1 Korinica 2 - Vakavakadewa Makawa

Sa tukuna ni sa sega ni vunau ko koya e na vuku vakavuravura, 15; a sa vuku ga na nona vunau ni sa vukei koya na Yalo Tabu, 613; a sa sega kina ni kila na kenai balebale ko koya sa sega ni yalovou, 1416.

¹ Ia koi au, niu sa lako yani vei kemudou, na veiwekani, au sa sega ni lako e na vosa vinaka se na vuku, niu sa vunautaka vei kemudou na vosa sa tukuni kina na Kalou.

² Ni sa dei na yaloqu meu kakua ni kila e na kemudou maliwa e dua na ka tani, ko Jisu Karisito duaduaga, kei na nona lauvako ki na kauveilatai.

³ Ia kau a tiko vata kei kemudou e na malumalumu, kei na rere, kei na sautaninini levu.

⁴ Ia na noqu vosa, niu sa vunau, sa sega ni ia e na vosa vakaveitemaki ni vuku vakatamata, sa ia ga e na kena vakadinadinataki ni Yalo Tabu, kei na kaukauwa-mana:

⁵ me kakua kina ni tu na nomudou vakabauta e na nodra vuku na tamata, e na kaukauwa ga ni Kalou.

⁶ Ia keitou sa tukuna na vuku e na kedra maliwa era sa yalomatua sara: a sa sega ga na vuku ni vuravura oqo, se na nodra vuku na turaga ni vuravura oqo, o koya sa yaco me ka wale:

⁷ ia na vuku ga ni Kalou keitou sa tukuna e na ka vuni, io, oqori ka vunitaki eliu, ka lesia na Kalou ni sa bera ni caka ko vuravura me da vakalougatataki kina;

⁸ ia ka sa sega e dua na turaga ni vuravura oqo sa kila: ia kevaka era sa kila, era sa sega ni vakota ki na kauveilatai na Turaga vakaiukuuku.

⁹ Ia sa vaka nai vola, Sa sega na mata sa kunea, se na daliga sa rogoca, Ka sa sega ni curu ki na loma ni tamata, Na veika sa vakarautaka na Kalou me nodra era sa lomani koya.

¹⁰ Ia vei keda ga sa vakatakila mai na Kalou e na Yalo Tabu; ni sa dikeva na ka kecega na Yalo Tabu, io, na veika titobu ni Kalou.

¹¹ Io, ko cei na tamata sa kila na ka ni tamata, a yalo ni tamata ga sa tiko e lomana? sa vaka talega kina na veika ni Kalou sa sega e dua sa kila, sa kila ga na Yalo ni Kalou.

¹² Ia eda sa sega ni rawata na yalo ni vuravura, na Yalo ga sa mai vua na Kalou; me da kila kina na veika sa solia walega mai vei keda na Kalou.

¹³ A veika oqori keitou sa tukuna talega, ia ka sa sega ga e na vosa sa vakatavulica na vuku ni tamata, o koya ga sa vakatavulica na Yalo Tabu; ni keitou sa vakatautauvatataka na veika vakayalo kei na veika vakayalo.

¹⁴ Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua, a sa sega ni kila rawa ko koya, ni ra sa kilai vakayalo ga.

¹⁵ Ia ko koya sa vakayalo sa kila na ka kecega, a sa sega e dua sa kilai koya.

¹⁶ Io, ko cei sa kila na loma ni Turaga, me vakatavulici koya kina? Ia sa tu vei keda na lomai Karisito.