1 Samuela 18 - Vakavakadewa Makawa

Sa lomani Tevita ko Jonacani, 1-4. Sa vuvutaki Tevita ko Saula, 5-11, ka rerevaki koya, 12-16. Sa musuki Maikali na luvena vua me bacani koya, 20-27. Sa tiko kei Tevita ko Jiova, ka sai valavala vakavuku ko koya, 28-30.

¹ Ia ni sa vosa oti ko koya kivei Saula, sa kabita na yalo i Tevita na yalo i Jonacani, a sa lomani koya ko Jonacani me vaka sa lomana na yalona.

² A sa kauti koya ko Saula e na siga ko ya, ka sega ni laivi koya me lesu tale ki na vale nei tamana.

³ Erau sa qai veiyalayalati ko Jonacani kei Tevita, ni sa lomani koya me vaka sa lomana na yalona:

⁴ a sa luvata tani ko Jonacani na nonai curucuru sa vakaicurucuru kina, a sa solia vei Tevita, kei na nonai sulu, kei na nonai seleiwau talega, kei na nona dakai, kei na nonai vau-ni-sulu.

⁵ A sa daulako yani ko Tevita ki na yasana kecega sa talai koya kina ko Saula, ka sai valavala vakavuku tiko: a sa lesi koya ko Saula me lewai ira na tamata i valu, ka sa vinaka vei ira kecega na tamata, kivei ira talega era qaravi Saula.

⁶ Ia ni ra sa lako mai, ni sa lesu tale ko Tevita ni sa mokuta oti na kai Filisitia, era sa lako mai na yalewa mai na nodra koro kecega na Isireli, ka meke ka wate tiko, me ra la'ki tavaki Saula na tui, ka vakatibereli ka vakaapi ni ra sa reki tiko.

⁷ A ra sa veisausau ko ira na yalewa ni sa qiriqiri tiko, ka vaka, Sa mokuti ira na veiudolu ko Saula, Kei Tevita na veiudolu vakatini.

⁸ A sa cudru vakalevu ko Saula, ni sa ca vua na vosa ko ya; a sa kaya ko koya, Era sa cavuta vei Tevita na veiudolu vakatini, a ra sa cavuta vei au na veiudolu walega: ia sa vo beka ga me nona na matanitu?

⁹ A sa rai vakatani vei Tevita ko Saula mai na siga ko ya.

¹⁰ Ia e na mataka, sa dua na yalo ca sa curumi Saula mai vua na Kalou, a sa parofisai ko koya e loma ni vale: a sa qiriqiri ko Tevita e na ligana, me vaka sa daukitaka e na veisiga: a sa taura e ligana ko Saula na nona moto.

¹¹ A sa cokataka na moto ko Saula; ni sa kaya, Au na cokai Tevita me veituituitaki kei na lalaga. A sa leve vakarua ko Tevita ka dro tani vua.

¹² A sa rerevaki Tevita ko Saula, ni sa tiko vata kaya ko Jiova, ia sa lako tani vei Saula.

¹³ A sa talai koya yani ko Saula, me kakua ni rau tiko vata kaya, ka sa lesi koya me turaga ni dua na udolu na tamata; a sa daulako yani ka daulako mai ko koya e na matadra na tamata.

¹⁴ Ka sai valavala vakavuku e na ka kecega ko Tevita; a sa tiko vata kaya ko Jiova.

¹⁵ Ia ni sa raica ko Saula ni sai valavala vakavuku sara ko koya, sa rerevaki koya.

¹⁶ Ia sa lomani Tevita ko ira kecega na Isireli kei ira na Juta, ni sa daulako yani ka daulako mai e na matadra.

¹⁷ A sa kaya vei Tevita ko Saula, Raica na luvequ yalewa na ulumatua, ko Merapi, au na soli koya vei iko me watimu: ia mo qaqa ga e na vukuqu, ka kitaka nai valu i Jiova. Ni sa kaya lo ko Saula, Me kakua ni tarai koya na ligaqu, ia me tarai koya na ligadra na kai Filisitia.

¹⁸ A sa kaya vei Saula ko Tevita, O cei koi au? ka cava na noqu bula, se na mataqali i tamaqu e Isireli, me'u sa vugona na tui?

¹⁹ Ia e na gauna sa dodonu me musu kina vei Tevita ko Merapi, na luve i Saula, sa musu ga me wati i Atirieli na kai Miola.

²⁰ A sa lomani Tevita ko Maikali na luve i Saula: a sa tukuni vei Saula, ka sa vinaka vua na ka ko ya.

²¹ A sa kaya ko Saula, Au na musuki koya vua, me coriti koya, ka me tarai koya na ligadra na kai Filisitia. A sa kaya vakarua vei Tevita ko Saula, O sa na vugoqu edaidai.

²² A sa vakarota ko Saula vei ira era qaravi koya, Dou vosa lo ga vei Tevita, ka kaya, Raica, sa vinakati iko na tui, a ra sa lomani iko ko ira kece na nona tamata: ia mo vugona mada na tui.

²³ A ra sa vosataka na vosa oqo na tamata i Saula kivei Tevita. A sa kaya ko Tevita, Sa vaka na ka wale beka vei kemudou me'u vugona na tui, ni'u sa tamata wale ka dravudravua?

²⁴ A ra sa tukuna vei Saula ko ira na nona tamata, ka kaya, Sa vosa ko Tevita me vaka na vosa oqo.

²⁵ A sa kaya ko Saula, Dou kaya vakaoqo vei Tevita, Sa sega ni vinakata na tui nai yau e na vuku ni watimu, ka me dua ga na drau na vusodra na kai Filisitia, ka me cudruvaki na tui vei ira na nona meca. Ia sa nanuma ko Saula me ra vakamatei Tevita ko ira na kai Filisitia.

²⁶ Ia ni ra sa tukuna na ka oqo vei Tevita ko ira na nona tamata, sa qai vinaka vei Tevita me vugona na tui: a sa sega ni oti na kena bogi:

²⁷ sa qai cavu tu ko Tevita ka lako yani, ko koya kei ira na nona tamata, ka mokuta e le rua na drau vei ira na kai Filisitia: a sa kauta mai ko Tevita na vusodra, ka wilika vakaoti vua na tui, me vugona kina na tui. Ia ko Saula sa qai solia vua na luvena ko Maikali me watina.

²⁸ A sa raica ko Saula ka kila ni sa tiko kei Tevita ko Jiova; a sa lomani koya ko Maikali na luve i Saula.

²⁹ A sa levu cake na nona rerevaki Tevita ko Saula; a sa meca i Tevita tikoga ko Saula.

³⁰ Era sa qai lako yani na nodra turaga na kai Filisitia: ia ni ra sa lako yani, sa cakacaka vakavuku duaduaga ko Tevita vei ira kecega era qaravi Saula; a sa rogo vakalevu na yacana.