1 Pita 4 - Vakavakadewa Makawa

Sa vakarota vei ira me ra kakua ni valavala ca, me ra muri Jisu ga, ni sa voleka nai vakataotioti, 111. Sa vakacegui ira, 1219.

¹ Ia ni sa vakararawataki na Karisito e na yagona e na vukuda, dou vakaiyaragi mada e na yalo e vakakina: ni sa mudu ni valavala ca ko koya sa vakararawataki e na yagona;

² me kakua kina ni vaka na gagadre ca ni tamata na nona bula e na yagona e na gauna sa vo, me vaka ga na loma ni Kalou.

³ Ia me kena levu vei keda na gauna ni bula sa oti ni da kitaka kina na ka era vinakata ko ira era sa sega ni lotu, ni da sa muria lako na gagadre ca, na dodomo ca, na daugunu waini, nai soqosoqo lialia, na daumateni, kei na kena ca ni dausoro ki na veimatakau:

⁴ a ra sa kurabui ni dou sa sega ni gu vata kei ira ki nai valavala sa velavela uasivi era sa vosavakacacataki kemudou kina,

⁵ ia era na tukuni ira vua sa vakarau me lewai ira era sa bula kei ira talega na mate.

⁶ E na vuku ni ka oqo sa vunautaki kina nai tukutuku-vinaka vei ira talega era sa mate tu, me ra lewai me vaka na tamata me mate na yagodra, ia me ra bula ga vua na Kalou e na yalodra.

⁷ Ia ka sa voleka nai vakataotioti ni ka kecega: dou yalomatua kina, ka dauyadrava na masumasu.

⁸ Ia na ka me liu oqo mo dou dauveilomani vakalevu vakai kemudou; ni na ubia nai valavala ca e vuqa na loloma.

⁹ Dou dui ia na veivuke koi kemudou ni dou vulagi voli, ia dou kakua ni vosa kudrukudru kina.

¹⁰ Me vaka dou sa dui rawata nai solisoli, mo dou dui solia vakakina vakai kemudou, me vaka na dauniyau vakayalo e na loloma e vakavuqa ni Kalou.

¹¹ Kevaka e dua sa vosa, me ia me vaka na vosa ni Kalou: kevaka e dua sa kitaka na cakacaka, me ia ga me vaka na kaukauwa sa solia na Kalou: me vakarokorokotaki kina na Kalou e na ka kecega e na vuku i Jisu Karisito, o koya sa nona na vakarokoroko kei na lewa e na gauna kecega ka sega ni mudu. Emeni.

¹² Oi kemudou sa lomani, kakua ni kidacala e na vuku ni rarawa katakata sa yaco me vakatovolei kemudou, me vaka sa yacovi kemudou na ka tani:

¹³ ia dou reki ga, ni dou sa vakaivotavota talega e na veivakararawataki i Karisito; mo dou reki talega kina, e na reki vakaidina, ni na vakaraitaki ko koya e nai ukuuku.

¹⁴ Kevaka dou sa vakasewasewani e na vuku ni yaca i Karisito, dou sa kalougata kina; ni sa qai tu vei kemudou na Yalo sa vakarokorokotaki kei na Yalo ni Kalou: sa vosavakacacataki koya ko ira oqori, a sa vakarokorokotaka koi kemudou.

¹⁵ Ia me kakua e dua vei kemudou me vakararawataki ni sa daulaba, se ni daubutako, se ni caka ca, se ni dauvakavuca:

¹⁶ ia kevaka sa vakararawataki ni sai tokani i Karisito, me kakua ni madua kina; me vakarokorokotaka ga na Kalou e na vuku ni ka oqo.

¹⁷ Ni sa yaco na gauna me vakatekivu na veicudruvi vei ira na mataqali ni Kalou: ia kevaka ena vakatekivu vei keda, a cava ena kenai vakataotioti vei ira era sa sega ni talairawarawa ki nai tukutuku-vinaka ni Kalou?

¹⁸ Ia kevaka sa bula vakadredre ko koya sa yalododonu, ena rairai evei ko koya sa sega ni lotu kei koya na tamatai valavala ca?

¹⁹ O koya oqo me ra solia na yalodra e nai valavala vinaka ko ira era sa vakararawataki me vaka na loma ni Kalou, vua na Vu ni ka kecega, ka sa dina talega.