1 Samuela 16 - Vakavakadewa Makawa

Sa talai ko Samuela me lumuti Tevita, 1-13. Sa vakararawataki Saula ko Jiova; a sa lakovi kina ko Tevita me mai qiriqiri, a sa vinaka kina ko Saula, 14-23.

¹ A sa kaya vei Samuela ko Jiova, Sa na bogi vica mada na nomu tagicaki Saula tiko, ni ka'u sa biuti koya me kakua ni nodra tui na Isireli? mo vakasinaita mada na nomu tavaya e na waiwai, ka lako, au na talai iko vei Jese na kai Pecileema: ni'u sa kunea e dua vei ira na luvena me'u lesia me tui.

² A sa kaya ko Samuela, Au na lako vakaevei? Ke sa rogoca ko Saula, ena qai vakamatei au. A sa kaya ko Jiova, Mo kauta mada e dua na luve ni pulumokau yalewa, ka kaya, Au sa lako me ia nai soro vei Jiova.

³ Ia mo kacivi Jese ki nai soro, ia ka'u na vakatakila vei iko na ka mo cakava: ia ko na lumuti koya vei au ka'u na cavuta vei iko.

⁴ A sa kitaka ko Samuela na ka ka kaya ko Jiova, a sa lako yani ki Pecileema. A ra sa lako vakaninini mai na qase ni koro me tavaki koya, a ra sa kaya, O sa lako vakavinaka mai, se segai?

⁵ A sa kaya ko koya, Vakavinaka ga; au sa lako mai me ia nai soro vei Jiova: dou vakasavasavataki kemudou, me da lako vata me ia nai soro. A sa vakarautaki Jese ko koya kei iratou na luvena, ka kacivi iratou ki nai soro.

⁶ Ia ni ratou sa lako mai, sa raici Iliapi ko koya, ka kaya, Sa tu vakaidina beka e na mata i Jiova na nona lumuti.

⁷ A sa kaya vei Samuela ko Jiova, Mo kakua ni raica na matana, se na kena balavu; ni'u sa sega ni digitaki koya: ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova.

⁸ A sa kacivi Epinatapi ko Jese, ka me lako tu e na mata i Samuela. A sa kaya ko koya, Oqo talega, sa sega ni digitaka ko Jiova.

⁹ Sa qai kacivi Sama ko Jese me lako mai. A sa kaya ko koya, Oqo talega, sa sega ni digitaka ko Jiova.

¹⁰ A sa kauti iratou na luvena tagane vituvitu ko Jese me ratou lako tu e na mata i Samuela. A sa kaya vei Jese ko Samuela, Sa sega ni digitaki iratou oqo ko Jiova.

¹¹ A sa kaya vei Jese ko Samuela, Sa oti kece mai ko iratou na luvemu, se segai? A sa kaya ko koya, Sa vo ga e dua, o koya sa gone, ka raica, sa vakatawa sipi tiko ko koya. A sa kaya vei Jese ko Samuela, Mo talaki mada me kauti koya mai; ni datou na sega ni tiko sobu ka me lako mada mai ko koya.

¹² A sa talaki, ka kauti koya mai. A sa damudamu ko koya, ka sa matavinaka, ka vinaka na kenai rairai. A sa kaya ko Jiova, Mo ia, mo lumuti koya, ni sai koya ga oqo.

¹³ A sa taura na tavaya waiwai ko Samuela, ka lumuti koya e na kedra maliwa na tuakana: a sa daucurumi Tevita na Yalo i Jiova mai na siga ko ya. A sa ia ko Samuela, ka lako yani ki Rama.

¹⁴ Ia sa lako tani na Yalo i Jiova vei Saula, a sa dauvakarerei koya e dua na yalo ca maivei Jiova.

¹⁵ A ra sa kaya vei Saula ko ira era sa qaravi koya tiko, Raica, sa dauvakarerei kemuni e dua na yalo ca mai vua na Kalou:

¹⁶ ni vosa mada na neitou turaga vei keitou na nomuni tamata sa dautiko e matamuni, me qarai e dua na tamata sa kena matai ni qiri api: ia ni sa yacovi kemuni na yalo ca mai vua na Kalou, ena qiriqiri ko koya e na ligana, ko ni na qai vinaka kina.

¹⁷ A sa kaya ko Saula vei ira era sa qaravi koya tiko, Dou qara mada e dua na tamata sa dauqiriqiri vakavinaka, ka kauta mai vei au.

¹⁸ A sa vosa mai e dua vei ira na cauravou, ka kaya, Raica, ka'u sa kunea e dua na luve i Jese na kai Pecileema, sa dau ni qiriqiri, a tamata kaukauwa ka qaqa, kei na tamata i valu, ka vuku e na vosa, a tamata vatukai vinaka, a sa tiko kaya ko Jiova.

¹⁹ A sa tala eso na tamata vei Jese ko Saula, ka vaka, Mo talai Tevita mai vei au, o koya na luvemu ka tiko kei na sipi.

²⁰ A sa kauta ko Jese e dua na asa sa cola madrai ka dua na tavaya waini, ka dua na luve ni me, ka talai Tevita na luvena me kauta vei Saula.

²¹ A sa lako mai kivei Saula ko Tevita, ka tu e matana; a sa lomani koya vakalevu, ka sa lesi koya me daucolata na nonai yaragi.

²² A sa talaki vei Jese ko Saula, ka kaya, Me tiko mada ga vei au ko Tevita; ni sa kune loloma e mataqu.

²³ Ia ni sa tauvi Saula na yalo ca mai vua na Kalou, sa taura na api ko Tevita, ka qiria e na ligana: a sa vakacegu ko Saula, ka sa vinaka ko koya, a sa lako tani vua na yalo ca.