1 Pita 2 - Vakavakadewa Makawa

Sa vakarota vei ira ko koya me ra kakua ni lomaca, me ra gadreva sara na vosa ni Kalou, 13. Sa qai tukuna ni sa nodra ka talei ko Jisu, 410. Sa qai tukuna nai valavala e kilikili kei ira, 1124.

¹ O koya oqo ni dou sa biuta tani kina na lomaca kecega, kei na daulawaki kecega, kei na dauveivakaisini kei na dauvuvu, kei na dauveivosavakacacataki kecega,

² mo dou vaka na gone sa qai sucu, mo dou gadreva nai vakavuvuli sa vaka na wai-ni-sucu dina, mo dou tubu cake kina:

³ kevaka e dina ni dou sa tovolea oti ni sa yalololoma na Turaga.

⁴ Ni dou sa lako mai kivei koya, me vaka ki na vatu bulabula, ko ya sa biuta ko ira na tamata, ia na Kalou sa digitaka, a sa talei:

⁵ oi kemudou talega, me vaka dou sa veivatu bulabula, dou sa tara cake mo dou vale vakayalo, me matabete yalosavasava, mo dou cabora kina nai madrali vakayalo, sa vinaka vua na Kalou e na vuku i Jisu Karisito.

⁶ O koya sa tu talega e nai Vola Tabu, Raica, au sa viritaka mai Saioni na vatu ni yavu e na tutu-ni-vale, sa digitaki, ka talei; Ia ko koya sa vakabauti koya ena sega ni vakamaduataki:

⁷ a sa nomudou kina na kena talei, oi kemudou sa vakabauta; ia kivei ira sa dautalaidredre, Na vatu era a biuta ko ira na matai-ni-vale, Sa yaco me kenai vakadei e na tutu-ni-vale,

⁸ kei Na vatu era sa tarabe kina, kei na vatu era sa bale kina; ni ra sa tarabe e na vosa, ni ra sa talaidredre: era sa lesi talega me ra vakakina.

⁹ Ia koi kemudou nai tabatamata digitaki, a matabete vakaturaga, a matanitu yalosavasava, a tamata sa taukena na Kalou, mo dou vakaraitaka kina na nona vinaka sara o koya ka kacivi kemudou mai na butobuto ki nona rarama e veivakurabuitaki:

¹⁰ oi kemudou ka sega ni tamata taukeni eliu, ia dou sa qai tamata ni Kalou: dou a sega ni lomani eliu, ia dou sa qai lomani.

¹¹ Oi kemudou sa lomani, au sa vakamasuti kemudou, ni dou sa vakataki ira na vulagi kei ira era dauveilakoyaki, mo dou tarovi kemudou mai na gagadre ca ni yago, sa veivala kei na yalo;

¹² me dodonu na nomudou i valavala e na kedra maliwa era sa sega ni lotu: me ka oqori era vakarokorokotaka kina na Kalou e na siga ni veilakovi, e na vuku ni valavala vinaka era na raica, ko ira era sa dauvosavakacacataki kemudou me vaka ni dou sa tamata caka ca.

¹³ Dou talairawarawa ki nai lesilesi kecega ni tamata e na vuku ni Turaga: se vua na tui, ni sa liu sara;

¹⁴ se vei ira na turaga ni lewa, me vaka vei ira era sa talai mai vua me cudruvi kina ko ira era sa caka ca, ka me dokai ko ira sa caka vinaka.

¹⁵ Ni sai koya na loma ni Kalou, mo dou vagaluya e nai valavala vinaka na nodra sesewa na tamata lialia:

¹⁶ mo dou vakataki ira era lalaga, ia dou kakua ni cakava na nomudou lalaga me vuni kina na lomaca, ia dou vaka ga na tamata ni Kalou.

¹⁷ Doka na tamata kecega. Lomani ira na veiwekani. Rerevaka na Kalou. Vakarokorokotaka na tui.

¹⁸ Oi kemudou na tamata, dou talairawarawa vei ira na nomudou turaga e na rere kecega; kakua vei ira duaduaga era sa yalovinaka ka yalomalua, vei ira talega era sa yalovakatani.

¹⁹ Ni sa ka ni vakavinavinaka oqo, kevaka e dua sa vosota na rarawa ni sa vakararawataki vakatawadodonu, ka ni sa via vinaka vua na Kalou.

²⁰ Ia dou na dokai vakacava, kevaka dou na vosota, ni dou sa caka ca ka sa vaculaki kina? ia kevaka dou sa caka vinaka, ka sa vakararawataki kina, ka dou vosota ga, oqo sa ka vinaka vua na Kalou.

²¹ Ni dou sa kacivi me vakakina: ni sa vosota talega na Karisito na rarawa e na vukumudou, a sa laiva vei kemudou nai vakarau, mo dou muria na we ni yavana:

²² o koya sa sega ni cakava e dua na ka ca, a sa sega ni kune e na gusuna na dauveivakaisini;

²³ ni sa vakasewasewani ko koya, sa sega tale ni ia na veivakasewasewani; ni sa vakararawataki tiko, sa sega ni vosavakacudrucudru; sa laivi koya ga vua sa lewa vakadodonu:

²⁴ o koya ga vakai koya ga ka colata na nodai valavala ca e na yagona e na kauveilatai, me da mate tu ki nai valavala ca, ka ia nai valavala dodonu e na noda bula: ia sa we ni kena kuita dou sa vakabulai kina.

²⁵ Ni dou a vakataki ira na sipi sa sese: ia dou sa qai saumaki tale vua nai vakatawa o koya sa vakaraica na yalomudou.