1 Samuela 17 - Vakavakadewa Makawa

Sa ra mai vala ko ira na kai Filisitia. 1-3. Ai tukutuku kei Kolaiaci na tamata levu, o koya sa vakamatea ko Tevita, 4-51. Era sa qai gumatua ko ira na Isireli, 52-54. Sa tarogi Tevita ko Saula, 55-58.

¹ Ia sa soqona vata na nodra veimataivalu ko ira na kai Filisitia me ra ia nai valu, a ra sa soqoni vata ki Soko, ka nei Juta, a ra sa tiko e na macawa i Soko kei Aseka mai Efesi-tamimi.

² A ra sa soqoni vata ko Saula kei ira na Isireli, ka la'ki tiko e na buca ko Ela, ka tuvai valu me donui ira na kai Filisitia.

³ Ia na kai Filisitia era sa tiko e na ulu-ni-vanua vaka, kei ira na Isireli era sa tiko e na ulu-ni-vanua vaka; ia sa tu e na kedra maliwa na buca.

⁴ A sa lako yani e na nodra i tikotiko na kai Filisitia e dua na tamata daubolebole, ko Kolaiaci na yacana, na kai Kaca, a kena balavu e ono na kiupiti ka dua na afa kiupiti.

⁵ A sa vakaisala parasa na uluna, a sa vakaisulu e nai sulu ni valu; ia na kena bibi ni sulu e lima na udolu na sikeli parasa.

⁶ A sa vakaivava parasa ko koya, a sa dua nai sasabai parasa e nai usouso ni domona.

⁷ Ia na kau ni nona moto sa vaka na nona kau na dautalisulu; ia na mata ni nona moto sa ono na drau na sikeli aironi; ka sa liu vei koya e dua sa colata nai sasabai.

⁸ A sa tu ko koya, ka kaci ki na nodra mataivalu na Isireli, ka kaya vei ira, Dou sa lako mai me tuvai valu e na vuku ni cava? au sega li ni kai Filisitia koi au, ia koi kemudou na tamata nei Saula? dou digitaka mada e dua na nomudou tamata, ka me lako sobu mai vei au.

⁹ Kevaka sa rawata ko koya me keirau veivala, ka sa vakamatei au, keimami na qai qaravi kemudou: ia kevaka ka'u sa gumatua vua, ka vakamatei koya, dou na qai neimami tamata, ka dou na mai qaravi keimami.

¹⁰ A sa kaya ko koya na kai Filisitia, Au sa bolei ira edaidai na nodra veimataivalu na Isireli; solia mada mai vei au e dua na tamata, me keirau vala kaya.

¹¹ Ia ni sa rogoca ko Saula kei ira kecega na Isireli na vosa oqo ni kai Filisitia, era sa yalolailai, ka rere vakalevu.

¹² Ia ko Tevita na luve ni kai Ifiraca mai Pecileema e Juta, na yacana ko Jese; ka sa le walu na luvena tagane: a sa wili vata na tamata ko ya kei ira na tamata qase e na gauna i Saula.

¹³ Ia sa lewe tolu na luve i Jese eratou sa qase, ka ratou sa la'ki muri Saula ki nai valu: ia na yacadratou na luvena tolutolu oqo ko Iliapi na ulumatua, na kenai karua ko Epinatapi, kei na kenai katolu ko Sama:

¹⁴ a sa gone vei iratou ko Tevita; ka muri Saula ko iratou na lewe tolu, eratou sa qase cake.

¹⁵ A sa veilakoyaki tu maivei Saula ko Tevita, me vakatawa na sipi nei tamana mai Pecileema.

¹⁶ A sa dautoro mai ko koya na kai Filisitia e na mataka kei na yakavi, ka dauvakaraitaki koya bogi vasagavulu.

¹⁷ A sa kaya ko Jese vei Tevita na luvena, Mo kauta mada vei iratou na tuakamu e dua na efa sila tavu oqo, kei nai buli madrai oqo e tini, ka cici ki nai tikotiko ni valu kivei iratou na tuakamu;

¹⁸ ka kauta nai buli wai-ni-sucu oqo e tini vei koya na nodra turaga ni udolu, ka vakaraici iratou na tuakamu se ratou tiko vinaka, ka kauta mai na kedratou i vakadinadina.

¹⁹ Ia ko Saula, kei iratou, kei ira kecega na Isireli, era sa tiko e na buca ko Ela, ka ra vala tiko kei ira na kai Filisitia.

²⁰ A sa sou e na mataka ko Tevita, ka laiva na sipi vua nai vakatawa, ka lako, ka kauta na ka ka vakarota vua ko Jese; a sa yaco ki na yasana ni qiqi-ni-yaya, ni sa lako tiko yani nai valu me ra vala, a ra sa kaila tiko mei ia nai valu:

²¹ ni ra sa tuvai valu oti ko ira na Isireli kei ira na kai Filisitia, na mataivalu e dua me veiqaravi kei na mataivalu kadua.

²² A sa laiva na nonai kaukau ko Tevita vei koya sa dauvakatawa nai yaya, ka cici ki nai valu, ka tarogi iratou na tuakana se ratou tiko vinaka.

²³ Ia ni ratou sa veivosaki tiko, raica, sa lako mai ko koya na daubole, na kai Filisitia mai Kaca, ko Kolaiaci na yacana, mai na nodra mataivalu na kai Filisitia, ka vosa me vaka na vosa ko ya: a sa rogoca ko Tevita.

²⁴ Ia ko ira kecega na Isireli, ni ra sa raica na tamata, era sa drotaki koya ka ra sa rere vakalevu.

²⁵ A ra sa kaya na Isireli, Dou sa raici koya na tamata oqo sa lako cake mai, se segai? sa lako cake mai me bolei ira na Isireli: ia na tamata sa na mokuti koya, ena vakavutuniyautaki koya vakalevu ko koya na tui, ka na solia na luvena yalewa vei koya, ka na sereka na mataqali i tamana me kakua ni qali e Isireli.

²⁶ A sa taroga ko Tevita vei ira na tamata sa tu voleka vua, ka kaya, A cava na ka sa na caka vua na tamata sa na mokuta na kai Filisitia oqo, ka kauta tani nai rogorogo ca maivei ira na Isireli? ni sa tamata maivei ko la na kai Filisitia tawa cili oqo, me bolea na nona mataivalu na Kalou bula?

²⁷ A ra sa kaya vakaoqo vua ko ira na tamata, Ena caka vakaoqo vua na tamata sa mokuti koya.

²⁸ A sa rogoca ko Iliapi, na tuakana ka ulumatua, ni sa vosa ko koya vei ira na tamata; sa qai cudru vei Tevita ko Iliapi, ka kaya, A cava ko a lako sobu mai kina ki ke? ia ko sa laiva vei cei na sipi ka vica wale oqori mai veikau? au kila na nomu viavialevu, kei na kena ca ni yalomu; ni ko sa lako sobu mai mo raica nai valu.

²⁹ A sa kaya ko Tevita, A cava beka ka'u sa cakava? sa sega beka na vuna?

³⁰ A sa vuki yani mai vua ki na dua tani, ka vosa me vaka na vosa ko ya; a ra sa kaya tale vua ko ira na tamata me vaka na nodra vosa eliu.

³¹ Ia ni sa rogo na vosa ka vosataka ko Tevita, era sa tukuna vei Saula; a sa talaki vua ko koya, me lako mada mai.

³² A sa kaya vei Saula ko Tevita, Me kakua ni yalolailai e dua na tamata e na vukuna; koi au na nomuni tamata au na lako, ka vala kaya na kai Filisitia oqo.

³³ A sa kaya vei Tevita ko Saula, O sa sega ni rawata mo lako vua na kai Filisitia oqo, mo drau vala kaya; ni ko sa cauravou ga, ia ko koya sa tamata dauvala mai na gauna ka cauravou kina,

³⁴ A sa kaya vei Saula ko Tevita, Koi au na nomuni tamata au a vakatawa tiko na sipi nei tamaqu; ka ni sa lako mai e dua na laioni, ka dua na pera, ka kauta tani e dua na luve ni sipi mai na qele ni sipi;

³⁵ ka'u a la'ki muri koya, ka yavita, ka vakabula mai na gusuna; ia ni sa gole mai vei au, ka'u a taura na kumina, ka yavita, ka vakamatea.

³⁶ Au sa vakamatea ruarua na laioni kei na pera koi au na nomuni tamata: ia na kai Filisitia tawa cili oqo ena vaka e dua vei rau, ni sa bolea na nona mataivalu na Kalou bula.

³⁷ A sa kaya talega ko Tevita, Ko Jiova, o koya ka vakabulai au mai na liga ni laioni, kei na liga ni pera, ena vakabulai au ko koya mai na ligana na kai Filisitia oqo. A sa kaya vei Tevita ko Saula, Mo lako, ia ena lako vata kei iko ko Jiova.

³⁸ A sa vakaisulutaki Tevita ko Saula e na nonai sulu, ka vakaisalataki koya e nai sala ni valu parasa; a sa vakaicurucurutaki koya e nai curucuru ni valu.

³⁹ A sa vauca ko Tevita na nonai seleiwau esau ni nonai sulu, a sa ia me lako, ni sa sega ni vakatovolea oti. A sa kaya vei Saula ko Tevita, Au sa sega ni lako rawa e na ka oqo; ni'u sa sega mada ni vakatovolea. A sa luvata tani ko Tevita.

⁴⁰ A sa taura e na ligana na nonai titoko, a sa digitaka e lima na vatu mulo mai na uciwai, ka tugana ki na taga ni vakatawa ni sipi sa kauta ko koya, io e na nona taga; ka sa taura e ligana na nonai rabo: a sa la'ki toro yani vua na kai Filisitia.

⁴¹ A sa lako mai na kai Filisitia ka toro vei Tevita; a sa liutaki koya na tamata ka kauta nai sasabai.

⁴² Ia ni veiraiyaki voli na kai Filisitia, ka kunei Tevita, sa beci koya; ni sa cauravou walega ko koya, ka sa damudamu, ka matavinaka.

⁴³ A sa kaya vei Tevita na kai Filisitia, Koi au beka na koli, ko sa lako mai kina vei au ka vakaititoko walega? A sa vatonaki Tevita na kai Filisitia ka cavuta na nona kalou.

⁴⁴ A sa kaya vei Tevita na kai Filisitia, Mo lako mai vei au, au na qai solia na lewemu ki na manumanu vuka, kei na manumanu ni vanua.

⁴⁵ Sa qai kaya vua na kai Filisitia ko Tevita, Ko sa lako mai vei au ka vakaiseleiwau, ka vakamoto, ka vakaisasabai: ia koi au, ka'u sa lako mai vei iko e na yaca i Jiova ni lewe vuqa; o koya na Kalou ni nodra mataivalu na Isireli, o ira ko a daubolea.

⁴⁶ E na siga oqo ena soli iko ko Jiova ki na ligaqu; ia ka'u na yaviti iko, ka tamusuka laivi na ulumu; au na solia talega na yagodra nai valu ni kai Filisitia e na siga oqo ki na manumanu vuka, kei na manumanu tawa lasa ni vanua; me ra kila ko ira kecega na kai vuravura ni sa dua na nodra kalou na Isireli:

⁴⁷ ka me ra kila talega kina ko ira nai vavakoso taucoko oqo ni sa sega ni ia na veivakabulai ko Jiova e nai seleiwau kei na moto; ni sa lewa nai valu ko Jiova, ka na soli kemuni talega ko koya ki na ligaimami.

⁴⁸ Ia ni sa tu na kai Filisitia ka mai tavaki Tevita, sa kusarawa ko Tevita, ka cici vaka ki nai valu me tavaki koya na kai Filisitia.

⁴⁹ A sa daramaka na ligana ko Tevita ki na taga, ka kauta maikina e dua na vatu, ka rabotaka, ka lauta na yadrena na kai Filisitia, a sa coba na vatu ki yadrena; a sa bale vakatoboicu ki na qele.

⁵⁰ A sa gumatua ko Tevita vei koya na kai Filisitia e nai rabo kei na vatu; ka mokuta na kai Filisitia, ka vakamatea; ia ka sa sega nai seleiwau e na liga i Tevita.

⁵¹ A sa cici ko Tevita, ka la'ki vaca na kai Filisitia, ka taura na nonai seleiwau, ka ucuna mai na kena taga, ka vakamatei koya, ka tamusuka laivi kina na uluna. Ia na kai Filisitia ni ra sa raica sa mate na nodra qaqa, era sa dro.

⁵² A ra sa ia ko ira na Isireli kei ira na Juta, ka kaila, ka cicimuri ira na kai Filisitia, ka yacova na buca kei na matamata-ni-koro ni Ekironi. Ia era sa bale e na sala ki Seereimi, io ka yacovi Kaca, kei Ekironi, ko ira na kai Filisitia era vuetaki.

⁵³ A ra sa tale mai na nodra muri ira na kai Filisitia, ko ira na Isireli, ka kauta nai toki mai na nodra i tikotiko.

⁵⁴ A sa taura na ulu ni kai Filisitia ko Tevita, ka kauta ki Jerusalemi; ia sa ciqira na nonai yaragi e na nona vale laca.

⁵⁵ Ia ni sa raici Tevita ko Saula ni sa la'ki tavaka na kai Filisitia ko koya, sa kaya ko koya vei Apineri na kapiteni ni valu, I Apineri, a luve i cei na cauravou oqo? A sa kaya ko Apineri, Me vaka sa bula na yalomuni, na tui, au sa sega ni kila.

⁵⁶ A sa kaya na tui, Mo taroga, se sa luve i cei na cauravou oqo.

⁵⁷ Ia ni sa lesu mai ko Tevita ni sa mokuta oti na kai Filisitia, sa tuberi koya ko Apineri, ka kauta vei Saula, ni sa taura tu e ligana na ulu i koya na kai Filisitia.

⁵⁸ A sa kaya vua ko Saula, A luve i cei ko iko, na cauravou? A sa kaya ko Tevita, Na luvena na nomuni tamata ko Jese, na kai Pecileema.