1 Samuela 1 - Vakavakadewa Makawa

Ai tukutuku kei Elikana, kei na watina e le rua ko Ana kei Penina, 1-8. Sa kerea e dua na luvena ko Ana, a sa sucu vua ko Samuela, 9-20. Sa soli koya vua na Kalou ko tinana, 22-28.

¹ Sa dua na tamata mai Ramaceimi-sofimi, mai na nodra ulu-ni-vanua na Ifireimi, na yacana ko Elikana, na luve i Jiroame, na luve i Ilaiu, na luve i Tou, na luve i Sufi, na kai Efiraca:

² a sa le rua na watina; a yacana e dua ko Ana, ia na yaca ni kenai karua ko Penina: a sa vakaluveni ko Penina, ia sa sega na luve i Ana.

³ A sa lako cake na tamata oqo mai na nona koro e na veiyabaki, me ia na lotu ka vakacabora nai madrali vei Jiova ni lewe vuqa mai Sailo. A rau sa tiko maikea na luve i Ilai, ko Ofinai kei Finiase, erau sa bete vei Jiova.

⁴ Ni sa yaco na siga me vakacaboi soro ko Elikana, sa solia ko koya nai votavota eso vei Penina na watina, vei ira kece talega na luvena tagane kei na luvena yalewa:

⁵ ia sa solia vei Ana ko koya e rua nai votavota; ni sa lomani Ana: ia sa sogota na ketena ko Jiova.

⁶ A sa vakayalocataki koya vakalevu na nona meca, me vakararawataka na lomana, ni sa sogota na ketena ko Jiova.

⁷ Ia ni sa kitaka vakakina ko Elikana e na veiyabaki, ni sa lako cake ki na vale i Jiova ko Ana, sa vakararawataki koya tikoga ko Penina: a sa tagi dula kina ko koya, ka sega ni kana.

⁸ Sa qai kaya vua ko Elikana na watina, I Ana, a cava ko sa tagi dula kina? ka cava ko sa sega kina ni kana? ka cava sa rarawa kina na lomamu? au sa sega beka ni vinaka vei iko, ka ca ke sa le tini na luvemu tagane?

⁹ A sa tu cake ko Ana, ni sa kana ka gunu oti mai Sailo: a sa tiko ko Ilai na bete e nai tikotiko sa voleka ki na duru ni vale i Jiova:

¹⁰ a sa rarawa na yalona, a sa masu vei Jiova ko koya, ka tagi vakalevu:

¹¹ a sa cavuta na bubului, ka kaya, Kemuni Jiova ni lewe vuqa, kevaka ko ni na raica vakaidina na rarawa ni nomuni vada, ka nanumi au, ka sega ni guilecava na nomuni vada, ka solia vei au na nomuni vada e dua na gonetagane, ka'u na qai soli koya vei Jiova e na veisiga kecega sa bula kina, ia ena tabu tasi ko koya.

¹² Ia ni sa masu tikotikoga ko koya e na mata i Jiova, sa vakaraica na gusuna ko Ilai.

¹³ A sa vosa ga e lomana ko Ana; sa vosa minimini ga, a sa sega ni rogo na domona: a sa nanuma kina ko Ilai ni sa mateni ko koya.

¹⁴ A sa kaya vua ko Ilai, Me bogi vica mada na nomu mateni? mo biuta laivi na gunu waini.

¹⁵ A sa vosa ko Ana, ka kaya, Sa segai, noqu turaga, au sa yalewa yalorarawa koi au: ia ka'u sa sega ni gunu waini se yaqona kaukauwa, ia ka'u sa sova na yaloqu e na mata i Jiova.

¹⁶ Kakua ni nanuma na nomu vada me luve ni vu-ni-ca: ni'u sa vosa e na vuku ni kena levu ni noqu rarawa kei na noqu yalobitaki, ka yacova na gauna oqo.

¹⁷ Sa qai kaya ko Ilai, Mo lako e na vakacegu: ia me solia vei iko na Kalou ni Isireli na ka ko sa kerea vua.

¹⁸ A sa kaya ko koya, Me'u kune loloma mada e matamu na nomu vada. A sa lako yani na yalewa e nonai lakolako, a sa kana, a sa sega tale ni vakaveveku mata ko koya.

¹⁹ A ratou sa sou e na mataka, ka ia na lotu e na mata i Jiova, ka lesu tale ki nodratou vale ki Rama: a rau sa vei moceri ko Elikana kei Ana na watina; a sa nanumi koya ko Jiova.

²⁰ Ia ni sa yaco na kena gauna, sa kunekune ko Ana, ka vakasucuma na gone tagane, a sa vakatoka na yacana ko Samuela (Sa vakarorogo na Kalou): ka kaya Ni'u sa kerei koya vei Jiova.

²¹ Ia sa lako cake ko Elikana, kei ira kecega na nona lewe-ni-vale, me vakacabora vei Jiova nai soro vakayabaki, kei na nona bubului.

²² A sa sega ni lako cake ko Ana; ni sa kaya vua na watina, Me kali mada na gone, au na qai kauti koya, me rairai e na mata i Jiova, ka me tiko maikea ka sega ni mudu.

²³ A sa kaya vua ko Elikana na watina, Mo cakava ga na ka e vinaka vei iko; mo tiko me kali mada ko koya; ia me vakataudeitaka na nona vosa ko Jiova. A sa tikotiko ga na yalewa, ka vakasucuma na luvena, ka me kali oti mada.

²⁴ Ia ni sa kalia oti ko koya, sa kauti koya vata kaya, kei na pulumokau e tolu, kei na dua na efa madrai droka, ka dua na tavaya waini, ka kauti koya ki na vale i Jiova ki Sailo: a sa gone lailai ga ko koya.

²⁵ A ra sa vakamatea na pulumokau, ka kauta na gone vei Ilai.

²⁶ A sa kaya ko koya, Noqu turaga, me vaka na kena dina na nomu bula, na noqu turaga, koi au na yalewa ka tu voleka vei iko eke ni'u sa masu vei Jiova:

²⁷ au a kerea na gone oqo; a sa solia mai vei au ko Jiova na ka ka'u a kerea vua:

²⁸ ia ka'u sa soli koya kina vei Jiova; sa soli tiko vei Jiova e na veisiga kecega sa bula kina ko koya. A sa lotu maikea vei Jiova ko koya na gone.