ko Jiova, kei na noqu kawa kei na nomu kawa ka sega ni mudu. A sa cavu tu ko koya ka lako yani: a sa lesu ki na koro ko Jonacani.