1 Samuela 13 - Vakavakadewa Makawa

A tamata i valu i Saula, 1,2. Sa mokuta e dua na nodra tabai valu na kai Filisitia, a ra sa qai soqoni vata na kai Filisitia me vala kei ira na Isireli, 3-7. Sa qai vakacabora nai soro ko Saula, a sa vunauci koya kina ko Samuela, 8-16. Era sa vakaloloma na Isireli, e na vukudra na kai Filisitia, 17-23.

¹ Sa yabaki tolusagavulu ko Saula ni sa tekivu na nona lewa. Ia ni sa lewai ira oti na Isireli ka yabaki rua,

² sa qai digitaka me nonai valu ko Saula e le tolu na udolu na Isireli; ia sa tiko vata kei Saula e le rua na udolu mai Mikimasi kei na ulu-ni-vanua ko Peceli, ka dua na udolu sa tiko vata kei Jonacani mai Kipea nei Penijamini; ia ko ira na tamata sa vo, sa talai ira ko koya, na tamata yadua ki na nona vale laca.

³ A sa mokuta ko Jonacani na nodra tabai valu na kai Filisitia, o koya ka tiko mai Kipa; a ra sa rogoca ko ira na kai Filisitia. A sa uvuca na davui e na vanua taucoko ko Saula, ka kaya, Me ra rogoca mada na Iperiu.

⁴ A ra sa rogoca kecega na Isireli ni sa kainaki sa mokuta ko Saula na nodra tabai valu na kai Filisitia, ka ni sa boi ca talega ko ira na Isireli vei ira na kai Filisitia. A ra sa vakasoqoni vata na tamata me ra muri Saula ki Kilikali.

⁵ A ra sa vakasoqoni ira vata ko ira na kai Filisitia me ra vala kei ira na Isireli, sa tolusagavulu na udolu na qiqi-ni-valu, ka le ono na udolu na tamata sa vodo ose, ia sa vaka na mata ni nuku mai baravi na kedrai wiliwili na tamata: a ra sa lako cake, ka la'ki tiko mai Mikimasi, vaka ki na tu-i-cake mai Peci-aveni.

⁶ Ia ni ra sa kila ko ira na Isireli era sa leqa (ni ra sa taqaya ko ira na tamata), era sa qai vunitaki ira ko ira na tamata e na qara lelevu eso, kei na veikau, kei na veivatu lelevu, kei na veitikina kaukauwa, kei na veikeli.

⁷ Ia ko ira eso na Iperiu, era sa lako ki tai kadua ni Joritani, ki na vanua nei Kata kei Kiliati. Ia ko Saula sa tiko ga mai Kilikali, a ra sa muri koya ka sautaninini ko ira kecega na tamata.

⁸ A sa wawa tiko ko koya me bogi vitu, na bogi ka lokuca ko Samuela; a sa sega ni lako mai ki Kilikali ko Samuela; a ra sa se tani mai vua ko ira na tamata.

⁹ A sa kaya ko Saula, Dou kauta mai vei au e dua nai soro kama kei nai soro ni veivinakati. A sa vakacabora ko koya nai soro kama.

¹⁰ Ia ni sa vakacabora oti nai soro kama, sa qai lako mai ko Samuela; a sa la'ki tavaki koya ko Saula me vakacegui koya.

¹¹ A sa kaya ko Samuela, A cava ko sa cakava? A sa kaya ko Saula, Sa ka ga ni'u a raica era sa se tani vei au ko ira na tamata, ni ko a sega talega ni lako mai e na gauna sa lokuci, ka ni ra sa soqoni vata ko ira na kai Filisitia mai Mikimasi;

¹² au a qai kaya, Era na lako sobu mai vei au ki Kilikali ko ira na kai Filisitia, ia ka'u a sega ni kerea oti na veivuke vei Jiova, ia ka'u a vakasaurarataki au kina, ka vakacabora nai soro kama.

¹³ A sa kaya vei Saula ko Samuela, Ko sa cakacaka vakalialia: ko sa sega ni vakabauta na vunau i Jiova na nomu Kalou, ka vakarota vei iko ko koya: ke sa vakakoya, ke sa vakataudeitaka ko Jiova me sega ni mudu na nomu lewai ira na Isireli:

¹⁴ ia oqo, ena sega ga ni dei na nomu lewa: sa qara oti ko Jiova e dua na tamata sa yalovata kaya, a sa lesi koya ko Jiova me nodra turaga na nona tamata, ni ko sa sega ni vakabauta na ka ka vakarota vei iko ko Jiova.

¹⁵ A sa cavu tu ko Samuela ka lako yani e Kilikali ki Kipea nei Penijamini. Ia ko Saula sa wiliki ira na tamata era sa tiko kaya, era sa le ono beka na drau na tamata.

¹⁶ Ia era sa tiko mai Kipea nei Penijamini ko Saula, kei Jonacani na luvena, kei ira na tamata era sa tiko vata kei rau. A ra sa tiko mai Mikimasi na kai Filisitia.

¹⁷ A ra sa lako yani na dauyayana era tabai tolu mai na nodra i tikotiko na kai Filisitia; e dua na mataivalu era sa lako ki na sala vaka ki Ofira, ki na vanua ko Suali;

¹⁸ a sa lako e dua na mataivalu ki na sala ki Peci-oroni; a sa dua na mataivalu sa lako ki na sala ki nai yalayala sa donuya na buca mai Sepoimi vaka ki na veikau.

¹⁹ A sa sega ni kune e dua na matai ni kaukamea e na nodra vanua taucoko na Isireli: ni ra sa kaya na kai Filisitia, De ra cakava eso na nodra i seleiwau ko ira na Iperiu, se so na nodra moto;

²⁰ ia era sa daulako sobu ko ira kece na Isireli vei ira na kai Filisitia, me ra vagatara yadua na nonai siviyara, kei na nona matau, kei na nona vulaono, kei na nonai sivi;

²¹ ia ke mucu nai sivi, kei na matau, kei nai cula ni co e matai tolu, kei na vulaono, sa tu nai varo; ka me vagatara talega na moto ni pulumokau.

²² Ia e na siga sa ia kina nai valu, sa sega ni kune e dua nai seleiwau se dua na moto vua e dua vei ira na tamata era sa tiko vata kei Saula kei Jonacani: sa kune ga vei Saula kei Jonacani na luvena.

²³ Ia e dua na tabai valu i vakatawa ni kai Filisitia sa yacova na sala ki Mikimasi.