1 Samuela 19 - Vakavakadewa Makawa

Sa tukuna vei Tevita na vere i Saula ko Jonacani, 1-3. Sa masuti tamana ko Jonacani me bula ko Tevita, 4-7. Sa qara tale ko Saula me vakamatei Tevita, a sa vakabulai koya ko Maikali, 9-17. Sa dro kivei Samuela ko Tevita, a sa tala eso ko Saula me vakamatei koya, a sa yaco vei iratou na Yalo ni Kalou, a ratou sa parofisai, kei Saula talega, 18-24.

¹ A sa vosa vei Jonacani na luvena ko Saula, vei ira kece talega na nona tamata, me ra vakamatei Tevita.

² Ia sa vinakati Tevita vakalevu ko Jonacani, na luve i Saula: a sa tukuna vei Tevita ko Jonacani, ka vaka ne, Sa qara tiko ko Saula na tamaqu me vakamatei iko: ia mo qarauni iko mada e na mataka, ka tiko e na dua na tikina vuni, ka mo vunitaki iko:

³ ia ka'u na lako yani me keirau tu vata kei tamaqu e na were ko sa tiko kina, ia ka'u na vosataki iko vei tamaqu; ia ka'u na raica se sa na vakaevei, ka tukuna vei iko.

⁴ A sa vosataka na ka vinaka e na vuku i Tevita ko Jonacani kivei Saula na tamana, ka kaya vua, Me kakua ni kitaka na ka ca ko koya na tui, vei Tevita, na nona tamata; ni sa sega ni kitaka e dua na ka ca vei iko ko koya, ka ni sa vinaka sara na nonai valavala vei iko:

⁵ ni sa bolea sara na mate ko koya ka sa la'ki vakamatei koya na kai Filisitia, a sa cakava ko Jiova na veivakabulai levu vei ira kecega na Isireli: ko a raica, ka marau kina: e na vuku ni cava ko sa via cakava na ka ca vua na tamata sa sega ni cala, ka mo vakamatei Tevita walega?

⁶ A sa vakarorogo ko Saula ki na vosa i Jonacani: a sa bubului ko Saula, Me vaka sa bula ko Jiova, ena sega ni vakamatei ko koya.

⁷ A sa kacivi Tevita ko Jonacani, ka tukuna vua ko Jonacani na ka kecega oqo. A sa kauti Tevita vei Saula ko Jonacani, a sa dautiko vata kaya ko koya, me vaka eliu.

⁸ A sa ia tale nai valu: a sa lako yani ko Tevita, ka vala kei ira na kai Filisitia, ka mokuti ira e na veiraravui levu; a ra sa dro tani sara mai vua.

⁹ A sa curumi Saula na yalo ca maivei Jiova, ni sa tiko e nona vale ko koya, a sa taura e ligana na nona moto; a sa qiriqiri tiko ko Tevita.

¹⁰ A sa segata ko Saula me cokai Tevita me veituituitaki kei na lalaga e na moto; a sa lako lo yani ko koya mai vei Saula, a sa cokataka na moto ki na lalaga ko koya; a sa dro bula ko Tevita e na bogi ko ya.

¹¹ A sa tala yani ko Saula eso na tamata ki na vale i Tevita, me vakatawai koya, ka me ratou vakamatei koya e na mataka: ia sa tukuna vei Tevita ko Maikali na watina, ka kaya, Kevaka ko sa sega ni vakabulai iko e na bogi edaidai, ko na qai vakamatei e na mataka.

¹² A sa tukuci Tevita sobu ko Maikali mai na katuba lailai e cake: a sa lako yani ko koya, ka dro, ka sa bula

¹³ A sa kauta ko Maikali e dua na matakau, ka vakotora e nai mocemoce, a sa kauta nai lokoloko vutika ni me me kenai lokoloko, ka tutuvitaka e na dua nai tutuvi.

¹⁴ Ia ni sa tala ko Saula eso na tamata me kauti Tevita, sa kaya na yalewa, Sa tauvi mate ko koya.

¹⁵ A sa talai iratou na tamata ko Saula me la'ki raici Tevita, ka kaya, Dou kauti koya cake mai vei au e nai mocemoce, me'u vakamatei koya.

¹⁶ A ratou sa lako mai na tamata, ka raica, sa no e dua na matakau e nai mocemoce, a sa dua nai lokoloko vutika ni me sa nonai lokoloko.

¹⁷ A sa kaya vei Maikali ko Saula, A cava ko sa vakaisini au kina vakaoqo, ka tala yani na noqu meca me bula ko koya? A sa kaya vei Saula ko Maikali, Sa kaya vei au ko koya, Mo laivi au mada me'u lako; me'u vakamatei iko mei cavai?

¹⁸ A sa dro ko Tevita, ka bula, ka lako kivei Samuela ki Rama, ka tukuna vua na ka kecega ka cakava vua ko Saula. A rau sa lako kei Samuela me rau tiko mai Naioci.

¹⁹ A sa tukuni vei Saula, ka vaka ne, Raica, sa tiko mai Naioci e Rama ko Tevita.

²⁰ A sa tala ko Saula eso na tamata me tauri Tevita: ia ni ratou sa raica nai vavakoso parofita ni sa parofisai tiko, a sa tu ko Samuela ni sa lesi me liutaki ira, sa curumi iratou na tamata i Saula na Yalo ni Kalou, a ratou sa parofisai talega ko iratou.

²¹ A sa tukuni vei Saula, a sa tala eso na tamata tani, a ratou sa parofisai talega ko iratou. A sa tala vakatolu eso na tamata ko Saula, a ratou sa parofisai talega ko iratou.

²² A sa lako talega ki Rama ko koya, ka yaco ki nai keli wai levu mai Seku: a sa taro ko koya, ka vaka ne, Sa vakaevei ko Samuela kei Tevita? A sa kaya e dua, Raica erau sa tiko mai Naioci e Rama.

²³ A sa lako yani kina ko koya ki Naioci mai Rama: a sa curumi koya talega na Yalo ni Kalou, a sa lako yani ko koya ka parofisai lako, ka yaco sara ki Naioci mai Rama.

²⁴ A sa luvata talega ko koya na nonai sulu, ka parofisai talega ko koya e na mata i Samuela, a sa koto luvawale e na siga taucoko ko ya kei na bogi taucoko ko ya. O koya oqo sa kainaki kina, Sa tiko vata li ko Saula talega kei ira na parofita?