1 Korinica 9 - Vakavakadewa Makawa

Sa tukuna ko koya ni sa sega ni tabu vua me veitaliataki koya e na ka eso, a sa dodonu ga me ra saumi koya e na nona cakacaka vei ira; ia ka sa vinakata ko koya me vosota na oca, kei na ka kecega, e na vukudra, me tubu kina na cakacaka ni Kalou, 123. Sa tautauvata kei na cici cere na lotu, 2427.

¹ Au sa sega li ni lalaga? au sa sega li ni apositolo koi au? au a sega li ni raici Jisu Karisito na noda Turaga? oi kemudou, dou sa sega li ni noqu cakacaka e na Turaga?

² Kevaka kau sa sega ni apositolo vei ira eso tani, au sai apositolo dina vei kemudou: ni sai vakadinadina niu sai apositolo na nomudou tu vata kei na Turaga.

³ Au sa kaya vakaoqo vei ira era sa tarogi au,

⁴ Keitou sa sega beka ni veitalia me keitou kana, se gunu?

⁵ keitou sa sega beka ni veitalia me keitou kauta voli e dua na yalewa lotu, sa wati i keitou, me vakataki ira nai apositolo tani, kei iratou na taci ni Turaga, kei Kifa?

⁶ se keirau ga kei Panapasa, keirau sa sega beka ni veitalia me keirau kua so ni cakacaka?

⁷ O cei na sotia sa laki valu e na dua na siga, ka sa saumi koya vakai koya? o cei sa tea na were-ni-vaini, ka sa sega ni gunuva na vuana? se ko cei sa vakania na qele-ni-sipi, ka sa sega ni gunu e na wai-ni-sucu ni qele-ni-sipi?

⁸ Au sa vosataka li na veika oqo me vaka ga na tamata? sa sega beka ni kaya vakakina na vunau?

⁹ ni sa volai e na vunau i Mosese, Mo kakua ni vauca na gusu ni pulumokau ni sa buturaka na sila. Sa daunanuma beka na pulumokau na Kalou?

¹⁰ se sa vosa beka ko koya e na vuku i keitou ga? Io, sa volai oqo e na vuku i keitou; ni sa dodonu me cuki were e nai nuinui ko koya sa daucuki; kei koya sa buturaka na sila me buturaka e nai nuinui ni na rawata na ka.

¹¹ Kevaka keitou sa kaburaka oti vei kemudou na veika vakayalo sa ka levu beka me keitou kumuna na nomudou veika vakavuravura?

¹² Kevaka sa veitaliataki kemudou ko ira na tamata tani eso, e sega beka ni dodonu sara vei keitou? Ia keitou sa sega ni veitalia vakaoqo; keitou sa vosota na ka kecega, de keitou tarova nai tukutuku vinaka kei Karisito.

¹³ Dou sa sega beka ni kila, ni ra sa kana e na ka ni vale-ni-soro ko ira sa dauia na cakacaka tabu? era sa rawata na kedra mai nai cabocabo-ni-soro ko ira era sa dauqarava nai cabocabo-ni-soro?

¹⁴ Sa lesia vakakina na Turaga me ra bula e nai tukutuku-vinaka ko ira era sa tukuna nai tukutuku-vinaka.

¹⁵ Ia kau sa sega ni vakayagataka e dua na ka oqo; au sa sega talega ni vola na veika oqo, me sa caka vakakina vei au: ni sa vinaka vei au meu mate, ka ca me dua e tarova na ka kau sa dokai au kina.

¹⁶ Ia kevaka kau sa vunautaka nai tukutuku-vinaka, sa sega na ka meu dokai au kina: ni kau sa vakasaurarataki; io sa ca sara vei au, kevaka kau sa sega ni vunautaka nai tukutuku-vinaka!

¹⁷ Ia kevaka kau sa cakava na ka oqo ni sa vinakata na yaloqu, au sa saumi; ia kevaka ni sa sega ni vinakata na yaloqu, sa qai soli vei au e dua na cakacaka vakaitalatala.

¹⁸ A cava sa qai kenai sau vei au? Na noqu vunautaka nai tukutuku-vinaka meu kakua ni vakaivolitaki, meu kakua ni cakava me vaka sa dodonu vei au e nai tukutuku-vinaka.

¹⁹ Ni sa dina ga niu sa lalaga maivei ira kecega na tamata, ia kau sa qisi au meu nodra bobula na tamata kecega, meu rawai ira kina na lewe vuqa.

²⁰ Ia kau sa yaco meu vaka e dua na Jiu vei ira na Jiu, meu rawai ira kina na Jiu; vei ira sa vauci e na vunau, meu vaka e dua sa vauci e na vunau, ia kau sa sega ni vauci e na vunau, meu rawai ira kina era sa vauci e na vunau;

²¹ vei ira sa sega kina na vunau, meu vaka e dua sa sega vua na vunau, meu rawai ira kina sa sega vei ira na vunau, ia ka sa sega ni yali vei au na vunau ni Kalou, au sa muria ga na vunau i Karisito;

²² vei ira era sa malumalumu kau sa yaco meu vaka e dua sa malumalumu, meu rawai ira kina era sa malumalumu: au sa yaco meu ka kecega vei ira kecega na tamata meu vakabula eso e na ka kecega.

²³ Ia kau sa cakava na ka kecega e na vuku ni tukutuku-vinaka, meu rawata vata kina kei kemudou na kenai sau.

²⁴ Dou sa sega beka ni kila ni ra sa cici kecega ko ira sa ciciva na cere, ia sa dua bauga sa tauca na cere? Dou cici vakakina, mo dou tauca.

²⁵ Ia ko koya yadua sa via gumatua, sa tiko malua e na ka kecega; ia era kitaka ko ira oqori, me nodra e dua nai sala sa ca rawarawa; ia koi keda, me dua sa sega ni ca rawa.

²⁶ Au sa cici vakakina, ia sa sega ni vaka e dua e sega ni kila: au sa vacu vakakina, ia ka sega ni vaka e dua sa vacuka na cagi:

²⁷ ia kau sa vakamalumalumutaka na yagoqu, ka vakabobulataka, de dua na ka, niu sa vunau vei ira na tamata tani, au sa qai biu wale tu.