1 Samuela 14 - Vakavakadewa Makawa

Sa mokuta e dua na tabai valu ni kai Filisitia ko Jonacani, 1-14. Era sa veimokuti vakataki ira ko ira na kai Filisitia, sa qai cici muri ira ko Saula kei ira na Isireli, 15-23. Sa vakaloloma ko ira na tamata e na nona bubului ko Saula, ka vakacataka ko Jonacani, 24-30. Era sa sega ni muria nai vakaro ko ira na tamata, ni ra viakana, 31-34. Sa taroga na Kalou ko Saula, a sa sega ni vosa vua ko koya, 36,37. Sa ia na vakawirimadigi, me kilai kina se ko cei e cala, 38-42; a sa vaka ko Saula me mate ko Jonacani, a sa vakabulai koya ko ira na tamata, 43-46. Sa gumatua ko Saula, 47-52.

¹ Ia e na dua na siga sa kaya ko Jonacani na luve i Saula vua na cauravou sa daucolata na nonai yaragi, Daru lako yani ki na nodra i tikotiko ni valu na kai Filisitia, sa tu mai na yasana kadua. A sa sega ni tukuna vei tamana.

² A sa tiko ko Saula mai nai yalayala kei Kipea e ruku ni vu ni pomekaraneti sa tu mai Mikironi: ia ko ira era tiko kaya sa le ono beka na drau na tamata;

³ kei Eaia, na luve i Eiitupi, na tuakai i Ikapoti, na luve i Finiase, na luve i Ilai na bete i Jiova mai Sailo, a sa vakaisulu lako e na dua na efoti. A ra sa sega ni kila ko ira na tamata ni sa lako yani ko Jonacani.

⁴ Ia e na macawa ni lakolako sa vakatovolea ko Jonacani me lako yani kina ki na nodra i tikotiko ni valu na kai Filisitia, sa dua na vatu momoto e na kena yasana oqo, ka dua na vatu momoto mai na yasana ko ya: ia na yacana e dua ko Posesi, kei na yaca ni kenai karua ko Sene.

⁵ A yasana e dua sa qarava na tokalau me donui Mikimasi, ia na kenai karua sa qarava na ceva me donui Kipea.

⁶ A sa kaya ko Jonacani vua na cauravou sa daucolata na nonai yaragi, Daru lako yani ki na nodra i tikotiko ni valu na tawa cili oqori; ena cakacaka beka e na vukudaru ko Jiova: ni sa sega ni dredre vei Jiova me ia na veivakabulai se ra lewe vuqa se ra lewe lailai.

⁷ A sa kaya vua ko koya sa daucolata na nonai yaragi, Mo kitaka na ka kecega sa tu e lomamu: mo lako yani, raica, ka'u sa tiko vata kei iko me vaka na lomamu.

⁸ A sa kaya ko Jonacani, Raica, edaru na lako yani kivei ira na tamata oqori, ka vakaraitaki kedaru vei ira.

⁹ Kevaka era na kaya vei kedaru vaka ne, Drau tiko mada, me keitou lako yani vei kemudrau; edaru na qai tiko mada e na nodaru tikina, ka sega ni lako cake vei ira.

¹⁰ Ia kevaka era na kaya vakaoqo, Drau lako cake mai vei keimami; edaru na qai lako cake; ni sa soli ira ko Jiova ki na ligadaru: ia sa kenai vakadinadina vei kedaru oqo.

¹¹ A rau sa vakaraitaki rau ki na nodra mataivalu na kai Filisitia: a ra sa kaya na kai Filisitia, Raica, era sa lako mai na Iperiu mai na veiqara era a vunitaki ira kina.

¹² Ia sa vosa ko ira na mataivalu vei Jonacani kei koya sa daucolata na nonai yaragi, ka kaya, Drau lako cake mai vei keimami, ia keimami na vakatakila vei kemudrau e dua na ka. A sa kaya ko Jonacani vei koya sa daucolata na nonai yaragi, Mo muri au mai; ni sa soli ira ko Jiova ki na ligadra na Isireli.

¹³ A sa cabe cake e na ligana kei na yavana ko Jonacani, a sa muri koya ko koya sa daucolata na nonai yaragi, a ra sa bale mate e na mata i Jonacani; ia sa muri koya ko koya sa daucolata na nonai yaragi, ka veiraravui lako.

¹⁴ Ia na moku oqo ka rau kitaka ko Jonacani kei koya sa daucolata na nonai yaragi, sa le ruasagavulu beka na tamata, e na dua na tiki ni vanua lailai.

¹⁵ A sa dua na sautaninini levu e nai tikotiko, e na veiwere, vei ira kece talega na tamata: ko ira na mataivalu, kei ira na dauyayana, era sa sautaninini talega; a sa yavala na vanua: sa dua na ka levu vakaidina na sautaninini ko ya.

¹⁶ Ia sa rai yani ko ira na tamata sai vakatawa nei Saula mai Kipea nei Penijamini; ka raica, era sa vakayaliyali na lewe vuqa, ka ra sa veiseyaki voli.

¹⁷ A sa kaya ko Saula vei ira na tamata era tiko vata kaya, Dou wilika mada na tamata; ka raica se ko cei sa lako tani vei keda. A ra sa wilika, ka raica, sa yali ko Jonacani kei koya sa daucolata na nonai yaragi.

¹⁸ A sa kaya vei Eaia ko Saula, Mo kauta mada mai na kato ni Kalou. Ni sa tiko kei ira na Isireli na kato ni Kalou e na gauna ko ya.

¹⁹ Ia ni sa vosa tiko vei koya na bete ko Saula, sa ka levu cake tiko na ue, e na nodra i tikotiko ni valu na kai Filisitia: a sa kaya vua na bete ko Saula, Mo kakua mada.

²⁰ Ia era sa kaila vata ko Saula kei ira na tamata kecega era tiko vata kaya, a ra sa lako ki nai valu: ka raica, era sa veiraravui vakataki ira e nai seleiwau, a sa ia kina e dua na moku levu sara:

²¹ ia ko ira na Iperiu era tiko makawa kei ira na kai Filisitia, ka lako vata kei ira mai na veiyasana voleka ki na nodra i tikotiko, era sa vuki tale me nodra i to na Isireli era tiko vata kei Saula kei Jonacani.

²² Ia ko ira kece talega na Isireli era a vunitaki ira e na ulu-ni-vanua ko Ifireimi, ni ra sa rogoca era sa dro na kai Filisitia, era sa cici talega ka muri ira e nai valu.

²³ A sa vakabulai ira na Isireli ko Jiova e na siga ko ya; a sa lako nai valu ka yacovi Peci-aveni.

²⁴ A ra sa vakaloloma ko ira na Isireli e na siga ko ya; ni sa vakabubuluitaki ira na tamata ko Saula, ka vaka, Me cudruvi na tamata sa na kania e dua na kakana, ka me yakavi mada, me'u cudruvi ira mada na noqu meca. A ra sa sega ni kania e dua na kakana ko ira na tamata.

²⁵ Sa ra qai yaco na tamata kecega ki na dua na veikau; a sa no e na qele na oni.

²⁶ Ia ni ra sa lako ki na veikau na tamata, raica, sa titiri tiko na oni; ia ka sa sega na tamata sa kauta na ligana ki na gusuna; ni ra sa rerevaka na bubului ko ira na tamata.

²⁷ Ia ko Jonacani sa sega ni rogoci tamana ni sa vakabubuluitaki ira na tamata; a sa dodoka na mua ni titoko sa qumia tiko na ligana, ka tonisua e na qa ni oni, ka kauta na ligana ki na gusuna; a sa rai vinaka kina na matana.

²⁸ A sa vosa mai e dua vei ira na tamata, ka kaya, Ko tamamu sa vakabubuluitaki ira na tamata, ka vaka, Me cudruvi na tamata sa kania e dua na kakana edaidai. A ra sa malumalumu ko ira na tamata.

²⁹ A sa kaya ko Jonacani, Sa vakararawataki ira na lewe ni vanua ko tamaqu; raica mada, ni sa rarama mai na mataqu ni'u sa kania vakalailai na oni oqo:

³⁰ ka na sega ni levu cake kevaka era sa kana edaidai ko ira na tamata e nai toki ni nodra meca era sa kunea? ia sa qai sega ni levu na moku edaidai vei ira na kai Filisitia.

³¹ A ra sa yaviti ira na kai Filisitia e na siga ko ya mai Mikimasi ka yaco ki Eijaloni: a ra sa malumalumu sara na tamata.

³² A ra sa vakariri ki nai toki ni valu ko ira na tamata, ka taura eso na sipi, kei na pulumokau, kei na luve ni pulumokau, ka vakamatea e na qele: a ra sa kania vata kei na dra ko ira na tamata.

³³ A sa tukuni vei Saula, ka vaka, Raica, era sa cala sara vei Jiova ko ira na tamata ni ra sa kania vata kei na dra. A sa kaya ko koya, Dou sa cala sara: dou vaqiqica mai vei au edaidai e dua na vatu levu.

³⁴ A sa kaya ko Saula, Dou dui lako voli e na kedra maliwa na tamata, ka kaya vei ira, Ni kauta mai vei au ki ke na tamata yadua na nona pulumokau, kei na tamata yadua na nona sipi, ka vakamatea eke, ka kania: ia mo ni kakua ni caka cala vei Jiova ni kemuni kania vata kei na dra. A ra sa kauta mai e na bogi ko ya na nona pulumokau ko ira na tamata yadua, ka vakamatea e na tikina ko ya.

³⁵ A sa cakava ko Saula e dua nai cabocabo-ni-soro vei Jiova: ko ya nai matai ni cabocabo-ni-soro sa cakava ko koya vei Jiova.

³⁶ A sa kaya ko Saula, Me da muri ira sobu na kai Filisitia e na bogi, ka kovei ira tiko ka me rarama mada na mataka, ia me da kakua ni vakavoca vei ira e dua na tamata. A ra sa kaya, Mo kitaka na ka kecega sa vinaka vei kemuni. A sa kaya ko koya na bete, Me da toro mada vua na Kalou ki ke.

³⁷ A sa taroga na Kalou ko Saula, Me'u muri ira sobu na kai Filisitia, se kakua? o ni na soli ira ki na ligadra na Isireli, se segai? A sa sega ga ni vosa vua ko koya e na siga ko ya.

³⁸ A sa kaya ko Saula, Ni toro mai ki ke, oi kemuni kecega sa turaga vei ira na tamata; ia ni kila ka raica se cava e tu kina nai valavala ca oqo edaidai:

³⁹ ia me vaka sa bula ko Jiova, o koya ka vakabulai ira na Isireli, kevaka sai koya na luvequ ko Jonacani sa tu vua oqo, ena mate vakaidina ko koya. A sa sega e dua vei ira na tamata kecega sa vosa vua.

⁴⁰ A sa kaya ko koya vei ira kecega na Isireli, Ni tu yani ki kea, ia koi au kei Jonacani na luvequ, keirau na tu ga eke. A ra sa kaya vei Saula ko ira na tamata, Mo ni kitaka ga na ka e vinaka vei kemuni.

⁴¹ A sa kaya ko Saula vei Jiova na Kalou ni Isireli, Mo ni vakatakila se ko cei sa dodonu. A sa qara vei Jonacani kei Saula ni sa ia na vakawiri madigi; a sa vakadonui ko ira na tamata.

⁴² A sa kaya ko Saula, Ni vakawiri madigi vei keirau kei Jonacani na luvequ. A sa qara vei Jonacani.

⁴³ A sa kaya vei Jonacani ko Saula, Mo tukuna mai vei au se cava ko a cakava. A sa tukuna vua ko Jonacani, ka kaya, Au a vakatovolea walega e dua na oni lailai e na mua ni titoko sa tu e ligaqu; ka raica, ka'u na mate kina.

⁴⁴ A sa kaya ko Saula, Me cakacaka vakakina na Kalou, ka vakaikuritaka; ni ko na mate vakaidina, Jonacani.

⁴⁵ A ra sa kaya vei Saula ko ira na tamata, Ena mate li ko Jonacani, o koya sa kitaka na veivakabulai levu oqo e Isireli? me kakua sara: me vaka sa bula ko Jiova, ena sega e dua na drau ni uluna me lutu ki na qele; ni rau sa cakacaka kaya na Kalou edaidai oqo. A ra sa vakabulai Jonacani ko ira na tamata, a sa sega kina ni mate ko koya.

⁴⁶ A sa lako cake ko Saula, me kakua ni muri ira tiko na kai Filisitia, a ra sa lako yani ki na nodra tikina na kai Filisitia.

⁴⁷ A sa rawata ko Saula na nodra matanitu na Isireli, ka veivala kei ira na nodra meca kecega sa tiko vakavolivoliti ira, vei ira na Moapi, kei ira na luve i Amoni, kei ira na kai Itomi, kei ira na tui Sopa, kei ira na kai Filisitia, ia sa vakararawataka na vanua kecega sa lako kina ko koya.

⁴⁸ A sa cakacaka vaqaqa ko koya, ka yaviti ira na Amalekaiti, ka vakabulai ira na Isireli mai vei ira era vakacacani ira.

⁴⁹ Ia ko iratou na luve i Saula, ko Jonacani, kei Isivi, kei Malikisua; kei na yacadrau na luvena yalewa, ko Merapi ka ulumatua, ia na yacana ka gone ko Maikali:

⁵⁰ kei na yaca ni wati i Saula ko Eiinoami, na luve i Eiimaasi: ia na yacana na nona kapiteni ni valu ko Apineri, na luve i Neri, na tamana lailai i Saula.

⁵¹ Ia na tama i Saula ko Kisi; ia na tama i Apineri ko Neri, na luve i Epieli.

⁵² A sa gumatua nai valu vei ira na kai Filisitia e na gauna kecega i Saula; ia ni sa raica ko Saula e dua na tamata kaukauwa, se dua na tamata qaqa, sa daukauti koya vua.