1 Samuela 12 - Vakavakadewa Makawa

Sa tukuna na nona yalododonu ko Samuela, 1-5. Sa vunauci ira na tamata e na vuku ni nodra talaidredre, 6-17. Sa masuta na Kalou ko koya, a sa kuru na vanua, 18,19. Sa qai vakacegui ira ko Samuela, 20-25.

¹ A sa kaya vei ira kecega na Isireli ko Samuela, Raica, ka'u sa vakarorogo vei kemuni e na ka kecega ko ni a vosa kina vei au, ia ka'u sa lesia vei kemuni e dua na tui:

² ka raica, sa qai lako voli e matamuni na tui: ia koi au, ka'u sa qase ka sika mai; ka raica, na luvequ, eratou sa tiko kei kemuni: ia ka'u a lako voli e na matamuni ni'u a gone ka yacova na siga oqo.

³ Au sa tiko oqo: ni tukuni au e na mata i Jiova, kei na matana sa lumuta oti ko koya: a pulumokau i cei ka'u sa kovea? se na asa i cei ka'u sa kovea? ia ko cei ka'u sa lawakitaka? ko cei ka'u sa vakasaurarataka? se ko cei ka'u sa taura maivua nai solisoli me mataboko kina na mataqu? ia ka'u na qai vakasuka kivei kemuni.

⁴ A ra sa kaya, Ko sa sega ni lawakitaki keimami, se vakasaurarataki keimami, ko sa sega talega ni taura e dua na ka mai vua e dua na tamata.

⁵ A sa kaya vei ira ko koya, Sa vakadinadina vei kemuni ko Jiova, a sa vakadinadina edaidai oqo na nona lumuti, ni kemuni sa sega ni kunea e dua na ka e ligaqu. A ra sa kaya, Sa vakadinadina ko koya.

⁶ A sa kaya vei ira na tamata ko Samuela, Ko Jiova ka lesi Mosese kei Eroni, ka kauti ira cake na nomuni qase mai na vanua ko Ijipita.

⁷ Ia ni tu mada ga me'u veileti kei kemuni e na mata i Jiova e na vuku ni cakacaka dodonu kecega i Jiova, sa cakava ko koya vei kemuni kei ira na nomuni qase eliu.

⁸ Ni sa lako mai ki Ijipita ko Jekope, ka sa tagi vei Jiova ko ira na nomuni qase, sa qai talai Mosese kei Eroni ko Jiova, a rau sa kauti ira tani na nomuni qase mai Ijipita, ka vakaitaukeitaki ira e na vanua oqo.

⁹ A ra sa guilecavi Jiova na nodra Kalou, a sa volitaki ira ko koya ki na liga i Sisira, na kapiteni ni valu nei Asori, kei na ligadra na kai Filisitia, kei na ligana na tui Moapi, a ra sa mai vala kei ira.

¹⁰ A ra sa tagi vei Jiova, ka kaya, Keimami sai valavala ca, ni keimami sa biuti Jiova, ka qaravi ira na Peali kei na Aseteroci: ia oqo, mo ni vakabulai keimami mai na ligadra na neimami meca, keimami na qai qaravi kemuni.

¹¹ A sa talai Jerupeali ko Jiova, kei Pitani, kei Jefica, kei Samuela, ka vakabulai kemuni mai na ligadra na nomuni meca era sa tiko vakavolivoliti kemuni, ia kemuni sa tiko vakacegu.

¹² Ia ni kemuni a raica ni sa lako cake me vala kei kemuni ko Neasi na nodra tui na luve i Amoni, kemuni a kaya vei au, E segai, me lewai keda ga e dua na tui; ia ka sa nomuni tui tiko ko Jiova na nomuni Kalou.

¹³ Ia mo ni raica mada oqo na tui kemuni a digitaka, o koya ko ni a kerea! ia raica, sa lesia vei kemuni ko Jiova e dua na tui.

¹⁴ Kevaka kemuni na rerevaki Jiova, ka qaravi koya, ka vakarorogo ki na nona vosa, ka sega ni talaidredre ki nai vakaro i Jiova, ka sa muri Jiova na nomuni Kalou, oi kemuni kei koya talega na tui sa lewai kemuni, sa na qai vinaka:

¹⁵ ia kevaka kemuni na sega ni vakarorogo ki na vosa i Jiova, ka sa talaidredre ga ki nai vakaro i Jiova, ena qai vala kei kemuni na liga i Jiova, me vaka vei ira na nomuni qase.

¹⁶ Ia oqo, mo ni tu mada ka raica na ka levu oqo ena cakava e matamuni ko Jiova.

¹⁷ Sa sega li ni gauna ni tamusuki witi edaidai? Au na masu vei Jiova, me solia ko koya na kurukuru kei na uca; mo ni kila kina ka raica ni sa ka levu na nomuni valavala ca, ko ni sa cakava e na mata i Jiova ni kemuni a kerea me dua na nomuni tui.

¹⁸ A sa masu vei Jiova ko Samuela; a sa solia ko Jiova na kurukuru kei na uca e na siga ko ya: a ra sa rerevaki Jiova vakalevu kei Samuela talega ko ira kecega na tamata.

¹⁹ A ra sa kaya vei Samuela ko ira kecega na tamata, Mo masulaki keimami na nomu tamata vei Jiova na nomu Kalou, me keimami kakua ni mate: ni keimami sa kuria na neimami valavala ca kecega e na ca oqo, ni keimami sa kerea e dua na neimami tui.

²⁰ A sa kaya ko Samuela vei ira na tamata, Ni kakua ni rere; ko ni sa cakava oti na ka ca oqo; ia ni kakua ga ni lesu tani mo ni kua kina ni muri Jiova, ia mo ni qaravi Jiova ga e na yalomuni taucoko;

²¹ ia mo ni kakua ni lesu tani, mo ni muria kina na ka wale, na ka e sega ni yaga se ia rawa na veivakabulai; ni sa ka wale oqori.

²² Ni na sega ni laivi ira na nona tamata ko Jiova e na vuku ni yacana levu; ni sa vinakata ko Jiova me qisi kemuni mo ni nona tamata.

²³ Ia koi au, me'u kakua sara ni cala vei Jiova ni ka'u sa cegu ni masulaki kemuni: ia ka'u na vakavulici kemuni e nai valavala vinaka ka dodonu:

²⁴ ni rerevaki Jiova ga, ka qaravi koya vakaidina e na yalomuni taucoko; ia mo ni nanuma na veika levu sa cakava vei kemuni ko koya.

²⁵ Ia kevaka kemuni na ia tiko nai valavala ca, ko ni na vakaoti, koi kemuni vata kei na nomuni tui.