1 Korinica 3 - Vakavakadewa Makawa

Sa tukuna vei ira ko koya ni ra sa gone lalai ga e na lotu, 14. Era sa vaka nai vakatau-ni-were ko ira era sa dauvunau, ka sa vaka na matai ni vale, ia na yavu ni vale ko Jisu, 515. E dodonu me yalosavasava ko ira sa lotu, 16,17; ka sa ka sesewa vua na Kalou na vuku vakavuravura, 1823.

¹ Ia koi au, au sa sega ni vosa rawa vei kemudou, na veiwekani, me vaka vei ira era sa vakayalo, me vaka vei ira era sa vakayago ga, me vaka vei ira era sa gone lalai e na nodra tu vata kei Karisito.

² Au sa vagunuvi kemudou e na wai-ni-sucu, ka segai e na kakana dina; ni dou a sega ni rawata, edaidai talega dou sa sega ni rawata.

³ Ni dou sa vakayago tikoga: dou sa sega li ni vakayago tu kai valavala vakatamata, ni sa tu vei kemudou na vuvu, kei na veileti?

⁴ Dou sa sega li ni vakayago, ni sa kaya tiko e dua, Oi au sa nei Paula; ka dua tani, Oi au sa nei Apolosa?

⁵ Ia ko cei ko Apolosa? se ko cei ko Paula? ai talatala walega dou sa vakabauta e na vukudrau, me vaka sa solia na Turaga ki na tamata yadua.

⁶ Au sa tea koi au, sa vakasuasuataka ko Apolosa; ia na Kalou ga sa vakatubura.

⁷ Sa qai ka wale kina ko koya sa tea, kei koya sa vakasuasuataka; ia sa levu duaduaga na Kalou, o koya sa vakatubura.

⁸ Erau sa tautauvata sara ko koya sa tea kei koya sa vakasuasuataka: ia na tamata yadua ena rawata na kenai sau me vaka na nona cakacaka.

⁹ Ni da sa daucakacaka vata kei koya na Kalou; dou sa were ni Kalou, dou sa vale ni Kalou.

¹⁰ Me vaka na loloma ni Kalou sa soli mai vei au, me vaka na matai ni vale sa vuku, au sa viritaka na yavu, a sa tara kina e dua tani. Ia na tamata yadua me sa lewa vinaka nai valavala ni nona tara kina.

¹¹ Ni sa sega ni rawata e dua na tamata me viritaka na yavu tani, ko ya ga sa viritaki tu, ko Jisu Karisito ga.

¹² Ia kevaka e dua na tamata sa tara cake e na yavu oqo na koula, na siliva, na vatu talei, na kau, na co malai, se na vu-ni-sila;

¹³ ena vakatakilai na cakacaka ni tamata yadua: ni na vakatakila mai na siga ko ya, ni na vakatakilai e na bukawaqa; ia ena vakatovolei e na bukawaqa na cakacaka ni tamata yadua se sa vakaevei na kenai valavala.

¹⁴ Kevaka sa tu dei na nona cakacaka e dua na tamata, sa tara cake ko koya, ena rawata na kenai sau.

¹⁵ Kevaka ena vakamai na nona cakacaka e dua, ena yali vua na kenai sau; ia ko koya ga ena vakabulai; ia sa na vaka ga na bula mai na bukawaqa.

¹⁶ Dou sa sega beka ni kila ni dou sa vale ni Kalou, ka sa tiko vei kemudou na Yalo ni Kalou?

¹⁷ Kevaka e dua na tamata sa vakarusa na vale ni Kalou, ena vakarusai koya na Kalou; ni sa savasava na vale ni Kalou, ia sai kemudou oqo.

¹⁸ Me kakua e dua e vakaisini koya vakai koya. Kevaka e dua vei kemudou sa nanuma sa vuku vakavuravura, me sesewa mada ko koya me vuku mai kina.

¹⁹ Ni sa ka sesewa vua na Kalou na vuku ni vuravura oqo. Ni sa volai, Sa rawai ira na vuku ko koya e na nodra i lawaki.

²⁰ Ka vaka tale, Sa kila ko Jiova na nodra nanuma na vuku, ni sa sega ni yaga.

²¹ O koya oqo me kakua kina e dua me vosa doudou e na vukudra na tamata. Ni sa nomudou na ka kecega;

²² se ko Paula, se ko Apolosa, se ko Kifa, se ko vuravura, se na bula, se na mate, se na veika sa tu edaidai, se na veika ena yaco emuri; oqo kecega sa nomudou;

²³ ia dou sa nei Karisito; ia sa nei koya na Kalou na Karisito.